સન્માનપત્ર, વિદાય શુભેચ્છા કાર્યક્રમ, નિવૃત્તિ સન્માન સમારંભ, શિક્ષક સત્કાર સમારંભ, શિક્ષક વિદાય

Описание: સન્માનપત્ર, વિદાય શુભેચ્છા કાર્યક્રમ, નિવૃત્તિ સન્માન સમારંભ, શિક્ષક સત્કાર સમારંભ, શિક્ષક વિદાય
શ્રી નિર્મળાબેન ચૌહાણ : નિવૃત્તિ સન્માન સમારંભ તારીખ ૫/૪/૨૦૨૫ ને શનિવાર
સન્માનપત્ર

સન્માનનીય નિર્મળાબેન સેમ્યુઅલભાઈ ચૌહાણ,
મદદનીશ શિક્ષિકા,
P M Shri પ્રાથમિક ગુજરાતી શાળા હાડગુડ, તા.જિ. આણંદ.

શિક્ષક તરીકેની ૩૮ વર્ષની અમૂલ્ય, યશસ્વી અને પવિત્ર ફરજોમાંથી વયનિવૃત્ત થઈ રહેલ આદરણીય નિર્મળાબેનને કૃતજ્ઞભાવે આભારભર્યા અંતરે આ સન્માનપત્ર અર્પણ કરતાં અમો ગૌરવની લાગણી અનુભવી રહ્યાં છીએ.
લોખંડીપુરુષ સરદાર વલ્લભભાઈ પટેલનાં વતન કરમસદ ખાતે પિતા સેમ્યુઅલભાઈ અને માતા માગ્રેટબેનના ઘરે તારીખ ૨૭/૦૧/૧૯૬૭ ના શુભદિને આપનો જન્મ થયો. આપે ધોરણ એક થી સાત સુધીનું પ્રાથમિક શિક્ષણ આર.સી.મિશન શાળા, કરમસદ ખાતે અને ધોરણ આઠ થી દશ સુધીનું માધ્યમિક શિક્ષણ સરદાર વલ્લભભાઈ પટેલ હાઈસ્કૂલ, કરમસદ ખાતે પ્રાપ્ત કર્યું. સ્ત્રી અધ્યાપન મંદિર, સુણાવ ખાતેથી P.T.C.ની ડીગ્રી મેળવ્યા બાદ સરદાર વલ્લભભાઈ પટેલ હાઈસ્કૂલ, કરમસદમાંથી આપે ઉચ્ચતર માધ્યમિક શિક્ષણ મેળવ્યું.
ખેડા જિલ્લા શિક્ષણ સમિતિ, નડીઆદ હસ્તકની પ્રાથમિક શાળા રૂપારેલ તા. આણંદ ખાતે તા. ૦૯/૧૨/૧૯૮૬ ના રોજ પ્રાથમિક શિક્ષક તરીકેની સેવામાં આપ દાખલ થયાં. આપનાં લગ્ન જિલ્લા પંચાયત, નડીઆદ ખાતે ફરજો બજાવતા શ્રી રાજેશભાઈ જે. ચૌહાણ સાથે તારીખ ૨૭/૧૧/૧૯૯૨ના રોજ થયાં. પ્રભુના આશીર્વાદ થકી આપને બે સંતાનો; દીકરો ગુંજન અને દીકરી શ્રેયાની ભેટ મળી. દીકરા ગુંજને સિવિલ એન્જિનિયરિંગમાં અનુસ્નાતકની ડીગ્રી પ્રાપ્ત કરેલ છે અને શ્રેયાએ ગણિત મુખ્ય વિષય સાથે સ્નાતક અને અનુસ્નાતક બંને કક્ષાએ ગોલ્ડ મેડલ સાથે એમ.એસસી.ની ડીગ્રી પ્રાપ્ત કરેલ છે અને હાલ આપના બંને સંતાનો પીએચ. ડી. નો ઉચ્ચ અભ્યાસ કરી રહેલ છે…
રૂપારેલ ખાતે ઓગણીસ વર્ષની સેવાઓ બજાવ્યા બાદ માંગણી મુજબ બદલી કરાવી અત્રેની પ્રાથમિક શાળા હાડગુડ ખાતે તારીખ ૧૬/૦૬/૨૦૦૫ના રોજ આપ હાજર થયાં. સમગ્ર ફરજો દરમ્યાન આપે શાળાને માત્ર નોકરીનું સ્થળ નહિ પણ એક પ્રભુમંદિરનાં સ્વરૂપે ગણી, શાળા તથા શાળાનાં બાળકોના વિકાસમાં તન, મન અને ધનથી બહુમૂલ્ય યોગદાન આપી, પૂરેપૂરી કર્તવ્યનિષ્ઠા, પ્રતિબદ્ધતા ને પ્રામાણિકતાથી, આપની ફરજો સુપેરે બજાવી છે.
આપે કોઈપણ ધોરણ હોય કે કોઈપણ વિષય, સાહજિક કુશળતાથી જે તે વર્ગનાં બાળકોને ભણાવ્યાં છે. પ્રાથમિક શિક્ષક તરીકેની ૩૮ વર્ષની સુદીર્ઘ સેવાઓ થકી અનેક બાળકોને પ્રેમ, લાગણી, હૂંફ અને સહાનુભૂતિ આપી, બાળકોની સાથે બાળક જેવાં બની જઈને મૂલ્યલક્ષી શિક્ષણની સાથે સાથે જીવનઘડતર માટેના ઉત્તમ સંસ્કારો પીરસી તેમના ભણતરનો પાયો આપે મજબૂત બનાવ્યો છે અને તેમનાં હૃદયમાં એક અમીટ છાપ અંકિત કરી છે.
કોઈપણ કાર્ય, પછી તે શૈક્ષણિક હોય, સાંસ્કૃતિક હોય કે વિવિધ સહઅભ્યાસિક પ્રવૃત્તિઓ હોય, આપને સોંપવામાં આવેલ દરેક કામગીરી આપે હકારાત્મક અભિગમ દાખવી સદા સહર્ષ સ્વીકારી છે અને પૂરેપૂરાં સમર્પણભાવ અને સંપૂર્ણ પ્રતિબદ્ધતા સાથે તે ઉત્તમ રીતે પૂર્ણ કરી છે. આપ વિશાળ જ્ઞાન અને ઘણીબધી આવડત ધરાવતા હોવા છતાં સદાય નમ્ર બનીને, કોઈપણ કામથી કંટાળ્યા વિના, નવું શીખવાની ધગશ રાખી, શાળાની પ્રગતિમાં આપનું અમૂલ્ય યોગદાન આપી, જ્ઞાનયોગ સાથે કર્મયોગના સમન્વય થકી ભક્તિમાર્ગ પર સતત કાર્યશીલ રહી, 'કર્મ એ જ ધર્મ' સૂત્રને આપે ચરિતાર્થ કરી બતાવ્યું છે. વળી, શાળાને પોતાનો પરિવાર માની, સમગ્ર શાળાપરિવાર સાથે આત્મીયતાનો નાતો બાંધી સાથી શિક્ષકગણ માટે પણ આપ પથદર્શક, પ્રેરણામૂર્તિ અને ખરા અર્થમાં બધાનાં હમદર્દ બની રહ્યાં છો. નિયમિતતા, ઉદારતા, લાગણીશીલતા, શિક્ષણ પ્રત્યે સંપૂર્ણ સમર્પણભાવ, સરળ ને સાદું પ્રેરણાદાયી વ્યક્તિત્વ જેવાં અનેક ગુણો આપનામાંથી અમે શીખ્યાં છીએ.
આદરણીય નિર્મળાબેન, આજે શાળાપરિવારમાંથી આપ વયનિવૃત્તિના કારણે વિદાય લઈ રહ્યાં છો ત્યારે એક સેવાભાવી, કર્મનિષ્ઠ, ઉદાર, સહૃદયી, મિલનસાર, સંનિષ્ઠ અને બાળકોના અતિપ્રિય એવાં આપની ખોટ અમને બધાંને સદા સાલશે. આપનો લાગણીભીનો સ્વભાવ અને અમારી સાથેના આત્મીયતાભર્યા સંબંધો અમને સદા યાદ આવશે.
પરમેશ્વર આપ તથા આપના પરિવાર ઉપર સદા અખૂટ કૃપાઓ વરસાવતા રહે એવી પ્રાર્થના અને નિરામય દીર્ઘાયુ સાથે પરિવારને સંગે શાંતિ, આનંદ અને પ્રવૃત્તિમય જીવન વ્યતીત કરો એવી અમારી અંતરની અભ્યર્થના.

સ્થળ:- P M Shri પ્રાથમિક શાળા
હાડગુડ તા. જિ. આણંદ
તારીખ:- 05/૦૪/૨૦૨૫
We will always miss you...
લિ. અમો છીએ આપના ઋણાનુરાગી
શાળા અને એસ.એમ.સી. પરિવાર તેમજ ગ્રામજનો
P M Shri પ્રાથમિક શાળા હાડગુડ