စစ်ကောင်စီတပ်နဲ့ BGF ခေါင်းဆောင်ပိုင်းတွေတွေ့ဆုံမှု အဆင်မပြေ | People's Spring

Описание: စစ်ကောင်စီတပ်နဲ့ BGF ခေါင်းဆောင်ပိုင်းတွေတွေ့ဆုံမှု အဆင်မပြေ

နိုဝင်ဘာ-၁၉၊ ၂၀၂၅။ People's Spring

ကျားဖြန့်အရေးနဲ့ပတ်သက်ပြီးမြဝတီမြို့မှာနိုဝင်ဘာ ၁၇ ရက်က စစ်ကောင်စီတပ်နဲ့ ကရင့်နယ်ခြားစောင့်တပ်(BGF)ခေါင်းဆောင်ပိုင်းတွေ တွေ့ဆုံဆွေးနွေးရာမှာ အဆင်မပြေ ဖြစ်ခဲ့တယ်လို့ BGF နဲ့ နီးစပ်တဲ့ သတင်းရင်းမြစ်က ပြောပါတယ်။

စစ်ကောင်စီတပ်ဘက်က တာဝန်ရှိသူတွေနဲ့ BGF ခေါင်းဆောင်စောချစ်သူ၊ စောမို့သိုတို့ မြ၀တီမြို့မှာ တွေ့ဆုံဆွေးနွေးခဲ့ကြတာပါ။

ရွှေကုက္ကိုလ်မြို့သစ်ထဲ ဝင်ရောက်စစ်ဆေးတာနဲ့ ပတ်သက်ပြီး မြို့ကို ထိန်းချုပ်ထားတဲ့ BGF ခေါင်းဆောင် စောချစ်သူက မကျေမနပ်ဖြစ်နေတယ်လို့ BGF နဲ့ နီးစပ်တဲ့ သတင်းရင်းမြစ်တစ်ဦးက ပြောပါတယ်။

အဲဒီနောက် နိုဝင်ဘာ ၁၈ ရက် မနေ့က ရွှေကုက္ကိုလ် စီးနင်းမှုမှာ စစ်ကောင်စီတပ်ဖွဲ့ဝင်တွေနဲ့အတူ BGF ဘက်က ပြောရေးဆိုခွင့်ရှိသူ ဗိုလ်မှုးကြီးနိုင်မောင်ဇော်နဲ့ စောချစ်သူရဲ့သားငယ်တို့ ဦးဆောင်ပါဝင်တာတွေ့ရပါတယ်။

မနေ့က စီးနင်းမှုကတော့ ရွှေကုက္ကိုလ်မြို့ထဲက ကျားဖြန့်လုပ်ဆောင်နေတဲ့ လုပ်ငန်းခွင်တချို့ကို အယောင်ပြ စစ်ဆေးတာလို့ ဝေဖန်ခံနေရပါတယ်။

ကျားဖြန့်လုပ်ငန်းသုံး ကွန်ပြူတာတွေ၊ ဖုန်းတွေနဲ့အတူ တရုတ်နိုင်ငံသားအများစုအပါအဝင် နိုင်ငံခြားသားတွေကို ဖမ်းဆီးရမိတယ်လို့ သိရပါတယ်။

စစ်ကောင်စီတပ်ရဲ့ ဒီနေ့ ထုတ်ပြန်ထားချက်အရ ရွှေကုက္ကိုလ်မြို့သစ်ထဲ ဝင်ရောက်စစ်ဆေးမှုအတွင်း အွန်လိုင်းလောင်းကစားမှုမှာ အသုံးပြုနေတဲ့ ဖုန်းအလုံးရေ ၁၀,၀၀၀ နီးပါး၊ ဆက်စပ်ပစ္စည်းတွေနဲ့အတူ နိုင်ငံခြားသား ၃၄၆ ဦးကို ဖမ်းဆီးရမိခဲ့တယ်လို့ ဖော်ပြပါတယ်။

စစ်တပ်နဲ့ BGF တို့ရဲ့ ပူးပေါင်းစစ်ဆေးမှုတွေဟာ ဟန်ပြလောက်သာဖြစ်ပြီး ရွှေကုက္ကိုလ်မြို့ထဲက တချို့ ကျားဖြန့်တရုတ်ဆိုက်ထဲမှာတော့ အလုပ် သမားတွေကို အပြင်ထွက်ခွင့်မပြုဘူးလို့ သတင်းရင်းမြစ်တချို့က ဆိုပါတယ်။

BGF ရဲ့ ပြောရေးဆိုခွင့်ရှိသူ ဗိုလ်မှူးကြီး နိုင်မောင်ဇော်ရဲ့ ပြောဆိုချက်အရ ရွှေကုက္ကိုလ် တဝိုက်မှာ ကျားဖြန့် လုပ်သားအင်အား နှစ်ထောင်ဝန်းကျင်ရှိနေတယ်လို့သိရပါတယ်။

ကျားဖြန့်ကိုလည်း ဒီတစ်ခေါက်မှာ အပြတ်ရှင်းမယ်လို့ စီးနင်းမှုမတိုင်ခင်တစ်ရက်မှာ ဗိုလ်မှူးကြီးနိုင်မောင်ဇော်က ကြွေးကြော်ထားပါတယ်။

ဒါပေမဲ့ ကရင်နယ်ခြားစောင့်တပ်(BGF) အမှတ်(၂)စစ်ဒေသဌာနချုပ်ဖြစ်တဲ့ မြ၀တီမြို့နယ် မြောက်ဘက်ပိုင်းက သေ့ကတေစံပြကျေးရွာထဲကို BGF က ကျားဖြန့်လုပ်နေတဲ့ KK Park က တရုတ်သူဌေးတွေကို ခေါ်ဆောင်ထားတယ်လို့ ကရင်သတင်းရင်းမြစ်က ပြောပါတယ်။

BGF အမှတ်(၂)စစ်ဒေသမှူး ဗိုလ်မှူးချုပ်စောတင်ဝင်း ထိန်းချုပ်တဲ့ သေ့ကတေစံပြကျေးရွာထဲမှာ/အဆောက်အဦးအသစ်တချို့တဝက် တည်ဆောက်ပြီးစီးပြီဖြစ်ပြီး လိုအပ်တဲ့ဆောက်လုပ်ရေးပစ္စည်းတွေကို ရွှေကုက္ကိုလ်မြို့ကနေ တပ်နယ်(၂)တံဆိပ်ပါတဲ့ ယာဉ်တွေနဲ့ သယ်ယူပို့ဆောင်လာတယ်လို့ ကရင်သတင်းရင်းမြစ်က ပြောပါတယ်။

ပြီးခဲ့တဲ့ အောက်တိုဘာလကုန်ပိုင်းကစတင်ပြီး BGF ဗိုလ်မှုးချုပ် စောတင်ဝင်း ထိန်းချုပ်နယ်မြေထဲက KK Park ကို စစ်ကောင်စီတပ်က မိုင်းခွဲဖျက်ဆီးခဲ့ပါတယ်။

ပြီးခဲ့တဲ့ နိုဝင်ဘာ ၇ ရက် က စစ်ကောင်စီကျင်းပခဲ့တဲ့ နှစ်(၇၀)ပြည့် ကရင်ပြည်နယ်နေ့အခမ်းအနားမှာ စောချစ်သူ၊ စောမို့သိုတို့ တက်ရောက်ခဲ့ပေမယ့် စောတင်ဝင်းကတော့ မတက်ရောက်ခဲ့ပါဘူး။

စောတင်ဝင်းကို ကျားဖြန့် လုပ်ငန်းတွေနဲ့ ဆက်စပ်တယ်ဆိုပြီး အမေရိကန်အစိုးရ နိုင်ငံခြားပိုင်ဆိုင်မှုထိန်းချုပ်ရေးဌာန (OFAC)က ပြီးခဲ့တဲ့ စက်တင်ဘာမှာ ပိတ်ဆို့အရေးယူထားပါတယ်။

ကျားဖြန့်နှိမ်နင်းရေးနဲ့ပတ်သက်ပြီး သဘောထားမှတ်ချက်ရဖို့ BGF ဗိုလ်မှူးချုပ်စောတင်ဝင်းနဲ့ ဗိုလ်မှူးကြီး နိုင်မောင်ဇော်တို့ဆီ ဖုန်းနဲ့ ဆက်သွယ်ပေမယ့်အဆက်အသွယ်မရခဲ့ပါဘူး။

ကရင်နယ်ခြားစောင့်တပ်(BGF)က ရွှေကုက္ကိုလ်မှာ ကျားဖြန့်နှိမ်နင်းဖို့အတွက်ဆိုပြီး ဒီနှစ်အစပိုင်းက အထူးအဖွဲ့တွေဖွဲ့ထားပေမယ့် ကျားဖြန့်လုပ်ငန်းတွေ ပပျောက်သွားတာမရှိဘူးလို့ ရွှေကုက္ကိုလ်သတင်းရင်းမြစ်တွေက ဆိုပါတယ်။

မြ၀တီမြို့တောင်ဘက်က BGF ထိန်းချုပ်ထားတဲ့ မယ်ထော်သလေးရွာအနီးက နာမည်ဆိုးနဲ့ကျော်ကြားတဲ့ KK Park ကျားဖြန့်ဝင်းထဲကို ပြီးခဲ့တဲ့ အောက်တိုဘာလကစပြီး စစ်ကောင်စီတပ်က စီးနင်းရာမှာ KK Park ထဲကနေ တရုတ်အပါအဝင် နိုင်ငံခြားသားတွေနဲ့ မြန်မာနိုင်ငံသားတွေ ထွက်ပြေးခဲ့ကြရပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

  / subscribe  
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗧𝗲𝗹𝗲𝗴𝗿𝗮𝗺 - https://t.me/peoplespring

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA