Aa Meda Jaaniyan Aa Meday Des Wich Jahangir Mukhlis Sad Romantic Emotional Saraiki Poetry Nazam

Описание: Aa Meda Jaaniyan Aa Meday Des Wich Most Sad Romantic Emotional Top Trending Super Hit Saraiki Shairy Nazam Whatsapp Status 2023
Poet: Jahangir Mukhlis

آ میڈا جانیاں آ میڈے دیس وچ

آ تے ڈیکھیں جو دردیں دی سولی اتے
لوک چڑھدن کیویں لوک لہندن کیویں.
پتھریں دے بنڑے ہوۓ گھریں دے اندر
ریشمی جسم ڈکھیں کوں سہندن کیویں.
مونجھیں کونجیں دے وانگوں چدھاروں پھرن
شام تھیوے تاں کندھیاں تے بہندن کیویں.
رات بے سئیت لوکاں دے گھر دے وچوں
ویݨ در دے ولیکھیں توں آندن کیویں.

آ میڈا جانیاں آ میڈے دیس وچ

آتے ڈیکھیں جو دردیں دی درسال تے
ایں حیاتی کوں کیویں روایا ویندے.
اپنڑیں اکھیں دے ہنجواں کوں پالنڑ کیتے
بے وسی کوں وسیلہ بنڑایا ویندے.
اتھ تاں معصوم دے ہونٹ سیتے ویندین
اوندے جذبیں کوں سولی چڑھایا ویندے
عید دی رات ہے توڑیں شب رات ہے
دڑکے ڈے ڈے کے اوکوں سمایا ویندے.

آمیڈا جانیاں آمیڈے دیس وچ

آ تے ڈیکھیں جو جمدے ہوئے بال کوں
سول صدمے ملن ساہ سانگاں ملن.
گھٹی ڈکھاں دی اوکوں پلائی ونجے
اوندے کنیں دے وچ بکھ دیاں بانگاں ملن.
اور دھیریں جمدن تاں ما پیو کوں جھورا ملے
سیندھ سرمے ملن نہ کوئی مانگھاں ملن
چاندی کھنڈدی ونجے اوندے سر دے اتے
سیجھ رنگلی کیتے صرف تانگھاں ملن.

آ میڈا جانیاں آ میڈے دیس وچ...

آ تے ڈیکھیں جو پڑ تے پئی بار ہے
لوک آندے کھڑن اپنڑیں لانڑھیں کیتے
بار ڈے تے بھوتاریں دے لیکھے کیتم
کوئی گھلیندا ریہا میکوں تھانڑیں کیتے.
میڈے گندھڑے کلہوٹیاں وی واندیاں کھڑین
بال روندے ریہے شۓ دے دانڑیں کیتے.
سال پورے دا پورھیا ایویں رل گیا
بھوں وی بچ نہ سگیا میکوں بھانڑے کیتے.

آ میڈا جانیاں آمیڈے دیس وچ

آ تے ڈیکھیں جو حاکم دے ہرکار اتھ
اوندا لکھیا ہے پڑھ پڑھ سنڑیندے ودن .
جنھاں اکھیں کوں خوابیں دی عادت پئی
انہاں اکھیں کوں اندھا کریندے ودن.
اور جیہرے ہتھ ہن جو سچ کوڑ لکھدے ریہے
انھاں ہتھاں کوں بہاں تئیں کپیندے ودن.
جنھیں ہونٹیں تے لفظیں ٹھکانہ کیتے
انھاں ہونٹاں توں ہر لفظ چیندے ودن

آ میڈا جانیاں آ میڈے دیس وچ

آ میڈا جانیاں آ میڈے دیس وچ.

جہانگیر مخلص

#jahangirmukhlis
#jahangirmukhlispoetry
#Saraiki #saraikidhoray #saraikidohra #saraikishayari #saraikipoetry #saraikilove #saraiki__status #saraikistatus #saraikishayiri #saraikishairy #shayari #poetry #poetrystatus #saraikiculture #sraiki #seraiki #seraiki_lover #poet #shyari #zia_xia #saraikinazam