عديت رجم العنا الشاعر مبارك بن شريم

Описание: قصيدة الشاعر
مبارك بن شريم التويمي العازمي
رحمه آلله

مع بعض الصور التوضيحية لمعاني الكلمات


عديت رجم العنا لا سالت اركونه
رجم المشقين يا مرزوق واشقاني

ذكرني اللي بعيد الدار من دونه
يبيد الهجن بالممشى و الاقراني

ما ياصله كود تنبيلٍ يسوقونه
فرتٍ شرابه يصبونه من اقلاني

وقف على مركزٍ باصه يقصونه
واللي يسوقه مع الطاروق طرباني

توه جديدٍ من المركز يجيبونه
جابوه تهريب والا ماله اثماني

هو منوة اللي يبي جيران مضنونه
ياليتني فيه وانحر خدر الاعياني

أبو عيونٍ يهيل اللي يشوفونه
هو آدمي مير عينه عين شيهاني

اصبَّيَه اسود وحال الرمش من دونه
سودٍ هدبهن يشادي ريش ظلماني

و الوجه كنه ينظف له بصابونه
لو تلحقه شمس في المطراش ماشاني

أبو جديلٍ يبذ اللي يعملونه
يحوى على ورد ويمَشَّط بريحاني

واليا قعد في شليله طاحت قرونه
يشدي لصوغ الذهب في وسط دكاني

زاهٍ على جيب خلي واشقرٍ لونه
شقرٍ هدبهن يشادي وصف شرطاني

حديثه احلى من اللي تمطر مزونه
رجعٍ على نجع بدوٍ عقب مقطاني

هواه راكد وصافي النقع يروونه
يشدي حديث الحبيّب يوم لاقاني

والهرج في الناس ناسٍ ما يعرفونه
صاحين مير إنهم في الهرج خبلاني

اليا هرج هرجته تقول موزونه
ولا اوحيت هرجه تحلف إنه بميزاني

تكفون لا عاد طاري الزين تطرونه
تكفون لا عاد تطرونه على شاني

أحب طاري الغضي واللي يحبونه
وابغض عدو الغضي لو هو من اخواني

حبه عقلني عقال اللي يعقلونه
زودٍ على الحبل الاول جيب له ثاني

يا ناض كنه على جنبه يكزونه
معقله واحدٍ عليه زعلاني

خلوه عقب الصعابة تهمل عيونه
عقب العبث ما يثور الا بعمداني