កម្ពុជា​ទាមទារ​ឱ្យ​ថៃ​ទទួល​ខុសត្រូវ​លើ​ការ​បាញ់ប្រហារ​ជនស៊ីវិល​នៅ​ភូមិព្រៃចាន់នៅវេលាម៉ោង ៣

Описание: កម្ពុជា​ទាមទារ​ឱ្យ​ថៃ​ទទួល​ខុសត្រូវ​លើ​ការ​បាញ់ប្រហារ​ជនស៊ីវិល​នៅ​ភូមិព្រៃចាន់
នៅវេលាម៉ោង ៣ និង ៥០នាទីរសៀលនាថ្ងៃទី១២ វិច្ឆិកានេះ ទាហានថៃបានបើកការបាញ់ប្រហារលើប្រជាពលរដ្ឋខ្មែរក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ បើតាមការបញ្ជាក់របស់ក្រសួងការពារជាតិកម្ពុជា មានពលរដ្ឋខ្មែរ ៥នាក់បានរងរបួសក្នុងហេតុការណ៍នេះ និងថា កម្ពុជានឹងមិននៅស្ងៀម ដោយត្រូវអូស កថៃឱ្យមកទទួលខុសត្រូវទាំងស្រុងចំពោះការរំលោភបំពានយ៉ាងកំរោលបែបនេះ។ តែភាគីថៃ តាមរយៈកាសែត Khaosoad បានចេញមកច្រានចោលភ្លាមៗ ដោយអះអាងថា ខ្លួនមិនបានបាញ់លើជនស៊ីវិលកម្ពុជាទេ។

ទាហានថៃបានបើកការបាញ់ប្រហារលើពលរដ្ឋនៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបានបង្កឱ្យពលរដ្ឋខ្មែររងរបួសចំនួន ៥នាក់។ នេះបើតាមព័ត៌មានបឋមពីអាជ្ញាធរមូលដ្ឋានដែលក្រសួងការពារជាតិទទួលបាន គិតត្រឹមល្ងាចថ្ងៃទី១២ វិច្ឆិកានេះ។ ដោយឡែក អាជ្ញាធរ​ខេត្ត​បន្ទាយមានជ័យ​បាន​បញ្ជាក់​នៅ​ក្នុង​សេចក្តី​ប្រកាស​ព័ត៌មាន​របស់​ខ្លួន​ដែល​ទើប​ចេញ​មុន​នេះ​ថា ហេតុការណ៍​បាញ់​ប្រហារ​លើ​ពលរដ្ឋ​ខ្មែរ​ពី​សំណាក់​ទាហាន​ខ្មែរ​បាន​បណ្តាល​ឲ្យ​ស្លាប់​ម្នាក់ និង​របួស ៣នាក់។

ក្រសួងការពារជាតិកម្ពុជា តាម​រយៈសេចក្តីប្រកាសព័ត៌មាននៅរសៀលថ្ងៃទី១២ វិច្ឆិកា​នេះ​បាន​បញ្ជាក់​ថា ការបើកការវាយប្រហារលើជនស៊ីវិលនេះធ្វើឡើង បន្ទាប់ពីយោធាថៃបានបង្កហេតុជាច្រើនរាប់មិនអស់ជាច្រើនថ្ងៃមកហើយ ក្នុងចេតនាញុះញង់នាំឱ្យមានការប៉ះទង្គិចគ្នាជាមួយភាគីកម្ពុជា។ ភ្លាមៗ​ក្រោយកើតហេតុការណ៍នេះ ក្រសួងការពារជាតិកម្ពុជាបានអះអាងថា កម្ពុជានឹងមិននៅស្ងៀម ដោយត្រូវអូសកថៃឱ្យមកទទួលខុសត្រូវចំពោះការរំលោភបំពានយ៉ាងកំរោលបែបនេះ។

ទន្ទឹម​គ្នា​នេះ ក្រសួងការពារជាតិកម្ពុជាក៏បានអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពានសេចក្តីថ្លែងការណ៍រួមស្តីពីសន្តិភាពរវាងកម្ពុជា និងថៃ និងចំពោះការប្រព្រឹត្តិសកម្មភាពខុសច្បាប់របស់ថៃម្តងហើយម្តងទៀតនេះ។ ចំពោះក្រសួងការពារជាតិកម្ពុជា ទង្វើអមនុស្សធម៌ដ៏សាហាវឃោរឃៅរបស់ទាហានថៃនេះបង្ហាញយ៉ាងច្បាស់អំពីការរំលោភបំពានរបស់ភាគីថៃលើសេចក្តីថ្លែងការណ៍រួមស្តីពីសន្តិភាពរវាងកម្ពុជា និងថៃ ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ក្រោម​សក្ខីភាព​របស់លោក ដូណាល់ ត្រាំ ប្រធានាធិបតីសហរដ្ឋអាមេរិក និងលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី។



ទោះយ៉ាងណាក៏ដោយចុះ ក្រសួងការពារជាតិកម្ពុជានៅតែចង់ឱ្យភាគីថៃងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីសន្តិភាពរវាងកម្ពុជា និងថៃ ព្រមទាំងកិច្ចព្រមព្រៀងទាំងឡាយណាដែលភាគីជម្លោះទាំង២ សម្រេចបានកន្លងមកដោយមានសុច្ឆន្ទៈ និងការទទួលខុសត្រូវខ្ពស់បំផុត។ ជុំវិញហេតុការណ៍បាញ់ប្រហារលើពលរដ្ឋខ្មែរនេះ យោធាថៃបានចេញមុខបដិសេធច្រានចោលដោយអះអាងថា កម្ពុជាទៅវិញទេ ដែលជាអ្នកបង្កហេតុ បង្កើតស្ថានការណ៍ឱ្យតានតឹង នាំឱ្យផ្ទុះអាវុធបន្តិចបន្តួចប្រមាណជា ១០នាទី នៅថ្ងៃទី១២វិច្ឆិកានេះ។ ចំណែកអ្នកនាំពាក្យរងកងទ័ពភូមិន្ទថៃអះអាងថា ហេតុការណ៍នេះមិនបានធ្វើឱ្យពលរដ្ឋខ្មែររងរបួសទេ៕