IJQKD katta tezkor vakili qo‘lga olindi: Jizzaxda 85 mln so‘mlik firibgarlik fosh etildi

Описание: ☄️ IJQKD katta tezkor vakiliga nisbatan jinoyat ishi qo‘zg‘atildi
🔴 Mamlakatning taraqqiy topishida, barcha sohalarning izchil rivojlanishida – bilimli kadrlar ta’minoti asosiy omil hisoblanadi.

Ayni shu ma’noda so‘nggi yillarda davlatimiz Rahbari tomonidan ta’lim sohasiga alohida e’tibor qaratilib, bugun maktabgacha ta’limdan tortib, oliy ta’limgacha bo‘lgan tizim tubdan isloh qilinmoqda.

Buning natijasini esa respublikamizning turli hududlarida qad rostlayotgan zamonaviy bog‘cha va maktablar qiyofasida, yangi ilg‘or o‘quv dasturlarining ta’lim jarayonlariga tadbiq etilishida, xalqaro olimpiadalarda g‘oliblikni qo‘lga kiritayotgan o‘zbek yoshlari yoki dunyoning top oliy ta’lim muassasalarida o‘qiyotgan yigit-qizlarimiz misolida ko‘rishimiz mumkin.

Ta’kidlash lozimki, Prezidentimizning 2025 yil 26 dekabr kuni Oliy Majlis va O‘zbekiston xalqiga yo‘llagan Murojaatnomasida ham ta’lim sohasini yanada rivojlantirish eng ustuvor vazifalardan biri sifatida o‘rin egallaganligi bejiz emas.

Ammo, inson qadri ulug‘lanayotgan yurtimizda xalq manfaatidan o‘z xalqumini ustun qo‘ygan ayrim mansabdorlarning islohotlar jarayonlariga to‘g‘anoq bo‘layotganliklari achchiq haqiqat.
❗️Jumladan, Iqtisodiy jinoyatlarga qarshi kurashish departamentining Jizzax viloyati boshqarmasi Paxtakor tuman bo‘limi katta tezkor vakili shaxsiy boylik orttirish maqsadida o‘zining 1989 y.t., muqaddam sudlangan tanishi bilan til biriktirib, texnika ta’minoti bilan shug‘ullanuvchi MCHJ ish boshqaruvchisining ishonchiga kirishadi.

Ya’ni, mazkur MCHJ bilan Jizzax shahar Maktabgacha va maktab ta’limi bo‘limi o‘rtasida 20 dona interaktiv doskalarning oldi-sotti shartnomasini elektron do‘kon orqali tuzilishida g‘oliblikni qo‘lga kiritib, doskalarni qimmat narxda o‘tkazib berishni va’da qilishadi.

Ular o‘zlarining qo‘shtirnoq ichidagi xolis xizmatlari evaziga MCHJ ish boshqaruvchisidan 85 mln. so‘m talab qilishadi.

Aniqlanishicha, Departamentning katta tezkor vakili xizmat mavqeidan foydalangan holda, Jizzax shahar Maktabgacha va maktab ta’limi bo‘limiga asl narxi 15,2 mln so‘m bo‘lgan interaktiv doskalarni 25 mln so‘mdan o‘tkazib bermoqchi bo‘lgan.
⛔️ Davlat xavfsizlik xizmati xodimlari tomonidan prokuratura organlari bilan hamkorlikda o‘tkazilgan tezkor tadbirda dastlab 1989 y.t. fuqaro 85 mln so‘mni olgan vaqtida ushlandi.
So‘ngra tezkor tadbir davom ettirilib, undan 30 mln so‘mni Departament xodimi o‘zining yana bir hamtavog‘i bo‘lgan – maktab direktori bilan birgalikda, o‘z yashash xonadoni oldida olgan vaqtida ashyoviy dalillar bilan ushlandi.
⚖️ Holat yuzasidan Jizzax viloyati prokuraturasi tomonidan qonunbuzarlarga nisbatan Jinoyat Kodeksining 168-moddasi bilan jinoyat ishi qo‘zg‘atilib, IJQKD Paxtakor tuman bo‘limi katta tezkor vakili va maktab direktoriga nisbatan “qamoq” ehtiyot chorasi qo‘llanildi.

Hozirda tergov harakatlari olib borilmoqda.
🏪 Hurmatli fuqarolar kundalik hayotda bu kabi qonunbuzilish holatlariga duch kelsangiz Davlat xavfsizlik xizmatining 1520 qisqa raqamiga qo‘ng‘iroq qiling. Shaxsingizning sir saqlanishi kafolatlanadi.

🛡 t.me/xavfsizlik_uz