شيلة نخوة موجهة للشيخ فهد بن عماش الطريسي | عبدالله بن سعد بن هضيبان البقمي - منير البقمي |

Описание: يالله عليك اتكلت بـقدرتك واستعين
والله ماتشقا عبادٍ كنت في عونها..!

مزارق الطيب والمعروف في كل حين
عوايدٍ فـ النشاما مايخلونها..!

اتبين اهلها وتبدي .. والمواقف تبين
اللي يمدونها واللي يردونها..!

واقول لعلها ولا عساها تزين
ابقدرت مدبر الافلاك في كونها ..!

طلاّب حقٍ مصيب وشاهده بـ اليقين
ثلاثة حروب ماوالله يغطونها..!

الابن وابوه والثالث من الاقربين
شافو وحافو وقلنا تستحقونها..!

امسيت وانا غني واصبحت خالي يدين
من حقها ماوصلني غير عربونها..!

مليون واحد عشر الف مثبته باليمين
على نظام السعودية وقانونها ..!

راحت سنه مع سنه والحين عشرةسنين
واجزلت من صعبةٍ لو كان ياهونها..!

المـعـرفـه والـعـنـوه بـلـوة المستحين
حـقـوقـهـا عـنـدنـا وانتم تعرفونها..!

ندرا العنوه وندرا شرهة المسلمين
واصبر واسيّر قدم رجلي على هونها..!

واقـول مـاكـل مـنّ يـنـصـونه الطيبين
يقدر على الكايده ويشتت ضعونها..!

الاّ الطريسي ليا من قال ياحرب وين؟.
مـال المـواقـيـف غـيـر اللي يسدونها..!

حربي وابن عمك الحربي تحمل بدين
شانت عليه الليالي واختلف لونها..!

وانت الطريسي فهد والله ماتبغا عوين
وان قلت ياحرب شيلوها .. يشيلونها..!

والدين سجنٍ على الرجال مثل السجين
في ذمتي ماتخلي حرب مديونها ..!

حتى ولو تصعب العقده على الثَقلين
سالم ومسروح لاجتهم يحلونها..!

قمنا بها يوم فيصل زعزع العزوتين
والاد نامر تعزوت دون مديونها..!

وسبيع قامو بها ماكملت ساعتين
يوم ان زامل تعزوا وانثنا دونها..!

وان قيفّو خلصوها حرب في رمش عين
ان قلّ مليونها وان زاد مليونها..!

اعزومكم عند نطح الموجبه ماتلين
وانتم عروق الحمايا وانتم عيونها..!

اشيوخ ولا جبر .. حرب الدول جاهزين
وتجارهم كل صعبة حل ينهونها..!

هذي علومي ياحرب وجعلكم سالمين
جتكم علومي ولـ ابن اعماش مضمونها..!