ប្រយ័ត្នមានបញ្ហាក្រោយពេលទិញរួច នេះជាសំនួរទាំង៥ ដែលលោកអ្នកគួរសួរទៅម្ចាស់ផ្ទះមុននឹងសម្រេចចិត្តដកលុយទិញ

Описание: ប្រយ័ត្នមានបញ្ហាក្រោយពេលទិញរួច! នេះជាសំនួរទាំង៥ ដែលលោកអ្នកគួរសួរទៅម្ចាស់ផ្ទះមុននឹងសម្រេចចិត្តដកលុយទិញ

ផ្ទះគឺជារបស់ដែលសំខាន់បំផុត ដែលមនុស្សគ្រប់គ្នាប្រាថ្នាចង់បាន ដើម្បីក៏សាងគ្រួសារមួយដ៏មានសុភមង្គល រស់នៅសុខស្រួល។ មនុស្សជាច្រើនខិតខំធ្វើការរកលុយដើម្បីទិញផ្ទះ ប៉ុន្តែមុននឹងលោកអ្នកសម្រេចចិត្តទិញផ្ទះ លោកអ្នកគួរតែយល់ដឹងឲ្យបានច្បាស់ពីចំណុចជាច្រើន ក៏ដូចសួរសំណួរមួយចំនួនទៅកាន់ម្ចាស់ផ្ទះផងដែរ។

យោងតាមការដកស្រង់ចេញពីគេហទំព័ The Seattle Time បានបង្ហាញពីសំណួរទាំង៥ ដែលលោកអ្នកគួរសួរទៅម្ចាស់គម្រោងឬម្ចាស់ផ្ទះនៅពេលទៅទិញផ្ទះទាំងនោះ៖

១. តើហេតុអ្វីបានជាដាក់លក់ផ្ទះ?

មានហេតុផលជាច្រើនដែលគេដាក់លក់ផ្ទះ ដូចជា ទៅនៅផ្ទះថ្មី ប្តូរកន្លែងធ្វើការ តម្រូវការប្រាក់បន្ទាន់ ចូលនិវត្តន៍។ ទោះជាវាអាចមិនពិត តែការសួរដឹងពីមូលហេតុអាចជួយលោកអ្នកដើម្បីចរចាថ្លៃផ្ទះបាន។ អាស្រ័យលើមូលហេតុនៃការលក់ផ្ទះ អ្នកលក់ប្រហែលជាអាចទទួលយកនូវតម្លៃទាបជាងមុន។ យ៉ាងណាមិញហើយបើអ្នកលក់មិនសូវប្រញាប់លក់ចេញទេ នោះការចរចាក៏រាងពិបាកទៅតាមភាពជាក់ស្ដែង។

២.តើផ្ទះដាក់លក់លើទីផ្សារក្នុងរយ:ពេលយូរប៉ុណ្ណាហើយ?

មូលហេតុចម្បងមួយដែលផ្ទះត្រូវបានដាក់លក់លើទីផ្សារយូរ គឺអាចចាប់ផ្តើមពីការដាក់តម្លៃថ្លៃលក់ខ្ពស់ពេក។ កាលណាផ្ទះដាក់លក់កាន់តែយូរ ប្រហែលជាវាពិបាកក្នុងការលក់ចេញ។​ ហើយអ្នកទិញអាចគិតថាមានអ្វីមិនប្រក្រតីជាមួយអចលនទ្រព្យ។ ហេតុនេះបើសិនជាផ្ទះនេះដាក់លក់យូរហើយ វាពិតជាជម្រុញចិត្តឲ្យអ្នកលក់ហ៊ានចរចាថ្លៃដើម្បីឆាប់បានលក់ចេញ។

៣ . តើផ្ទះពីមុនទិញមកក្នុងតម្លៃប៉ុន្មាន?

ការដឹងតម្លៃលក់ពីមុនអាចផ្ដល់ប្រយោជន៍ចំនួនពីររឿងសំខាន់ៗ។ ទីមួយ អ្នកអាចដឹងថាតម្លៃទីផ្សារបានឡើងនិងចុះដូចម្ដេចចាប់តាំងពីម្ចាស់ផ្ទះបានទិញផ្ទះដំបូង។ ទីពីរអ្នកអាចដឹងពីកម្រិតដែលអ្នកលក់អាចមានឱកាសក្នុងការបញ្ចុះតម្លៃ។ ឧទាហរណ៍ បើសិនជាអ្នកលក់ធ្លាប់ទិញផ្ទះនៅតម្លៃដែលកំពុងធូរថ្លៃខ្លាំង នោះអ្នកអាចដាក់តម្លៃទិញដែលអ្នកលក់ក៏អាចចំណេញច្រើន ហើយយើងក៏មានលទ្ធភាពក្នុងការទិញ។ ប៉ុន្តែបើផ្ទះពីមុនទិញមកក្នុងតម្លៃដែលប្រហាក់ប្រហែលនឹងតម្លៃលក់បច្ចុប្បន្ន នោះប្រហែលជាអ្នកលក់មិនអាចចរចាតម្លៃបញ្ចុះច្រើននោះទេ។ បើក្នុងករណីដែលអ្នកលក់មិនប្រាប់តម្លៃឬអ្នកមិនសូវជឿជាក់ អ្នកអាចទៅតាមដានពីឯកសារចាស់ៗនៃតម្លៃអចលនទ្រព្យដែលស្រដៀងៗគ្នាក្នុងតំបន់នោះបាន។

៤.តើអ្វីជាលក្ខណ:ពិសេសរបស់ផ្ទះ?

សំណួរនេះគឺអ្នកយកទៅសួរម្ចាស់ផ្ទះដើម្បីឲ្យពួកគេអាចបញ្ចេញលក្ខណ:ពិសេសរបស់ផ្ទះដែលបានរស់នៅកន្លងមក។ ឧទាហរណ៍ថា៖ ផ្ទះស្ថិតនៅតំបន់ដែលមានអ្នកជិតខាងរួសរាយរាក់ទាក់ ឬមានទេសភាពថ្ងៃលិចដ៏ស្រស់ស្អាត មានពន្លឺចេញចូលល្អ មានដើមឈើផ្ដល់ក្លិនក្រអូប។ល។ ការធ្វើបែបនេះអ្នកអាចនឹងអាចនឹងងាយស្រួលក្នុងការទទួលបានលក្ខណ:ពិសេសទាំងនោះដូចគ្នា។

៥.តើផ្នែកផ្សេងៗនៃផ្ទះមានអាយុកាលប៉ុន្មាន?

ចូរធ្វើការសាកសួរពីអាយុកាល និងស្ថានភាពនៃសមាសភាគសំខាន់ៗក្នុងផ្ទះ។ ជាក់ស្ដែងអ្នកអាចចាប់ផ្ដើមសួរពីដំបូល។ តាមធម្មតាដំបូលដែលថ្មីអាចនៅធុនបានពី ១៥ ទៅ ៥០ឆ្នាំអាស្រ័យលើធាតុផ្សំរបស់ដំបូល។ ដូចនេះបើដំបូលមានអាយុកាលលើសពីនេះ គឺអ្នកត្រូវសាងសង់បំពាក់ដំបូលថ្មីហើយ។ ក្រៅពីនេះអ្នកក៏ត្រូវសួរអាយុកាលរបស់ប្រព័ន្ធអគ្គិសនី ទុយោទឹក បរិក្ខាផ្សេងៗផងដែរ៕​

ដោយ៖ ឌឿក ស្រី​ នុត