Masallıda fermerlər badımcan şitillərini parniklərə köçürürlər

Описание: Masallıda fermerlər badımcan şitillərini parniklərə köçürürlər

Havaların əlverişli keçməsi, Masallı fermerlərini hərəkətə gətirib. Bir neçə gündür sahələrdə yazlıq əkinə başlanılıb. Fermerlər istixana şəraitində becərdikləri badımcan şitillərini parniklərə köçürürlər.

Tərəvəz əkini əsasən Masallının Muğan zonasında aparılır. Bu ildə rayonun Xırmandalı, Həsənli, Stansiya Təklə, Hacıtəpə kəndlərində mart ayının ikinci ongünlüyündən başlayaraq badımcan əkininə hazırlıq işlərinə başlanılıb. Gəncə növü olan badımcanın əvvəl şitili dibçəklərə vurulub. Hazırda isə dibçəklərdən olan badımcanın istixanalara köçürmə prosesi aparılır.

Ötən il sahələrdən bol məhsul götürdüklərini deyən fermerlər bu il əkin sahələrini daha da genişləndirib. Fermerlərin sözlərinə görə havaların əlverişli keçməsi yeni əkin mövsümündə də məhsuldarlığın yüksək olacağından xəbər verir. May ayının əvvəlində isə badımcanın yığımı aparılacaq. Hektara 3 ton məhsul toplayacaqlarını planlaşdıran fermerlər, ilk iki yığımı Rusiya Federasiyasına yola salacaqlarını deyirlər.

Rayon ərazisində kənd təsərrüfatı məhsullarının alışı üçün tədarük məntəqələri də yaradılıb. Bu da fermerlərin məhsullarını yerindəcə satacaqlarına şərait yaradır. Qeyd edək ki, hazırda bazarlarda yerli badımcan olmadığından, Türkiyə və İrandan gətirilən badımcan alıcılara təklif olunur. Xaricdən ixrac edilən badımcanın bir kiloqramı isə 2-3 manat arasında dəyişir.