សភាកម្ពុជាអនុម័តសម្រេចលុបចោលកិច្ចព្រមព្រៀង CLV DTA ជាផ្លូវការ

Описание: សភាកម្ពុជាអនុម័តសម្រេចលុបចោលកិច្ចព្រមព្រៀង CLV-DTA ជាផ្លូវការ

នៅថ្ងៃសុក្រទី៨វិច្ឆិកាព្រឹកម៉ិញនេះ រដ្ឋសភាកម្ពុជាបានអនុម័តជាឯកច្ឆន្ទ លុបចោលកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ជាផ្លផ្លូវការ។
រដ្ឋសភាកម្ពុជាបានសម្រេចលុបចោលកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ជាផ្លូវការ ដូចការគ្រោងទុក នៅថ្ងៃសុក្រទី៨វិច្ឆិកានេះ ។ ការអនុម័តនេះគឺធ្វើឡើងជាឯកច្ឆន្ទ ដោយសមាជិករដ្ឋសភាចូលរួមគាំទ្រចំនួន ១០៩សំឡេង។ អ្វីជាការកត់សម្គាល់ កិច្ចប្រជុំរដ្ឋសភានេះក៏មានការចូលរួមពីសំណាក់លោកនាយករដ្ឋមន្រ្តីហ៊ុន ម៉ាណែត និងមន្រ្តីជាន់ខ្ពស់របស់រដ្ឋាភិបាលកម្ពុជាផងដែ។
រដ្ឋសភាកម្ពុជាបានអះអាងថា ការអនុម័ត លុបចោលកិច្ចព្រមព្រៀង CLV-DTA នឹងមិនជាបញ្ហាអ្វីនោះទេសម្រាប់ប្រទេសទាំងបី។ រដ្ឋសភាកម្ពុជាក៏មានជំនឿថា ប្រទេសកម្ពុជា ឡាវ និងវៀតណាមមានសមត្ថភាពគ្រប់គ្រាន់ក្នុងការបន្ត និងរក្សានូវការអភិវឌ្ឍន៍ប្រទេសរៀងៗខ្លួន។រដ្ឋសភាកម្ពុជាបានរំលឹកថា កិច្ចសហប្រតិបត្តិការតំបន់អភិវឌ្ឍន៍ត្រីកោណរវាងកម្ពុជា ជាមួយឡាវ និងវៀតណាមក្នុងរយៈពេល ២៥ឆ្នាំកន្លងមកនេះបាននាំឱ្យប្រទេសទាំង ៣ឈានសម្រេចគោលដៅជាតិ និងព្រឹត្តិការណ៍សំខាន់ៗជាច្រើនដែលរួមចំណែកដល់ការអភិវឌ្ឍសេដ្ឋកិច្ច និងការលើកកម្ពស់ជីវភាពប្រជាជនក្នុងតំបន់។
គួរបញ្ជាក់ថា នៅមុនការសម្រេចរបស់រដ្ឋសភានេះ ក្រុមអ្នកនាំពាក្យរដ្ឋាភិបាលកម្ពុជាធ្លាប់បានចេញសេចក្តីថ្លែងការណ៍ កាលពីថ្ងៃទី២៩តុលាដែរថា ការដកខ្លួនចេញពីតំបន់អភិវឌ្ឍន៍រួមជាមួយឡាវ និងវៀតណាម មិនចាំបាច់ឆ្លងរដ្ឋសភា និងឡាយព្រះហស្ថលេខាពីព្រះមហាក្សត្រទេ ព្រោះវាជាកិច្ចសហប្រតិបត្តិការធម្មតារវាងរដ្ឋាភិបាលនៃប្រទេសទាំង ៣។
សំណុំរឿងតំបន់ត្រីកោណ CLV-DTA ជាប្រធានបទដ៏ក្តៅគគុករវាងអ្នកនយោបាយប្រឆាំង និងរដ្ឋាភិបាល ហើយក៏ជាប្រធានបទដែលពលរដ្ឋខ្មែរជាច្រើនយកចិត្តទុកដាក់ និងសម្តែងការព្រួយបារម្ភជុំវិញអធិបតេយ្យភាព និងបូរណភាពទឹកដី។ បន្ទាប់ពីមានបាតុកម្មជាបន្តបន្ទាប់របស់ប្រជាជនខ្មែរនៅបរទេស រដ្ឋាភិបាលកម្ពុជាបានសម្រេចកាលពីថ្ងៃទី២០ ខែកញ្ញា ឆ្នាំ២០២៤ ដកខ្លួនចេញពីកិច្ចសហប្រតិបត្តិការ CLV-DTAជាមួយវៀតណាម និងឡាវ ក្រោមហេតុផលគិតគូពីក្តីកង្វល់របស់ប្រជាជនកម្ពុជាលើបញ្ហាទឹកដី និងភាពចាំបាច់ខាងនយោបាយ។ នៅក្នុងក្រសែភ្នែកសាធារណជនមួយចំនួន ការដកខ្លួនរបស់រដ្ឋាភិបាលកម្ពុជាចេញពីគម្រោងអភិវឌ្ឍន៍ CLV-DTA នេះនៅតែបន្សល់ស្នាមស្រពិចស្រពិល។ ស្រពិចស្រពិលពីព្រោះថា ទោះបីកម្ពុជាដកខ្លួនចេញ តែកម្ពុជានៅតែអះអាងពីការបន្តពង្រឹងកិច្ចសហប្រតិបត្តិការត្រីភាគីជាមួយឡាវ និងវៀតណាមដដែល។
គួរជ្រាបថា កម្ពុជា វៀតណាម និងឡាវបានព្រមព្រៀងគ្នាបង្កើតតំបន់អភិវឌ្ឍន៍ត្រីកោណក្នុងឆ្នាំ១៩៩៩ ដោយមានកិច្ចព្រមព្រៀងចំនួន ៥ដូចជា កិច្ចព្រមព្រៀងជំរុញ និងសម្រួលពាណិជ្ជកម្មតំបន់អភិវឌ្ឍន៍ត្រីកោណកម្ពុជា វៀតណាម និងឡាវ ធ្វើឡើងនៅថ្ងៃទី២៣ ខែវិច្ឆិកា ឆ្នាំ២០១៦ និងកិច្ចព្រមព្រៀងធ្វើពាណិជ្ជកម្មដោះដូរទំនិញ និងសេវាជាដើម។ ជាងនេះទៀត ក៏មានកិច្ចព្រមព្រៀងស្ដីពីការដឹកជញ្ជូនតាមផ្លូវគោករវាងកម្ពុជា និងវៀតណាម អនុស្សារណៈយោគយល់គ្នាស្ដីពីការដឹកជញ្ជូនតាមផ្លូវគោករវាងកម្ពុជា និងឡាវ៕