ကရင်နဲ့ မွန်အစပ်က ပိုင်ရပ်ကျေးရွာ ဗုံးကြဲခံရပြီး ကလေးတွေအပါအဝင် ၅ ဦးသေဆုံး | People's Spring

Описание: ကရင်နဲ့ မွန်အစပ်က ပိုင်ရပ်ကျေးရွာ ဗုံးကြဲခံရပြီး ကလေးတွေအပါအဝင် ၅ ဦးသေဆုံး

ဇွန်-၁၀၊ ၂၀၂၅ / People's Spring

ကရင်နဲ့ မွန်အစပ်မှာရှိတဲ့ ပိုင်ရပ်ကျေးရွာကို မနေ့ ဇွန်လ ၉ရက် နေ့ခင်းပိုင်း ၂ နာရီ ဝန်းကျင်မှာ စစ်ကောင်စီလေတပ်က ဗုံးကြဲခဲ့တာကြောင့် ကလေး ၃ဦးအပါအဝင် အရပ်သား ၅ဦးသေဆုံးခဲ့ရတယ်လို့ ဒေသတွင်း သတင်းရင်းမြစ်ထံကသိရပါတယ်။

ကရင်ပြည်နယ် ကော့ကရိတ်မြို့နယ်ထဲမှာရှိတဲ့ ပိုင်ရပ်ကျေးရွာ ဗုံးကြဲခံရမှုမှာ ကလေးငယ်တွေကို စာသင်ကြားပေးနေတဲ့ နေအိမ်နား ဗုံးကျရောက်ပြီး ကလေး ၃ ဦးနဲ့ သက်ကြီးပိုင်း ၁ဦး စုစုပေါင်း ၄ ဦး နေရာမှာတင် သေဆုံးခဲ့ရတာပါ။

ဒါ့အပြင် ကလေး ၁၁ဦးနဲ့ ဆရာမ ၁ဦး ထိခိုက်ဒဏ်ရာရခဲ့ပြီး ထိခိုက်ဒဏ်ရာရသူတွေကို ဆေးရုံ ပို့ဆောင်ချိန်မှာပဲ ဒဏ်ရာပြင်းထန်တဲ့ ဆရာမ ထပ်မံ ဆုံးပါးသွားတာလို့ ဒေသတွင်းသတင်းရင်းမြစ်က ပြောပါတယ်။

ဗုံးကျရောက်ပေါက်ကွဲတဲ့ နေအိမ်ဟာ ကိုယ်ထူကိုယ်ထကျောင်းဖြစ်ပြီး တိုက်ပွဲဖြစ်ပွားတာမရှိဘဲ ဗုံးကြဲခံရတာလို့ သိရပါတယ်။

စစ်ကောင်စီရဲ့လေကြောင်းရန်ကြောင့် စာသင်ကျောင်းမှာ စာမသင်ကြတော့ဘဲ ရွာထဲက နေအိမ်မှာ ကလေးတွေကို စုဝေးစာသင်နေကြချိန်မှာ ဗုံးကြဲခံရတာလို့လည်း သတင်းရင်းမြစ်က အသိပေးပါတယ်။

ဓာတ်ပုံမှတ်တမ်းအရ နှစ်ထပ် ခြေတံရှည်အိမ်ရဲ့အောက်ထပ်မှာ စာသင်ကြားကြတာဖြစ်ပြီး စာသင်ခုံအရေအတွက်အရ ကလေး ၂၀ ဦးထက်မနည်း ရှိနေတယ်လို့ ခန့်မှန်းရပါတယ်။ စာသင်တဲ့အိမ်ရော ၊ ဘေးက အိမ်ပါ ထိခိုက်ပျက်စီးသွားတာတွေ့ရပါတယ်။

စစ်အာဏာသိမ်းမှုကို ဆန့်ကျင်တဲ့ CDM စစ်သားတွေနဲ့ စုဖွဲ့ထားတဲ့ မြန်မာ့စစ်ဘက်ရေးရာနဲ့ လုံခြုံရေးဆိုင်ရာလေ့လာရေးအဖွဲ့ (MDSI)ကတော့ ပိုင်ရပ်ရွာကို စစ်ကောင်စီလေတပ်က ကလပ်စတာ ဗုံးကြဲတာလို့ ဆိုပါတယ်။

ဗုံးပဒေသာလို့ လူသိများတဲ့ ကလပ်စတာဗုံးဟာ အရပ်သားတွေကိုပါ ထိခိုက်သေကြေမှု မြင့်မားစေတာကြောင့် နိုင်ငံတကာက အသုံးပြုတာကို တားမြစ်ထားတဲ့ ဗုံးအမျိုးအစားဖြစ်ပါတယ်။

ဗုံးကြဲခံရတဲ့ ဧရိယာ တဝိုက်မှာ ကျန်ရှိခဲ့တဲ့ ဗုံးခွံအစိတ်အပိုင်းတွေဟာ စစ်ကောင်စီတပ်ရဲ့ ကာကွယ်ရေးပစ္စည်း ထုတ်လုပ်ရေး စက်ရုံ (ကပစ - ၂၁) က ထုတ်လုပ်တဲ့ MAB 26 C 6 Cluster Bomb အမျိုးအစား ဖြစ်တယ်လို့ MDSI က ဖော်ပြပါတယ်။

ဗုံးကြဲတိုက်ခိုက်ခံရတဲ့ ပိုင်ရပ်ကျေးရွာဟာ KNU ရဲ့ အုပ်ချုပ်ရေးနယ်မြေသတ်မှတ်ပုံအရ ဒူးပလာယာခရိုင် ၊ တပ်မဟာ (၆) နယ်မြေ ၊ ကျုံဒိုးမြို့နယ်ထဲမှာ တည်ရှိပါတယ်။ ဒါပေမဲ့ တိုက်ပွဲတွေဖြစ်ခဲ့တဲ့ ကျုံးဒိုးမြိုနဲ့တော့ အလှမ်းဝေးတယ်လို့ သိရပါတယ်။

ပြီးခဲ့တဲ့ ဧပြီ ၂၃ ရက်ကလည်း ကျုံဒိုးမြို့နယ် ဝင်းကကျေးရွာက စစ်ရှောင်တွေ ခိုလှုံရာ စာသင်ကျောင်း ဗုံးကြဲခံရတာရှိခဲ့ပါတယ်။

စစ်ကောင်စီရဲ့လေကြောင်းရန်ကြောင့် ကော့ကရိတ်မြို့နယ်နဲ့ ကျုံဒိုးမြို့နယ်တွေက စာသင်ကျောင်းအချို့ကို လတ်တလောမဖွင့်နိုင်သေးဘဲ အခြေအနေကို စောင့်ကြည့်နေရတယ်လို့ကျောင်းဆရာ၊ ဆရာမတွေက ပြောပါတယ်။

စစ်ကောင်စီဘက်ကတော့ ပိုင်ရပ်ရွာ ဗုံးကြဲတိုက်ခိုက်တာနဲ့ပတ်သက်ပြီး သတင်းထုတ်ပြန် တုံ့ပြန်တာမျိုး မရှိပါဘူး။ စစ်ကောင်စီဟာ အရပ်သားပြည်သူတွေစုဝေးရာနေရာတွေ ၊ ဆေးရုံတွေ​၊စာသင်ကျောင်းတွေကို ဗုံးမကြဲဘူးလို့ ငြင်းဆိုလေ့ရှိပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring