TAGI KILISITIANO * katiko * Valota VAHAI SOSAIA 2020

Описание: 1/ Tagi, kilisitiano,
Tagi mo ke manatu
Ki te ta'ata'a tapu
Na liligi e Sesu.
Tagi ke maligi lahi
Si'ou lo'i mata,
Ke maligi fakatahi
Mo te toto o Sesu.


2/ Tagi mo ke manatu'i
Si'ona puluhia,
Ne'e puluhia ia
Kote'uhi ko koe.
Manatu pea ke ofa,
Pea ke agatonu,
O fia mate mo koe,
Kote'uhi ko ia.


3/ Na fuafua mamahi
I fuga Oliveto,
Ne'e aho ia ai
Si'ana faikole.
Kole ki tana Tamai
Ke finegalo ofa,
O pule kia te ia
Kae tou ma'uli.


4/ Faiga tana kolega,
Mo te tafusi ake
Ko Sutasi mala'ia
Mo te kau fakapo.
Vaka'i te agakovi
E oho o fekita,
Ke faka'iloga ai
Te Aliki, ke ha'i.


5/ Sesu, ko toku Aliki,
Si'oku ofa atu,
I tau tali lelei
Te pule a te fili !
E si'i tau kataki
Ki te malama lohi,
E gutu malie mai
Kae loto fakapo !


6/ Pea ha'i, pea toho,
I te fakapo'uli,
Toho ki Selusalemi
Ki te kau Aliki.
Aselo ke ke ta'ofi
Te kau mala'ia,
Ke faka'apa'apa la,
He ko si'i Mesia.


7/ Hoko ki Selusalemi
Ki te fale o Ana,
Pea aho ia ai
Si'ona manavahe
Oie ! Toku mamahi !
Kua tuki mo amu,
Kua nuki mo a'anu
Ki te Aliki tapu.


8/ Asili tona mamahi
Ko tona tokotahi,
Kua loto vaivai
Ona kaiga fuli.
Kua mumuli mama'o,
I si'i manavasi'i,
Pea fakafisi leva
Ki tonatou Tu'i.


9/ Pogipogi ake leva,
I te felia'ono,
Pea hiki te fagona,
Taki kia Pilato.
Ne'e mole pau ia
Ke tamate tofu pe,
Pea fekau ke taki
Mo ô kia Helote.


10/ Osi tona manavahe,
Pea kapu ke alu,
Ke fa'ifa'italiha
E Posio Pilato.
Fokifa kua kalaga
Te haha'i fua pe,
Ke kolusifiko ia,
Kolusifiko ia.


11/ Pea hoki tuku age
E Posio Pilato,
Ke faifaitaliha
Te haha'i fakapo.
Pea hoki oho age
O puke mo hamusi,
Pea ha'i i te pou
Tonatou Aliki.


12/ Sesu, si'oku mamahi
I tou sino tapu !
Kua motumotu ia
Ko taku agahala,
Pe'i ta'ofi, fakapo,
Ta'ofi, he ko Sesu,
Ko tou Aliki ia
E ke haha feia.


13/ Tuku ifo ia Sesu,
Pea to ki te kele,
O mapelu vaivai
Si'ona sino tapu.
Pea hamu ake ia
Pea fakava aki
Te puloga talatala
Ki si'ona fofoga.


14/ Sesu, toku ufiufi
I taku agakovi !
Ko te me'anoa au,
Ko te Aliki koe.
Pea e ia te koe,
Te mamahi fua pe,
Kae au tuli au
Kau fimalie pe.


15/ Pea kapu ia Sesu
Ke amo te koluse,
Amo ki Kalevalio,
Ke puluhia ai.
Sesu, si'oku mamahi
I tou vaivai
Ke ke fua tokotahi
Te akau mamafa !


16/ Totolo mo fetoka'i
I tona vaivai,
Pea ha'u te haha'i
O hamu ke ha'ele.
He me'a fakamamahi
Si'ona helahela
Kae na'ina'i ta'i
Ki tona sino tapu !


17/ Hoko ki Kalevalio,
Pea fakatakoto
Ki te koluse, ke tuki
Si'ona takafalu.
Pea fakatu'u leva
Te akau mo Sesu,
Pea hoki puluhia
Si'i Aliki ofa.


18/ Pea puluhia ia
Pea faka'iloga
E hage e fatagihi
Te malama katoa.
Fokifa kua galulu
Te fenua fua pe,
O fetoka'i ki lalo,
Te haha'i fakapo.


19/ Sesu, ko toku Aliki,
Aliki aga'ofa,
E ke puluhia koe
Kote'uhi ko au.
Sesu, ke ke tuku mai
He loto manu'ia,
Ke au mate mo au
Kote'uhi ko koe.


20/ Io, ke ke tuku mai
Kau fua mo koe
Te koluse i malama,
I te aho fua pe.
Kau muli ia koe
I te malama kovi,
Kau hoko atu ai
Ki Selo e lelei.


Tou hufaki'i =


Te kaiga i pulekatolio


Te faimahaki o te toe ma'imo'a e tau 8 ko Soane Vaea


Te fafine mahaki e fakalogo kite greffe


Te matua kua mahamahaki mo Cancer