Skipverjar sóttir af þyrlusveit Landhelgisgæslunnar

Описание: Áhöfnin á TF-EIR, þyrlu Landhelgisgæslunnar, sótti tvo slasaða skipverja í erlent flutningaskip á laugardag sem statt var skammt norður af Keilisnesi. Stjórnstöð Landhelgisgæslunnar barst beiðni um aðstoð vegna slyss í vélarúmi flutningaskipsins og var ákveðið að senda þyrlu Landhelgisgæslunnar til að hægt væri að koma mönnunum undir læknishendur. Vegna tungumálaörðugleika var túlkur fenginn til að aðstoða áhöfnina áður en þyrlan tók á loft til að fara yfir hvernig staðið yrði að hífingum.

Þegar þyrlan kom á vettvang var sigmanni, lækni, tveimur hífingarbörum og búnaði var slakað um borð í skipið. Þyrlan fór frá skipinu meðan áhöfnin athafnaði sig um borð og hlúði að skipverjunum. Þeim var komið fyrir á grjónadýnu í hífingarbörum og undirbúnir til flutnings.

Að því búnu fór þyrlulæknirinn aftur um borð í þyrluna og svo voru skipverjarnir tveir hífðir um borð. Sigmaðurinn fór síðastur frá flutningaskipinu.

Meðfylgjandi myndband gefur góða innsýn í störf þyrlusveitarinnar og þar má sjá nokkur brot frá frá útkallinu frá sjónarhorni sigmannsins.

Skipverjarnir voru fluttir á Landspítalann í Fossvogi.

Á laugardagskvöldið var áhöfnin aftur kölluð út til að annast sjúkraflutning frá Vestmannaeyjum en vegna veðurs gat sjúkraflugvél ekki Lent í Eyjum. Áhöfnin á TF-GRO, þyrlu Landhelgisgæslunnar, tók á loft frá Reykjavíkurflugvelli á ellefta tímanum og var komin aftur til baka rúmri klukkustund síðar.