Şəhadəti ilə Azərbaycan tarixindən keçən həmkarımız - Sirac Abışov

Описание: 2020-ci il 44 günlük Vətən müharibəsi fonunda Azərbaycan üçün çox fərqli il oldu. 2021-ci ilə Qarabağla bağlı illərin arzuları çin, çiyinlərimizdən Qarabağ ağırlığında yük götürülmüş, xalq və dünya vətəndaşı olaraq özünü təsdiq etmiş, qələbə ruhu ilə daxil olduq. Bu qələbənin qazanılmasında hər kəs, fərd-fərd, ailəlikcə, cəmiyyət olaraq böyük fədakarlıq göstərərək, ağır itkilər verərək, əlimizdən gələnin ən yaxşısını etməklə, birlikdə, həmrəyliklə iştirak etdik. AZTV ailəsi olaraq bizim itkimiz 2021-ci ilin iyununda Sirac Abışovun Kəlbəcərdə həlak olması ilə çox ağır oldu. Onun timsalında təcrübəli xəbər operatoru, vətənpərvər, hər tapşırığı vicdanla yerinə yetirən əməkdaş, mərd, gülərüz iş yoldaşı itirdik. İndi qarşıdan 2022-ci il gəlir. Yeni il ailə bayramıdır. Biz də ailəmizin heç vaxt unudulmayacaq qəhrəman üzvünü yad etmək üçün Şəhid Sirac Abışovun əbədi uyuduğu müqəddəs şəhidlər xiyabanını ziyarət etdik.

Sumqayıtın müqəddəs Şəhidlər Xiyabanında təkcə Siracgilin ailəsindən üç nəfər uyuyur. 1994-cü ilin yanvarın 6-da Ağdamın Güllücəsində 20 yaşında şəhid olan dayısı Həmzə Adıyev... 1995-ci ildə şəhidlərin şanlı cərgəsinə qoşulan qohumu Aqil Quliyev... Sirac, anasının şəhid qardaşı üçün axıtdığı göz yağışlarının altında, məcburi köçkün düşdüyü evin soyuq divarlarının arxasında vaxtından əvvəl böyümüş, ailənin məsuliyyətini, Vətənin dəyərini lap balaca olanda dərk eləmişdi.

Sirac başqa idi. Sərhədləri vardı, onunla hər zarafatı etmək olmazdı. Ancaq özü elə incə yumorla yanaşardı ki, güldükcə-gülər, zərrə inciməzdin. Cüssəli idi. Bütün bu şəxsiyyətinin içində yuxa ürəyi, optimist yanaşması, azad ruhu vardı. Elə bu ruha yaraşan Özgür adını oğluna qoymuşdu.

Sirac Azərbaycanın Milli Qəhrəmanı tele-reportyor Çingiz Mustafayevlə eyni gündə doğulmuşdu. Bu təsadüfün özü ilə çox fəxr edirdi. Bəlkə də uşaqlığında su daşıdığı kanistrləri çiyninə götürüb kameraymış kimi çəkiliş etməyi, peşəsinə sevgisi, Qarabağ işğaldan azad olanda operator kimi qorxmadan o təhlükəli torpaqlara tələsməyi Çingiz yolu ilə getmək istəyindən idi. Bu yolun sonunun şəhidlik mərtəbəsi olduğunu bəlkə də bilirdi. O mərtəbəyə doğru 8 ay dayanmadan qarış-qarış, kadr-kadr addımladı. Dayısının şəhid düşdüyü Ağdamdan, ailəsinin didərgin salındığı doğma Qubadlıdan, Kəlbəcərdən keçdi... Anası Azadədən, oğlu Özgürdən, 32 yaşında cavanlığından, həyatından keçdi. Sirac şəhadəti ilə Azərbaycan tarixindən keçdi. Bu tarixə yüz il sonra belə onun kamerasının gözü ilə baxılacaq.

Copyright © AZTV

YouTube kanalına abunə olun: https://bit.ly/2ZKtzKO

Facebook - https://bit.ly/38x28YP
İnstagram -
Twitter - https://bit.ly/2VPe976
Youtube - https://bit.ly/31Qb1eY
Telegram: https://bit.ly/3heof98

Rəsmi sayt:
https://bit.ly/3e28gJJ AZ
https://bit.ly/3dZP4MJ RU
https://bit.ly/2Z4EMH9 EN

«Azərbaycan Televiziya və Radio Verilişləri» QSC-si ölkəmizin ən qocaman televiziya və radio qurumudur: Azərbaycan Radiosu 1926-cı il noyabrın 6-da, Azərbaycan televiziyası 1956-cı il fevralın 14-də yaradılıb.
Azərbaycan Televiziyası ölkə teleməkanının formalaşmasında böyük rol oynayıb. Bu BİRİNCİlik müstəqillik dövründə yaradılan bütün telekanalların fəaliyyətində özünü qabarıq şəkildə göstərib.
Azərbaycan Respublikasının Prezidenti İlham Əliyevin 4 sentyabr 2019-cu il tarixli sərəncamı ilə Rövşən Məmmədov "Azərbaycan Televiziya və Radio Verilişləri” Qapalı Səhmdar Cəmiyyətinin sədri təyin edilib.

#AZTV #AzərbaycanTeleviziyası