Ақтөбе облысында биыл 3 жаңа мектеп пайдалануға беріледі

Описание: Ақтөбе облысында 1 қыркүйек қарсаңында үш жаңа білім ордасы оқушыларға есігін айқара ашады. Дәл қазір облыс орталығынан 8 шақырым қашықта орналасқан Жаңақоныс ауылында жаңа мектеп құрылысы аяқталды. Онда 1200 бала білім алатын болады.

Осыған дейін ауыл балалары асханасы мен санитарлық желілері жоқ, ескі екі ғимаратта білім алып келді. Жаңа мектептің құрылысына республикалық бюджеттен 830 млн-нан астам тенге бөлінген.

Мұғалімдердің айтуынша, жаңа кабинеттер қажетті қондырғылармен жабдықталған. Мультимедиялық сыныптары мен кең спорт залы да бар. Биылғы оқу жылында тағы екі мектеп Байғанин және Алға ауданында ашылады. Осындай жаңа мектептерді іске қосу арқылы өңірде бірер жылда апатты мектептер саны толығымен жойылмақ. Ақтөбе облысында соңғы екі жылда 20 жаңа мектеп салыныпты.

Дәмежан Қыстаубаева, Ақтөбе қаласының тұрғыны

-Жаңақоныс ауылында көптен бері тұрамын. Балаларым ескі типтік жобада салынбаған екі мектепте бөлініп оқитын еді. Біз, ата-аналар ауыл болып, мынадай зәулім мектептің салынып жатқанына үлкен қуаныштымыз.

Жанат Самұратова, Ақтөбе облыстық білім басқармасының басшысы

-Жаңа мектептер салып, мына апатты жағдайда, үш ауысымды мектептердің санын жою мақсатында Елбасының тапсырмасын бақылауға алып, орындалып жатыр. 2016 жылда біз үш ауысымды мектептер санын түгел жоямыз. 2017 жылғы біздер енді түгел апатты жағдайдағы мектептерді жоямыз деген мақсатымыз бар.