សង្ខេបព័ត៌មានជាតិ ប្រចាំថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥

Описание: ---
១. ឯកឧត្ដម ជា ធីរិទ្ធ អ្នកនាំពាក្យសម្តេចតេជោ ហ៊ុនសែន នៅល្ងាចថ្ងៃពុធម្សិលមិញ បានផ្ញើសារប្រាប់នាយករដ្ឋមន្ត្រីថៃ និងអ្នកនាំពាក្យក្រសួងការបរទេសថៃថា ប្រជាប្រិយភាពសម្តេចតេជោ និងសម្តេចធិបតី មានក្នុងបេះដូងខ្មែរគ្រប់គ្នារួចហើយ ដោយមិនត្រូវការប្រជាប្រិយភាពអីទៀតនោះទេ។ ការលើកឡើងដូច្នេះ របស់ឯកឧត្ដម ជា ធី រិទ្ធ ធ្វើឡើងបន្ទាប់ពីនាយករដ្ឋមន្ត្រីថៃ បានចោទប្រកាន់សម្តេចតេជោថា បានទម្លាយឃ្លីបសន្ទនា រវាងលោកស្រី និងសម្តេច គឺដើម្បីចង់បានប្រជាប្រិយភាព។ ឯកឧត្ដម ជា ធីរិទ្ធ បញ្ជាក់ថា សម្រាប់ប្រជាប្រិយភាព របស់សម្តេចតេជោ និងសម្តេចធិបតី ហ៊ុន ម៉ាណែត គឺមាននៅក្នុងចិត្តរបស់ប្រជាពលរដ្ឋខ្មែរ ជាយូរមកហើយ ហើយនៅក្នុងក្របខណ្ឌរាជរដ្ឋាភិបាលប្រទេសកម្ពុជា សំឡេងរបស់កម្ពុជា គឺជាសំឡេងតែមួយ។ នេះគឺផ្ទុយពីប្រទេសថៃ ដែលមានការបែងចែក មិនមានការស្ដាប់គ្នា មិនឯកភាពគ្នា ដោយយោធាផ្សេង និងរដ្ឋាភិបាលផ្សេង ដែលពិបាកក្នុងការរកដំណោះស្រាយបញ្ហាព្រំដែនជាមួយកម្ពុជា៕
ប្រភព៖ ក្រសួងព័ត៌មាន (https://www.information.gov.kh/articl...)

២. ស្ថានភាពព្រំដែនកម្ពុជា-ថៃ នៅព្រឹកថ្ងៃទី១៩ ខែមិថុនា ឆ្នាំ២០២៥នេះ រួមមាន មន្រ្តីប្រចាំច្រកទ្វារបានសម្របសម្រួលជូនសិស្ស ទៅរៀននៅថៃ និងថៃមករៀននៅកម្ពុជា នៅរង្វង់ម៉ោង ៧:០០នាទីព្រឹក, ភាគីកម្ពុជា បើកច្រកនៅវេលាម៉ោង ៩៖០០នាទីព្រឹក, កម្ពុជាបន្តបិទទាំងស្រុង ការនាំចូលបន្លែ និងផ្លែឈើពីថៃ ខណៈក្រុមការងារមកពីក្រសួងការងារ និងបណ្តុះបណ្តាលវិជ្ជាជីវៈ បន្តផ្សព្វផ្សាយ និងទទួលចុះឈ្មោះ សម្រាប់ពលករមកពីថៃដើម្បីរកការងារធ្វើ និងរៀនជំនាញបន្ថែម។ នេះបើយោងតាមមន្ទីរព័ត៌មានតាមបណ្ដាខេត្តជាប់ព្រំដែនថៃ។
ប្រភព៖ AKP (https://t.me/TheAKP/83027)

៣. អាជីវកម្មផ្សព្វផ្សាយតាមរយៈគេហទំព័រឈ្មោះ www.slm-news.com និងគេហទំព័រឈ្មោះ www.fourpower.asia ត្រូវបានក្រសួងព័ត៌មានសម្រេចលុបអាជ្ញាប័ណ្ណវិញ ក្រោយរកឃើញថា ម្ចាស់អង្គភាពមិនគោរពច្បាប់ស្ដីពីរបបសារព័ត៌មាន។ នេះបើយោងតាមប្រកាសរបស់រដ្ឋមន្រ្តីក្រសួងព័ត៌មាន ចុះថ្ងៃទី១៧ ខែមិថុនា ដោយបញ្ជាក់បន្ថែមថា អង្គភាពសារព័ត៌មានទាំងពីរនេះ ក៏បានរំលោភយ៉ាងធ្ងន់ធ្ងរនូវក្រមសីលធម៌វិជ្ជាជីវៈសារព័ត៌មាន និងអនុវត្តផ្ទុយនឹងកិច្ចសន្យាអាជីវកម្មរបស់សាមីខ្លួន ដែលបានតម្កល់ទុកនៅក្រសួងព័ត៌មាន។
ប្រភព៖ ក្រសួងព័ត៌មាន (https://www.information.gov.kh/articl...)

៤. នៅថ្ងៃទី១៦ ខែមិថុនា មានការធ្វើដំណើរត្រង់របស់នាវាដឹកទំនិញដំបូង ពីកំពង់ផែ Suzhou ប្រទេសចិន មកកាន់កំពង់ផែក្រុងព្រះសីហនុ។ នេះបើតាមការបញ្ជាក់របស់ឯកឧត្តម Wang Wenbin ដោយបានបញ្ជាក់ថា នេះគឺបញ្ជាក់ពីភាពជោគជ័យនៃការបើកដំណើរការជើងនាវាកុងតឺន័រ។ សូមបញ្ជាក់ថា យោងតាមឯកឧត្តម Wang Wenbin ការបើកជើងនាវាឆ្ពោះទៅត្រង់ បានកាត់បន្ថយពេលវេលាដឹកជញ្ជូនបែបប្រពៃណីចន្លោះ ១៥ ទៅ ២០ថ្ងៃ មកនៅត្រឹមតែ ៩ថ្ងៃ ប៉ុណ្ណោះ។
ប្រភព៖ ក្រសួងព័ត៌មាន (https://www.information.gov.kh/articl...)

៥. សៀវភៅម្ហូប «កេរដំណែលស្នាដៃម្ហូបខ្មែរ ភាគ២» ដែលចងក្រងដោយ ក្រសួងការបរទេសកម្ពុជា បានទទួល «ពានរង្វាន់ពិសេសរបស់គណៈវិនិច្ឆ័យ» ពី Gourmand Awards លើកទី៣០ នៅក្នុងកម្មវិធី Cascais World Food Summit។ កម្មវិធីនេះ ប្រព្រឹត្តទៅថ្ងៃទី១៨ ដល់ថ្ងៃទី២២ ខែមិថុនា ឆ្នាំ២០២៥ នៅទីក្រុងលីសស្បោន ប្រទេសព័រទុយហ្កាល់ ដោយមានអ្នកចូលរួមរាប់រយនាក់ មកពីប្រមាណ ២០០ប្រទេស។ សូមបញ្ជាក់ថា សៀវភៅម្ហូប «កេរដំណែលស្នាដៃម្ហូបខ្មែរ ភាគ២» បានចងក្រងមុខម្ហូប និងបង្អែមខ្មែរចំនួន ៣៨ មុខ និងបានរំលេចនូវផលិតផលកសិកម្ម ដែលបានទទួលម៉ាកសម្គាល់ភូមិសាស្រ្តទំនិញរបស់កម្ពុជារួមមាន អង្ករផ្ការំដួល ម្រេចកំពត អំពិលកំពត-កែប និងស្ករត្នោតកំពង់ស្ពឺជាដើម។
ប្រភព៖ AKP (https://t.me/TheAKP/83059)

Facebook:   / preah.khan.khmer  
Telegram: https://t.me/preah_khan
TikTok:   / preah_khan