განმუხურში გაყიდული ტერიტორიის მფლობელი კომპანია „ბლექ სი რივიერია“

Описание: გუშინ ჩატარებული ელექტრონული აუქციონის შედეგად განმუხურის სანაპირო ზოლის, ბულვარის მიმდებარედ არსებული 33 951 კვადრატული მეტრი მიწის ნაკვეთის და მასზე არსებული მშენობა-ნაგებობების მფლობელი გამოვლინდა. კომპანია „ბლექ სი რივერამ“ ეკონომიკისა და მდგრადი განვითარების სამინისტროს სახელმწიფო ქონების ეროვნული სააგენტოს მიერ გამოცხადებულ პირობებიან აუქციონში გაიმარჯვა. ტერიტორიაში კომპანია 2 266 500 ლარს გადაიხდის და ვალდებულების თანახმად მინიმუმ 120 ნომრიან სასტუმრო კომპლექსს ააშენებს, რომელიც ღია და დახურული საცურაო აუზებით, სპორტული მოედნებით და ჩოგბურთის კორტებით იქნება აღჭურვილი. პროექტის განხორციელება კი 60 თვის ვადაში უნდა მოხდეს. განმუხურის მაცხოვრებლები მიიჩნევენ, რომ სანაპირო ზოლის რეალური მყიდველი საქართველოს ყოფილი პრემიერ-მინისტრი ბიძინა ივანიშვილია. მათი განცხადებით, ტერიტორიის გაყიდვის შემდეგ ადგილობრივებს სანაპიროზე თავისუფლად გადაადგილება შეეზღუდებათ.ადგილობრივი მოსახლეობა ამბობს, რომ სანაპიროს მიმდებარედ აუთვისებელი ტერიტორიაა და ხელისუფლებას სწორედ ამ ადგილით დაინტერესებას ურჩევს.გასხვისებული ტერიტორიების შესახებ კომენტარი ოპოზიციაშიც გაკეთდა. ნაციონალური მოზრაობა პირველი იყო, რომელმაც აღნიშნულ საკითხთან დაკავშირებით საზოგადოებას ბრიფინგის საშუალებით ამცნო. თენგიზ გუნავას განცხადებით, განმუხურის სანაპიროს ტერიტორიით ბიძინა ივანიშვილია დაინტერესებული და აუქციონიც სწორედ მასზე იყო მორგებული.განმუხურის სანაპირო ზოლის და ბულვარის მიმდებარე ტერიტორიის გაყიდვის მცდელობას ადგილობრივი მოსახლეობის პროტესტი მოჰყვა. ისინი რამდენჯერმე იმ ტერიტორიაზე შეიკრიბნენ, რომელიც გუშინ ელექტრონული აუქციონის წესით გაიყიდა. მოსახლეობა მიიჩნევს, სანაპირო ზოლი არ უნდა იყიდებოდეს.