ვლადიმირ ლენინი — რა არის საბჭოთა ხელისუფლება?

Описание: ვლადიმირ ლენინი

რა არის საბჭოთა ხელისუფლება?

სიტყვა, ჩაწერილი გრამაფონის ფირფიტაზე

წარმოთქმულია 1919 წლის მარტის დამლევს.

რა არის საბჭოთა ხელისუფლება? რა არის არსი ამ ახალი ხელისუფლებისა, რომლის გაგება არ სურთ ან ჯერ კიდევ არ შეუძლიათ უმრავლეს ქვეყნებში? მისი არსი, რომელიც სულ უფრო და უფრო მეტად იზიდავს ყოველი ქვეყნის მუშებს, გლეხებს და ყველა მშრომელებს ის არის, რომ წინათ სახელმწიფოს ასე თუ ისე მართავდნენ მდიდრები ანუ კაპიტალისტები, ახლა კი სახელმწიფოს პირველად მართავენ, ამასთან მასობრივი რაოდენობით, სწორედ ის კლასები, რომელთაც კაპიტალიზმი ჩაგრავდა. თვით ყველაზე დემოკრატიულ, თვით ყველაზე თავისუფალ რესპუბლიკაში, ვიდრე კაპიტალის ბატონობა რჩება, ვიდრე მიწა კერძო საკუთრებად რჩება, სახელმწიფოს ყოველთვის მართავენ უმნიშვნელო უმცირესობა, რომლის ცხრა მეათედი კაპიტალისტებიდან ანუ მდიდრებიდან არის გამოსული. სახელმწიფო ხელისუფლება ჩვენში, რუსეთში, პირველად არის მსოფლიოში იმგვარად აგებული, რომ მხოლოდ მუშები, მხოლოდ გლეხები და ყველა მშრომელი ექსპლოატატორების გამოკლებით, შეადგენენ მასობრივ ორგანიზაციებს — საბჭოებს, და ამ საბჭოებს აქვს გადაცემული მთელი სახელმწიფო ძალაუფლება. აი რატომაა, რომ თუმცა ბურჟუაზიის წარმომადგენლები ყველა ქვეყანაში ცილს სწამებენ რუსეთს, მაგრამ ყველგან მსოფლიოში სიტყვა «საბჭო» არათუ გასაგები გახდა, არამედ გახდა პოპულარული, საყვარელი, მუშებისათვის, გლეხებისათვის და ყველა მშრომელისათვის. და აი ამიტომ საბჭოთა ხელისუფლება, როგორც არ უნდა სდევნიდნენ კომუნიზმის მომხრეებს სხვადასხვა ქვეყანაში, საბჭოთა ხელისუფლება გარდუვალად, აუცილებლად და ახლო მომავალში მთელ მსოფლიოში გაიმარჯვებს. ჩვენ კარგად ვიცით, რომ ჯერ კიდევ ბევრი ნაკლი გვაქვს საბჭოთა ხელისუფლების ორგანიზაციის საქმეში. საბჭოთა ხელისუფლება სასწაულებრივი თილისმა როდია. ის ერთბაშად როდი ჰკურნავს წარსულის ნაკლოვანებათაგან, უცოდინარობისაგან, უკულტურობისაგან, მხეცური ომის მემკვიდრეობისაგან. მძარცველური კაპიტალიზმის მემკვიდრეობისაგან. მაგრამ სამაგიეროდ ის სოციალიზმზე გადასვლის შესაძლებლობას იძლევა. ის შესაძლებლობას აძლევს იმათ, ვისაც ჩაგრავდნენ, ამაღლდნენ და თვითვე სულ უფრო და უფრო აიღონ ხელში სახელმწიფოს მთელი მართვა-გამგეობა, მეურნეობის მთელი მართვა-გამგეობა, წარმოების მთელი მართვა-გამგეობა. საბჭოთა ხელისუფლება ეს არის მუშების, გლეხების და ყველა მშრომელი მასების მიერ ნახული გზა სოციალიზმისაკენ და ამიტომ — უტყუარი და ამიტომ — უძლეველი გზაა.


გამოიწერეთ ჩვენი ფეისბუქის გვერდი:
https://www.facebook.com/profile.php?...



#ლენინი