អត្ថបទ រឿងអ៊ុយលីសវិលវិញ (សង្ខេបរឿង) - ភាសាខ្មែរ ថ្នាក់ទី៨ (ការស្ដាប់)

Описание: អត្ថបទ រឿងអ៊ុយលីសវិលវិញ (សង្ខេបរឿង) - ភាសាខ្មែរ ថ្នាក់ទី៨ (ការស្ដាប់)

#រឿងអ៊ុយលីសវិលវិញ

កាលពីព្រេងនាយ នាសតវត្សរ៍ដ៏យូរលង់គឺ២៩០០ ឆ្នាំមុននេះ មហាសមុទ្រមេឌីទែរ៉ាណេជាសមុទ្រមួយពោរពេញទៅដោយអាថ៌កំបាំង ការផ្សងព្រេង និងភ័យន្តរាយ។ ដើម្បីឆ្លងពីកោះមួយទៅកោះមួយ នាវាទាំងឡាយដែលចេញបើកបរលើសមុទ្រដ៏ខៀវនេះ មិនហ៊ានចេញចាកឱ្យផុតកន្ទុយភ្នែកពីផ្ទៃដីឡើយ។ គេខ្លាចព្យុះសង្ឃរាណាស់។ គ្មានអ្នកណាម្នាក់ហ៊ានធ្វើដំណើរផ្សងព្រេងឆ្លងពីម្ខាងទៅម្ខាងឡើយ ព្រោះក្នុងចំណោមអ្នកដែលផ្សងព្រេងឆ្លងមេឌីទែរ៉ាណេ ពុំដែលមានអ្នកណាម្នាក់ត្រឡប់មកវិញ ដើម្បីនិយាយប្រាប់យើងនូវរឿងរ៉ាវពិតនោះ ឡើយ។ ហេតុនេះហើយទើបគេតែងសន្និដ្ឋានថា អ្នកផ្សងព្រេងទាំងអស់ ដែលឥតត្រឡប់វិលវិញនោះ ប្រហែលជាបានទៅជួបប្រទេសឆើតឆាយអស្ចារ្យណាមួយ ធ្វើឱ្យគេលែងចង់ត្រឡប់មកស្រុកកំណើតវិញ ឬ មួយក៏អ្នកទាងនោះវង្វេងរកផ្លូវវិលត្រឡប់មកផ្ទះវិញមិនឃើញ។ ខ្វះអ្វីនាវឹកនៅស្រុកក្រិចច្រើនរាប់មិនអស់ ដែលឥតត្រឡប់មកស្រុកកំណើតវិញ។

រាល់ហេមន្តរដូវ នៅឈូងសមុទ្រក្រិចគេតែងឃើញទូកក្ដោង នាវា សំពៅ រាប់រយពាន់ ចុះទឹកបណ្ដែតខ្លួនដូចពោងពាយរាយពាសពេញផ្ទៃសមុទ្រដ៏ខៀវស្រងាត់។ ទូកក្ដោង សំពៅ សំប៉ាន ទាំងប៉ុន្មានសុទ្ធតែបានធ្វើឡើងដោយផ្ចិតផ្ចង់តាំងពីរដូវរងារ ត្រៀមខ្លួនឱ្យទាន់ពេលវេលានារដូវក្ដៅ រង់ចាំចេញដំណើរពេលមេឃស្រឡះ ខ្យល់ជំនោរល្អប្រសើរ។ ក្នុងចំណោមនាវឹកទាំងឡាយ មានតាំងពីអ្នកនេសាទ អ្នកជំនួញជួញព្រែ កំណាត់ គ្រឿងទេស ពាង ក្រឡ ដែលគេដឹកដោះដូរពីប្រទេសស៊ីរី អេហ្ស៊ីប ជាដើម។ បើមើលពីចម្ងាយ ទូកក្ដោងទាំងឡាយនេះបណ្ដែតបន្តកន្ទុយបណ្ដាក់គ្នា ក្រងិកក្រងក់ហាក់បីដូចជាសត្វចម្លែកផ្សេងៗ កំពុងវារលើ ផ្ទៃទឹកសមុទ្រមេឌីទែរ៉ាណេ។ រីឯចោរសមុទ្រវិញក៏មិនខ្វះដែរ។ ចោរតែងតែប្លន់ទាំងសំពៅ ទាំងរបស់របរ ទាំងម្ចាស់យកទៅលក់នៅប្រទេសឆ្ងាយៗ ធ្វើជាទាសាទាសីរបស់គេ។ ហេតុនេះហើយបានជាអ្នកនេសាទក្ដី អ្នកជំនួញក្ដី មិនដែលហ៊ានចេញឆ្ងាយពីតំបន់ដែលខ្លួនធ្លាប់ស្គាល់នោះទេ។

មេឌីទែរ៉ាណេ ជាមហាសមុទ្រមួយពោរពេញទៅដោយអាថ៌កំបាំងរាប់មិនអស់។ ព្រឹត្តិការណ៍ទាំងឡាយចេះតែប្រព្រឹត្តទៅរាប់សតវត្សរ៍ ដោយឥតអ្នកណាមួយហ៊ានចាកចេញឆ្ងាយពីផ្លូវដែលខ្លួនធ្លាប់ស្គាល់ឡើយ។ ទើបតែថ្ងៃមួយ មានអ្នកក្លាហានដ៏ឆ្នើមម្នាក់បានត្រូវបង្ខំចិត្តដើម្បីភារកិច្ច និងដើម្បីគោរពកិច្ចសន្យារបស់ខ្លួន ចេញចាកពីតំបន់ដែលគេធ្លាប់ស្គាល់ចូលទៅក្នុងតំបន់ដ៏សែនអាថ៌កំបាំងបំផុតនៃសមុទ្រមេឌីទែរ៉ាណេ។ ជាការពិតណាស់ ផ្លូវថ្មីឥតប្រណីដល់នាវឹកដ៏ឆ្នើមនេះឡើយ។ គ្រោះថ្នាក់និងអាសន្នផ្សេងៗច្រើនរាប់មិនអស់ បានធ្វើឱ្យនាវឹកយើងបាត់ដំណឹងសូន្យឈឹងអស់រយៈម្ភៃឆ្នាំ។ គ្មានអ្នកណាម្នាក់ហ៊ានសន្និដ្ឋានថា គេអាចនៅរស់ជីវិតនៅឡើយ។ ទាំងម្ដាយ ទាំងឪពុក ទាំងប្រពន្ធ ទាំងកូនប្រុសតែមួយគត់របស់គេក៏នឹកសន្និដ្ឋានថា គេច្បាស់ជាស្លាប់បាត់ទៅហើយដែរ។ លើកលែងតែឆ្កែសម្លាញ់របស់គេតែមួយគត់ ដែលសុខចិត្តរង់ចាំម្ចាស់រហូតដល់ចាស់ខ្លួន បាក់ស្លឹកត្រចៀកធ្លាក់ស្ទើរអូសជង្គង់ ក្បាលធ្ងន់សំយុងស្ទើរអូសដី ជើងទាំបួនឈរទ្រេតទ្រោតទ្រខ្លួនដ៏ស្វិតស្គមស្គាំងរបស់វាស្ទើរលែងរួច។ ឆ្កែសម្លាញ់របស់គេ នៅតែរង់ចាំម្ចាស់ដោយក្ដីសង្ឃឹម។ ក្ដីសង្ឃឹមនេះ បានពន្យារពេលវេលាស្លាប់របស់វា។ វាខំប្រយុទ្ធ រក្សាដង្ហើមចុងក្រោយរបស់វាទុកទទួលម្ចាស់។ គ្រាន់តែបានឃើញមុខម្ចាស់សម្លាញ់វាភ្លាម ឆ្កែដ៏ភក្ដីក៏ដាច់ខ្យល់ស្លាប់ទៅដោយបិទភ្នែកយ៉ាងជិតផ្ដិតយកសុភមង្គលដ៏សែនថ្លៃ លាចាកស្ថានមនុស្សលោកក្រោយក្ដីសោកសង្រេងអស់ម្ភៃឆ្នាំ។

ម្ភៃឆ្នាំចាំម្ចាស់វិលវិញ អ្នកដំណើរជាម្ចាស់ឆ្កែនេះ បានចេញចាកមាតុភូមិខ្លួនដោយមានទាហានជើងទឹក នាវឹកជាច្រើនហែរហមទៅជាមួយ។ ប៉ុន្តែពេលត្រឡប់មកដល់មាតុភូមិវិញ គេនៅសល់តែម្នាក់ឯងគត់ ស្ទើរឥតសំពត់រំលើខ្លួនទៅទៀត។ ប៉ុន្តែរឿងរ៉ាវសម្បូរបែបអស្ចារ្យទាំងឡាយ ដែលគេនិយាយរ៉ាយរ៉ាប់ប្រាប់យើងវិញ គឺពោរពេញទៅដោយអាថ៌កំបាំងដ៏ចម្លែកអស្ចារ្យជាទីបំផុត។

អ្នកនិពន្ធ៖ អូមែ
ប្រភេទរឿងទេវកថាក្រិច
(ដកស្រង់ចេញពីសៀវភៅរឿងអ៊ុយលីសវិលវិញ របស់លោកពុទ្រី ទត់ ឆ្នាំ២០០៤)


ប្រសិនជាប្រិយមិត្តអ្នកស្ដាប់ទាំងអស់មានបំណងចង់ឧបត្ថម្ភគាំទ្រ និងលើកទឹកចិត្តចំពោះការផលិតអត្ថបទការស្ដាប់ជាសំឡេងរបស់ខ្ញុំ ក៏អាចចូលរួមឧបត្ថម្ភបានតាមរយៈ៖
គណនីអេស៊ីលីដាទាន់ចិត្ត ៖ 1287-0708-0
ឬ គណនីធនាគារអេស៊ីលីដា៖ 34760356300515
ឬ Facebook Page :   / edumediacambodia  

To get more news, knowledge and entertainment on
Facebook Page:   / edumediacambodia