မန္တလေးမှာ ၁၅ရက်အတွင်း လူငယ် ၁၂၀ ကျော် ပေါ်တာဆွဲ ဖမ်းဆီးခံရ၊

Описание: တေဇ/MFP ၊ ဒီဇင်ဘာ - ၁၇

မန္တလေးမြို့မှာ စစ်အုပ်စုက ပေါ်တာဆွဲ စစ်သားသစ် စုဆောင်းတာ၊ ပြန်ပေးဆွဲ ငွေညှစ်တာတွေ ဆက်တိုက် လုပ်နေပြီး နှစ်ပတ်အတွင်း မန္တလေးခရိုင် ခုနှစ်မြို့နယ်က လူငယ်လူရွယ် ၁၂၅ ဦး ပေါ်တာဆွဲ ဖမ်းဆီးခံ လိုက်ရပါတယ်။

ဒီဇင်ဘာလ ၁ရက်ကနေ ၁၅ရက်အတွင်း မန္တလေးမြို့၊ အောင်မြေသာစံမြို့နယ်မှာ ၂၁ဦး၊ ချမ်းအေးသာစံမြို့နယ်မှာ ခုနှစ်ဦး၊ မဟာအောင်မြေမြို့နယ်မှာ ငါးဦး၊ ချမ်းမြသာစည်မြို့နယ်မှာ ငါးဦး၊ ပြည်ကြီးတံခွန်မြို့နယ်မှာ ၃၆ ဦး၊ အမရပူရမြို့နယ်မှာ ၁၇ ဦးနဲ့ ပုသိမ်ကြီးမြို့နယ်မှာ ၃၄ ဦး ပေါ်တာဆွဲ စစ်သားသစ် စုဆောင်း ခံရတယ်လို့ မြေပြင် ကင်းထောက်တွေက ရရှိတဲ့ အချက်အလက်တွေကို စုဆောင်းပြီး မန္တလေးသပိတ် အင်အားစုက ထုတ်ပြန်တာပါ။

စစ်အုပ်စုဟာ ဆင်ခြေဖုံး ရပ်ကွက်တွေနဲ့ ဆင်း ရဲသား လက်လုပ်လက်စားတွေ နေထိုင်တဲ့ ရပ်ကွက်တွေကို အဓိက ပစ်မှတ်ထားကာ ဧည့်စာရင်းစစ်တာ၊ ပေါ်တာဆွဲတာ၊ ပြန်ပေးဆွဲတာတွေ လုပ်နေတာဖြစ်ပြီး ငွေနဲ့ မရွေးနိုင်သူတွေကို စစ်သားသစ် စုဆောင်းတယ်လို့ မြို့ခံတွေက ပြောပါတယ်။

နိုင်ငံတဝန်းက စစ်ပွဲတွေမှာ ရှုံးနိမ့်နေပြီး လူသားအရင်းအမြစ် လိုအပ်နေတဲ့ စစ်အုပ်စုက မန္တလေးမြို့ပေါ်မှာ စစ်မှုထမ်း ဥပဒေနဲ့ ဧည့်စာရင်း အကြောင်းပြကာ လူငယ်လူရွယ်တွေကို ပေါ်တာဆွဲ ဖမ်းဆီးနေတာကြောင့် မြို့ခံ လူငယ်‌တွေ အနေနဲ့ အထူးသတိထားကြဖို့နဲ့ စစ်အုပ်စု လက်ထဲ ပါမသွားစေရေး ကြိုတင်ပြင်ဆင် ထားကြဖို့ မန္တလေး သပိတ်အင်အားစုက တိုက်တွန်းပါတယ်။

MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
#Mandalay_Free_Press_MFP