IL-QUWS JINŻAMM ARRESTAT B’RABTA MA’ TRAFFIKAR TA’ DROGA

Описание: ONE.COM.MT • Melvin Debono magħruf bħala ‘l-Quws’ inżamm arrestat wara li allegatament inqabad b’pussess ta’ droga kokaina, maħsuba li se tiġi traffikata.
ONE News għandu f’idejh filmati esklussivi ta’ rejd li sar f’Ħal Qormi nhar l-Erbgħa li għadda fejn fih ġie arrestat Debono.
L-aħbarijiet mill-Qorti fis-servizz li jmiss.

KITBA: ONE NEWS
FILMAT: ARKIVJI

Melvin Debono, magħruf bħala ‘il-Quws’ baqa’ jinżamm arrestat wara li tressaq il-Qorti, mixli bi traffikar ta’ droga.

L-imputat, li għandu tletin sena, u li jaħdem bħala bejjiegħ ta’ karozzi, ċaħad li fil-pussess tiegħu kellu tliet mitt gramma droga kokaina.

Huwa kien mixli li huwa riċediv, minħabba li kiser il-kundizzjonijiet tal-ħelsien mill-arrest fuq erba’ sentenzi differenti.

Il-Prosekuzzjoni fissret li l-Pulizija kienet mgħarrfa b’mod kunfidenzjali li kien se jsir traffikar ta’ droga bejn żewġ persuni.

Intqal ukoll li fuq l-imputat instabu tliet mitt gramma kokaina.

L-Avukat Difensur Franco Debono stqarr li għalkemm l-ammont ta’ droga mhuwiex żgħir, imma lanqas hu kbir ħafna.

Id-Difiża għamlet talba għall-ħelsien mill-arrest liema talba ġiet miċħuda.

ONE News kien segwa l-arrest tal-‘Quws’ f’Ħal Qormi b’filmati esklussivi t’arrest ukoll ta’ diversi persuni b’rabta ma’ traffikar tad-droga.

Erba’ persuni tressqu lbieraħ il-Qorti b’rabta ma’ rejds li twettqu mill-Iskwadra ta’ Kontra d-Droga.

Il-Qorti ddikjarat li l-arrest ta’ tlieta minnhom kien invalidu filwaqt li l-persuna l-oħra ngħatat il-libertà proviżorja.

MHUX SE JKUNU ŻVELATI ISMIJIET T’UFFIĊJALI

Il-Qorti li kienet ippreseduta mill-Maġistrat Miriam Hayman ċaħdet talba li għamlu l-avukati ta’ Yorgen Fenech, biex jiġu żvelati ismijiet tal-Uffiċjali tas-Servizzi Sigrieti Maltin li għaddew informazzjoni li wasslet għall-arrest ta’ Fenech fl-2019.

L-avukati ta’ Fenech argumentaw li din l-operazzjoni kienet illegali madankollu l-Imħallef qalet li Fenech ġie arrestat meta kien qed jipprova jaħrab mill-pajjiż, u għalhekk huwa irrelevanti jekk jiġux żvelati dawn l-ismijiet jew le.

SE JINGĦATAW INFORMAZZJONI MILL-MOBILE TA’ SCHEMBRI
Il-Qorti laqgħet it-talba ta’ Yorgen Fenech li jingħata l-informazzjoni li ttieħdet mill-mobile ta’ Keith Schembri.

L-Avukati ta’ Fenech qed isostnu li fil-mobile ta’ Schembri hemm informazzjoni li hija importanti għall-każ tagħhom.

L-Avukat tal-Istat informa lill-Qorti, li l-Uffiċċju mmexxi minnu mhux se jkun qed jappella minn din id-deċiżjoni, u għalhekk il-Kummissarju se jkun qed jagħti din l-informazzjoni lill-Avukati ta’ Fenech, anke jekk dan ifisser li l-investigazzjoni tiġi preġudikata.

IL-QORTI TRID TISMA’ AKTAR XHIEDA
anker El Hiblu.

Il-Qorti ordnat biex tiġi stabbilita l-lista ta’ persuni li kienu ġew salvati mit-tanker El Hiblu.

Dan hekk kif kompla jinstema’ l-każ kontra t-tliet akkużati, li qed ifittxu ażil u huma mixlija li ħatfu t-tanker.

Il-Qorti qed tipprova tisma’ x-xhieda tal-immigranti kollha li kellhom x’jaqsmu f’dan il-każ li jmur lura għall-elfejn u dstatax, madankollu ma setgħetx tiġi provduta lista ta’ dawn il-persuni u d-dettalji tagħhom.

In-numru ta’ immigranti jaqbeż il-mija.
Uħud mix-xhieda li kienu fuq it-tanker qalu li ma jafux ħafna dettalji.

Hawnhekk, l-Ispettur Omar Zammit stqarr li kien ra wieħed mix-xhieda jitkellem b’ċertu kunfidenza ma’ wieħed mill-akkużati.