આંગણવાડી બહેનોના પડતર પ્રશ્નો મુદ્દે દેશવ્યાપી હડતાલને સમર્થન: વર્ગ-૩ અને ૪ માં સમાવેશ કરવા સહિતની૧૧

Описание: આંગણવાડી બહેનોના પડતર પ્રશ્નો મુદ્દે દેશવ્યાપી હડતાલને સમર્થન: વર્ગ-૩ અને ૪ માં સમાવેશ કરવા સહિતની ૧૧ માંગણીઓ સાથે પાટણ કલેકટરને આપ્યું આવેદન
હાઈકોર્ટના ચુકાદાનું પાલન કરી માનદ વેતનમાંથી મુક્તિ અને કાયમી નિમણૂકની માંગ
ખામીયુક્ત મોબાઈલ એપ્લિકેશનો અને વધારાની કામગીરીના બોજ સામે બહેનોનો ઉગ્ર આક્રોશ

આંગણવાડી કાર્યકર અને તેડાગર બહેનોના વર્ષો જૂના પડતર પ્રશ્નો અને નવી ઉભી થયેલી સમસ્યાઓ મુદ્દે દેશવ્યાપી હડતાલને સમર્થન આપવા માટે પાટણ જિલ્લાની આંગણવાડી બહેનો મેદાને આવી છે. વિવિધ હોદ્દેદારો અને સંગઠન દ્વારા સરકારને પોતાની ૧૧ મુખ્ય માંગણીઓ સંતોષવા માટે નમ્ર અરજ સાથે આક્રમક રજૂઆત કરવામાં આવી છે.
આંગણવાડી અને તેડાગર બહેનોની મુખ્ય માંગણીઓ માં નામદાર હાઈકોર્ટના ચુકાદાને માન આપી કાર્યકર અને તેડાગરોને માનદ વેતનમાંથી મુક્ત કરી વર્ગ-૩ અને વર્ગ-૪ માં સમાવેશ કરવો વર્ષ ૨૦૨૨ થી નવા મોબાઈલ આપવાની વાતો થાય છે પણ હજુ સુધી મળ્યા નથી. હાલની 'AVT' જેવી ખામીયુક્ત એપ્લિકેશનો બંધ કરી સારા મોબાઈલ આપવા અને ઓનલાઈન કામનો ભાર ઘટાડવો. તેડાગરમાંથી કાર્યકર અને કાર્યકરમાંથી મુખ્ય સેવિકામાં લાયકાત મુજબ બઢતી આપવી અને તેમાંથી વયમર્યાદા દૂર કરવી.વર્ષ ૨૦૨૨ માં સરકારે કરેલા મૌખિક વાયદા મુજબ વેતનમાં દર વર્ષે વધારો કરવો અને નિવૃત્તિ બાદ પેન્શનની સુવિધા આપવી. ગુજરાતમાં નિવૃત્તિ વય ૫૮ થી વધારી અન્ય રાજ્યોની જેમ ૬૦ કે ૬૫ કરવી.
હાઈકોર્ટના હુકમ મુજબ આઈ.સી.ડી.એસ. સિવાયની અન્ય કામગીરી (જેમ કે BLO) બહેનોને સોંપવી નહીં જેથી બાળકો અને માતાઓના સ્વાસ્થ્ય પર ધ્યાન આપી શકાય.
પરમાર મનીષાબેને જણાવ્યું છે કે આંગણવાડીમાં અપાતા મસાલા, ગોળ અને અનાજના ભાવ બજારમાં આસમાને છે, પરંતુ બીલ જૂના ભાવે ચૂકવાય છે જે વ્યાજબી નથી. ઉપરાંત, ગેસ સિલિન્ડરના નાણાં કાર્યકરે પોતાના ખિસ્સામાંથી ન રોકવા પડે તેવી વ્યવસ્થા તંત્ર દ્વારા જ કરવામાં આવે તેવી માંગ છે.
આ રજૂઆતમાં ઉપપ્રમુખ રેખાબેન જોષી, રીટાબેન ઠક્કર, મહામંત્રી મધુબેન રાવળ, સહમંત્રી ડિમ્પલબેન નાઈ સહિતના પદાધિકારીઓએ જણાવ્યું છે કે છેલ્લા ૫૦ વર્ષથી આંગણવાડી બહેનોએ પોલિયો નાબૂદી અને સખી મંડળ જેવા કામોમાં પાયાની ભૂમિકા ભજવી છે, છતાં તેમને કોઈ વિશેષ લાભ મળ્યા નથી. સરકાર જો આ પ્રશ્નોનું વહેલી તકે નિરાકરણ નહીં લાવે તો આગામી દિવસોમાં આંદોલન વધુ તેજ બનાવવાની ચીમકી ઉચ્ચારવામાં આવી છે.