RAAF - Ek Wou Nog (amptelike musiekvideo)

Описание: Ek Wou Nog in video...

Dis ‘n sielvolle ballade wat ‘n verhaal van verlies vertel. Die musiek video is in Nieu-Bethesda verfilm en neem kykers op ‘n roerende reis.

“Ek het in Maart van 2020 ‘n kursus bygewoon in Johannesburg”, vertel Esté. “Ek het in Gauteng geland saam met die nuus dat die eerste Covid-19 geval in Suid-Afrika bevestig is. Die naweek het ek by een van my naaste vriendinne gebly en op die aand wat ons uiteindelik albei tyd het om om ‘n tafel te sit en te eet en te gesels, kry sy die oproep dat een van haar baie naby familie lede pas oorlede is. Die skok en hartseer in my vriendin se oë het my diep geraak. Ons het tot laatnag sit en huil en ek het besef hoe weerloos ons elkeen is wanneer ons verlies in die gesig staar.
Ek het nie besef hoe noue verband daar was tussen al die gebeure van daardie naweek nie; dis asof daardie ervaring van verlies ‘n voorspelling was van wat vir ons wêreld voorlê, nog meer so nou as ooit; verlies. Ons het alle vorme van verlies ervaar in hierdie afgelope paar maande en elkeen van ons staan weerloos voor dit.”

Lourens en Esté hoop dat daar vertroosting kan wees vir elkeen wat iets of iemand verloor het in hierdie rou, pragtige ballade.

Oor die skiet van die musiekvideo in Nieu-Bethesda se NG Kerk, vertel Lourens: “Ons was eintlik besig om Sewe Somers se musiek video te verfilm. Na ons sonsopkoms verfilming het ons gewag vir sagter lig oor ontbyt. Ek het gewonder hoe moontlik dit sal wees om te kyk hoe die binnekant van die kerk lyk. Esté het vir die eienaar van die restaurant gaan vra of sy iemand ken wat vir ons die kerk sal kan oopsluit en in tipiese Karoo styl en gasvryheid bel sy dadelik die koster, ‘n vriendin van haar, tannie Ansie… Ansie was heeltemal gemaklik, inteendeel, opgewonde, daaroor dat ons in die kerk verfilm en het eers vir ons al die geskiedenis vertel - ons kon tot die kerkklokke lui...”

Dis toe Lourens en Esté en die span die atmosfeer van die kerk indrink dat hulle impulsief besluit het om eerder iets te probeer vasvang vir Ek Wou Nog.

“Dit was nie eers deel van die beplanning nie” se Esté. “Dit was absoluut ‘n regte tyd, regte plek, regte atmosfeer scenario. Ons het die video binne drie ure klaar verfilm en ons het almal geweet dat iets spesiaal sopas gebeur het.”

Lourens en Esté het steeds kontak met tannie Ansie.

Videograaf: Corrie Uys
Musiek en lirieke: Lourens en Esté Rabé (RAAF)
Vervaardiging en opname: Benjamin Hound en Gerhard Grobler (Stereo Hills)

'n Seerplek die grootte van my lyf
Pleisters van lag en wyn en wegkwyn
Maar dit bly so bitter rou
'n Haan kraai, dit was nog 'n lang nag
Ek trek aan in blompatrone
Maar alles bly so bitter blou

Ek wou nog 'n sin vir jou skryf
Die lewe het 'n punt gemaak
Ek wou nog daai painting vir jou koop
Tee mors op jou vloer
Ek wou nog net een keer redeneer
Stry totdat ons lag
Nog 'n keer die son sien opkom
Die lewe het 'n punt gemaak

'n Stil hart, maar ek bloei 'n duisend woorde
Ek dink want dit is donker, en dit is donker want ek dink
'N Kort tyd, maar vir ewig is so lank
Ek bêre al die goedjies van jou
Maar dit bly so bitter rou

Ek wou nog 'n sin vir jou skryf
Die lewe het 'n punt gemaak
Ek wou nog daai painting vir jou koop
Tee mors op jou vloer
Ek wou nog net een keer redeneer
Stry totdat ons lag
Nog 'n keer die son sien opkom
Die lewe het 'n punt gemaak
Ek wou nog 'n sin vir jou skryf
Die lewe het 'n punt gemaak
Ek wou nog daai painting vir jou koop
Tee mors op jou vloer
Ek wou nog net een keer redeneer
Stry totdat ons lag
Nog 'n keer die son sien opkom

Die lewe het 'n punt gemaak
Die lewe het 'n punt gemaak
Die lewe het n punt gemaak