20 Yanvar faciəsinin 36-cı ildönümü münasibətilə Bakı Sağlamlıq Mərkəzində anım tədbiri keçirildi

Описание: Qan yaddaşımız olan 20 Yanvar faciəsinin 36-cı ildönümü münasibətilə Bakı Sağlamlıq Mərkəzində anım tədbiri keçirildi.

Tədbir Azərbaycan Respublikasının Dövlət Himninin səsləndirilməsi və Vətənimizin azadlığı uğrunda həlak olmuş şəhidlərimizin xatirəsinin 1 dəqiqəlik sükutla yad edilməsi ilə başladı.

Tədbirdə Bakı Sağlamlıq Mərkəzinin icraçı direktoru Dos. Dr. Asiman Həsənov çıxış edərək 20 Yanvar hadisələrinin Azərbaycan tarixindəki əvəzsiz yerindən, bu faciənin xalqımızın milli oyanışında və müstəqillik yolunda dönüş nöqtəsi olmasından bəhs etdi. O bildirdi ki, 20 Yanvar faciəsi Azərbaycan xalqının azadlıq iradəsini sarsıtmaq əvəzinə, milli birlik və mübarizə ruhunu daha da gücləndirmişdir. Çıxışında şəhidlərin xatirəsinin hər zaman uca tutulmasının və bu tarixi yaddaşın gələcək nəsillərə ötürülməsinin vacibliyini xüsusi vurğuladı.

Daha sonra Professor Məhəmməd Kərimov çıxış edərək 20 Yanvar hadisələri ilə bağlı şəxsi xatirələrini tədbir iştirakçıları ilə bölüşdü. O, həmin dövrdə cərrah kimi fəaliyyət göstərdiyini, gecə saatlarından etibarən xəstəxanalara çoxsaylı yaralıların gətirildiyini, həkimlərin bütün imkanlarını səfərbər edərək insan həyatını xilas etmək üçün fədakarlıqla çalışdıqlarını qeyd etdi. Professor Kərimov vurğuladı ki, o günlər təkcə milli faciə deyil, eyni zamanda Azərbaycan səhiyyə işçilərinin humanistliyinin və peşəkarlığının bariz nümunəsi idi.

Tədbirin sonunda 20 Yanvar faciəsinə həsr olunmuş videoçarx nümayiş etdirildi. Videoçarx tədbir iştirakçılarında dərin hüzn, ehtiram və qürur hissləri yaratdı.