ШҚО-ның Шолпан ауылында шешімін таппаған мәселелер жетерлік

Описание: Шығыс Қазақстан облысының Үржар ауданына қарасты Шолпан ауылының тұрғындары біздің тілшілерімізге хабарласып, ауылдағы шешімін таппаған бірнеше түйткіл туралы хабарлады.

Халықты Қарақол өзені бойында салынып жатқан су бөгетінің сапасыз, сылбыр құрылысы алаңдатып отыр. Бұдан өзге ауылда ауызсу, мәдениет үйі, жол сияқты мәселелер де өкінішке қарай шешімін таппаған.

1400-ге жуық тұрғыны бар Шолпан ауылы Қарақол өзенінің бойында орналасқан. Жылда жазғытұры елден маза қашады. 2010 жылы көктемде су тасып, жазында көпір салынғанымен, ол да ұзаққа шыдамады. Екінші көпір былтыр тұрғызылғанымен, су бөгеті дұрыс жобаланбағандықтан, өзеннің арнасы көктемде басқа жаққа бұрылып кетіпті. Осы олқылықтардың орнын толтыру үшін биыл аудан бюджетінен 11 жарым миллион теңге бөлініп, мердігер анықталған. Алайда тұрғындар қазірдің өзінде дабыл қағып отыр.

Болат Көкенайұлы, тілші:

– Шолпандықтардың мердігерлердің қазір атқарып жатқан жұмысының алдағы су тасқыны қаупіне төтеп беретініне күмәнмен қарап отыруларына толық негіз бар. Қазірдің өзінде байқағанымыз – су бөгеттері топырақ араласпай, тек құмнан жасалған. Ал көпір шетіндегі бетон бекіністің түрі мынау – үгітіліп жатыр.

Оңғарбек Тұрарбаев, Шолпан ауылының тұрғыны:

– Бұған сметада қалай тұрса солай құмын, топырағын, тасын төкпесе, мына көпірді көктемде су шайып кетеді. Бетон құйылу керек. Ал бетоннан кейін 3-5 сантиметр арасында 25 метрлік кішкентай тор тоқылады, соған салып жатыр. Ол түк те болмайды.

Ауылда бұдан басқа да түйткілдер жетерлік. Тұрғындар ұзақ жылдар қордаланған мәселелер тезірек шешімін тапса дейді.

Алтай Баймұхаметов, Шолпан ауылының тұрғыны:

– Ауылда қарапайым ауызсудың өзін әркім 3-4 метрден қазып, құбыр айдап, жабайы түрде ішеді. Ардагерлер, ауыл жастары мереке күндері концерт ұйымдастырсақ, көбінесе мектепке барамыз.

Ауыл мен үлкен тасжолға шығатын 3 шақырым жолға да 30 жылдан бері дұрыс жөндеу жасалмаған. Ал аудандағы атқамінерлер бұл мәселелердің барлығы бақылауда екенін айтады.

Серік Сәдуақасов, Үржар ауданы әкімінің орынбасары:

– Кемшілік жоқ емес, бар. 1 тамыздан бастап 30 қыркүйекке дейін жасап бітіруі керек. Бүгін күнделікті соның басында отыратын комиссия құрып қойдық.

Шенеуніктердің сөзіне сенсек, Шолпан ауылындағы ауызсудың жобалық-сметалық құжаттары биыл аяқталып, келесі жылы шешімін табуы тиіс. Жол жөндеу де жоспарда тұр. Ал мәдениет үйі жекеменшікке өтіп кеткендіктен, оны жөндеу мүмкіндігі жоқ.

Авторлары: Болат Көкенайұлы, Анатолий Тернов, Берік Жобалайұлы