BORMLA TIRBAĦ IR-REGATTA TA’ JUM IL-ĦELSIEN

Описание: ONE.COM.MT •




Illum fil-Port il-Kbir saret ir-regatta ta’ Jum il-Ħelsien, ġimgħa qabel, minħabba li fil-31 ta’ Marzu, il-Knisja Kattolika se tiċċelebra l-Għid il-Kbir.



Regata li ntrebħet minn Bormla u li għaliha attendew mijiet ta’ nies.



BORMLA TIRBAĦ IR-REGATTA TA’ JUM IL-ĦELSIEN



Bormla tirbaħ ir-Regatta ta’ Jum il-Ħelsien għall-14-il darba fl-istorja tagħhom



Id-distrett ta’ Bormla rebaħ ir-regatta ta’ Jum il-Ħelsien.



Dan wara li s-Sibt waranofsinhar saret l-edizzjoni ta’ din is-sena ta’ regatta, ġimgħa qabel mis-soltu minħabba li fil-wieħed u tletin ta’ Marzu se tkun qed tiġi ċċelebrata l-festa tal-Għid il-Kbir.



Id-distrett ta’ Bormla rebaħ il-Kategija Open, b’total ta’ sittin punt, żewġ punti aktar mid-distrett tal-Birgu li spiċċaw fit-tieni post bi tmienja u ħamsin punt.



Fit-tielet post fl-istess kategorija spiċċaw l-Isla bi tmienja u erbgħin punt.



Il-Bormliżi kull ma riedu kien punt mill-aħħar tellieqa dik tal-Pass b’4 mqadef, biex jaċċertaw lis-Shield tirritorna f’Bormla, fejn irnexxielhom jiskbu t-tielet post f’tiġrija eċitanti mirbuħa mill-Birgu.



Aħbar li ntlaqgħet b’tant ferħ u entużjazmu mill-Bormliżi li kienu qed isegwu b’reqqa dak kollu li kien qed jiġri fil-Port il-Kbir.



Ftit wara li it-tim ta’ Bormla ngħata x-shield għall-erbatx-il darba fl-istorja, tkellimna mal-President Evan Buttigieg biex jagħtina l-ewwel reazzjoni tiegħu.



EVAN BUTTIGIEG

PRESIDENT TA’ TIM TA’ REGATTA BORMLA





Fil-Karegorija B, il-Birgu u l-Kalkara spiċċaw indaqs fl-ewwel post biex issa se jżommu x-Shield sitt xhur kull wieħed.



Dan wara li l-Birgu rnexxielhom jagħmlu dak li deher ftit diffiċli jseħħ, wara li rebħu t-tellieqa mill-isbaħ tal-Pass b’Erbgħa. Riżultat ta’ hekk, minħabba li d-distrett tal-Kalkara ma spiċċax mal-ewwel tlieta, id-distrett tal-Birgu laħquhom b’total ta’ tmienja u erbgħin punt.



Fit-tieni post, wara l-koppja Kalkara u Birgu, spiċċaw Bormla bi tnejn u għoxrin punt.



Fl-ewwel tellieqa li fetħet ir-regatta ta din is-sena, id-distrett tal-Birgu rebaħ din l-unika tellieqa fil-kategorija tan-nisa. Isewgu lil Birgu kienu l-koppja tal-Isla.



Intant spikkat l-attendenza numeruża ta’ nies li rħewlha biex jerġgħu jaraw it-tim tagħhom f’kompetizzjoni f’dan l-isport tradizzjonali Malti.



F’ġurnata sajfija, f’temp li jsejjaħlek biex toħroġ tgawdi x-xemx u l-jum, ir-regatta ta’ din is-sena kien mistennija minn diversi nies.