برسٹل میں ایران کے خلاف جاری جنگ کے خلاف ایک پُرامن احتجاجی مظاہرے کا انعقاد کیا جا رہا ہے۔

Описание: اتوار 8 تاریخ کو دوپہر 2 بجے برسٹل میں ایران کے خلاف جاری جنگ کے خلاف ایک پُرامن احتجاجی مظاہرے کا انعقاد کیا جا رہا ہے۔ یہ مظاہرہ انصاف، انسانیت اور امن کے حق میں ایک مضبوط آواز ہے۔ ہمارا مطالبہ واضح ہے: جنگ بند کی جائے اور بے گناہ جانوں کا تحفظ یقینی بنایا جائے۔

اسی سلسلے میں آج انٹرنیشنل ہیومن رائٹس موومنٹ کی قیادت نے برسٹل میں بھرپور عوامی آگاہی مہم کا آغاز کیا۔ اس مہم میں انٹرنیشنل ہیومن رائٹس موومنٹ کے یوکے کے صدر ندیم عارف بٹ، برسٹل کے صدر سعید ملک، چیئرمین ساؤتھ ویلز واہید فقیر، ایگزیکٹو ڈائریکٹر عارف خان اور مرکزی چیئرمین رانا بشارت علی خان نے شرکت کی۔

اسٹیپلٹن روڈ، ایسٹن برسٹل سمیت شہر کے اہم مقامات پر ہزاروں کی تعداد میں لیفلیٹس تقسیم کیے گئے۔ ریلوے اسٹیشن، بس اسٹیشن، سٹی سینٹر، ایسٹن کی مساجد، گرین بینک مسجد، حضرت بلال مسجد اور برسٹل کی دیگر مساجد اور عوامی مقامات پر مختلف کمیونٹیز کے سرکردہ رہنماؤں سے ملاقات کی گئی اور انہیں اتوار کے احتجاج میں شرکت کی دعوت دی گئی۔

یہ احتجاج کسی سیاسی مفاد کے لیے نہیں بلکہ انسانیت کے لیے ہے۔ جنگ ہمیشہ معصوم جانوں کو متاثر کرتی ہے، خاندانوں کو برباد کرتی ہے اور معاشروں میں نفرت کو جنم دیتی ہے۔ ہم اس ظلم کے خلاف خاموش نہیں رہ سکتے۔

انٹرنیشنل ہیومن رائٹس موومنٹ کی جدوجہد کی ایک مضبوط تاریخ ہے۔ 2023 میں رانا بشارت علی خان کی قیادت میں برسٹل کی تاریخ کا سب سے بڑا فلسطین کے حق میں احتجاجی مظاہرہ منعقد کیا گیا، جس میں تقریباً چالیس ہزار افراد نے شرکت کی۔ اسی طرح 2017 میں لندن میں برما کے لیے ہونے والے احتجاج میں پچاس ہزار سے زائد افراد نے شرکت کی اور مظلوموں کے حق میں آواز بلند کی۔

آج انٹرنیشنل ہیومن رائٹس موومنٹ دنیا کے ستر سے زائد ممالک میں ڈیڑھ لاکھ سے زیادہ اراکین کے ساتھ انسانی حقوق، انصاف اور مظلوموں کی حمایت کے لیے سرگرمِ عمل ہے۔

ہم برسٹل کی تمام کمیونٹیز، تمام مذاہب اور تمام باشعور شہریوں سے اپیل کرتے ہیں کہ اتوار کو دوپہر دو بجے ہمارے ساتھ شامل ہوں۔ آئیں مل کر ایک واضح پیغام دیں کہ ہم جنگ کے خلاف ہیں، ہم امن کے ساتھ ہیں، ہم انصاف کے ساتھ ہیں۔

آپ کی شرکت اہم ہے۔ آپ کی آواز اہم ہے۔
آئیں مل کر انسانیت کے لیے کھڑے ہوں۔