Музей апаның мерейлі жасы!

Описание: Жайық өңірінің шежірелі тарихын түгендеуге бар ғұмырын арнаған, Қазақстанның еңбек сіңірген қайраткері, Батыс Қазақстан облыстық тарихи-өлкетану музейінің қалыптасуы мен дамуына өлшеусіз үлес қосқан ардақты тұлға — Танабаева Сара Есқайырқызы бүгін мерейлі 85 жасқа толды. Осы айтулы датаға орай музей қабырғасында тағылымы мол, мазмұны терең кездесу өтті.
Музейдің кіші ғылыми қызметкерінен бастап, басшылық қызметке дейінгі саналы да салиқалы жолдан өткен Сара апамыз музей саласына 45 жыл ғұмырын арнады. Бұл — бір ғана мекеменің емес, тұтас бір өңірдің тарихи жадының қалыптасуына қосылған зор үлес. Оның музей ісіне деген шексіз жанашырлығы, жоғары жауапкершілігі, еңбекқорлығы мен туған жерге, ұлттық құндылықтарға деген айрықша сүйіспеншілігі — бүгінгі жас буын үшін нағыз үлгі-өнеге.
Бүгінгі кеш — өнегелі өмір жолына тағзым етіп, тағылымды естеліктерге толы сырлы сәттерге арнаулы болды. Сара апамыздың жүрекке жетер әңгімелері, музей ісінің қыр-сыры туралы ой-толғамдары көпшілікке ерекше әсер сыйлады.
Күннің бірінші жартысында музей ұжымымен шығармашылық кездесу өтіп, түсте ақ дастархан басында бас қосылды. Ал түстен кейін мерейтой иесі облыс әкімі Нариман Төреғалиұлының қабылдауында болды. Аймақ басшысы музей саласының ардагерін мерейлі жасымен құттықтап, өлке тарихына қатысты құнды жәдігерлерді жинақтау, сақтау және зерттеу бағытындағы ерен еңбегі үшін ризашылығын білдірді. Сонымен қатар мәдениет саласында атқарылып жатқан маңызды істер таныстырылып, өзара мазмұнды пікір алмасу өтті.
Бұл күн — тарихқа адал қызмет етудің, туған өлкені шексіз сүюдің жарқын үлгісіне айналған ардақты жанға көрсетілген лайықты құрметтің белгісі болды.