Tərtərdə Ümummilli Liderin anım günü münasibətilə ehsan süfrəsi açılıb.

Описание: Tərtərdə Ümummilli Liderin anım günü münasibətilə ehsan süfrəsi açılıb

Tərtər Rayon İcra Hakimiyyətinin təşkilatçılığı ilə Ümummilli Lider Heydər Əliyevin anım günü ilə əlaqədar ehsan süfrəsi açılıb.

Mərasimdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, YAP rayon təşkilatının sədri Eldar Əsədov, rayon Ağsaqqallar Şurasının sədri və Qərbi Azərbaycan İcmasının Tərtər üzrə nümayəndəsi Faiq Məmmədov, Milli Məclisin deputatı Anar Məmmədovun köməkçisi Elçin Cahangirov, QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov, ziyalılar, şəhid ailələri və idarə, müəssisə və təşkilat rəhbərləri iştirak ediblər.

Tədbirdə əvvəlcə Ümummilli Lider Heydər Əliyevin və torpaqlarımızın suverenliyi uğrunda canlarını qurban vermiş şəhidlərin ruhu bir dəqiqəlik sükutla yad edilib. Ardınca QMİ-nin səlahiyyətli nümayəndəsi, Tərtər Cümə Məscidinin imamı Sadiq Cəfərov tərəfindən Ulu Öndərin əziz xatirəsinə “Qurani-Kərim”dən ayələr və Yasin surəsi oxunub.

Sonra Tərtər Rayon İcra Hakimiyyətinin başçısı Müstəqim Məmmədov çıxış edərək Ümummilli Liderin həyat və fəaliyyətinin Azərbaycan üçün müstəsna əhəmiyyət daşıdığını diqqətə çatdırıb. Vurğulayıb ki, Heydər Əliyevin əziz xatirəsi qədirbilən xalqımız tərəfindən dərin hörmət və ehtiramla yad olunur. Onun siyasi irsi, dövlətçilik təcrübəsi və müdrikliyi Azərbaycan dövlətinin inkişaf yolunun əsasını təşkil edir.

Rayon rəhbəri qeyd edib ki, Ümummilli Liderin müəyyən etdiyi strateji xətt bu gün də ölkəmizin inkişafının aparıcı istiqamətidir. O, çıxışında Heydər Əliyevin Azərbaycan xalqı qarşısındakı tarixi xidmətlərindən, müstəqil dövlətçiliyimizin möhkəmləndirilməsi və xalqın birliyinin təmin olunması istiqamətində gördüyü əvəzsiz işlərdən geniş şəkildə bəhs edib. Rayon rəhbəri bildirib ki, Heydər Əliyevin ən böyük əsəri–müasir, müstəqil və güclü Azərbaycan bu gün onun layiqli davamçısı Prezident İlham Əliyevin rəhbərliyi ilə daha da inkişaf edir və dünyada söz sahibinə çevrilib.

Daha sonra Vətən Müharibəsi şəhidləri Rəşad Mirzəlinin anası Afidə Mirzəyeva, Elnur Abbasovun atası Yaşar Abbasov, rayon Ağsaqqallar Şurasının sədri və Qərbi Azərbaycan İcmasının Tərtər üzrə nümayəndəsi Faiq Məmmədov, Tərtər Təhsil Sektorunun müdiri Oqtay Sarıkişiyev çıxış edərək Ulu Öndər Heydər Əliyevin müasir Azərbaycanın formalaşmasında və inkişafında oynadığı tarixi roldan danışıblar. Qeyd olunub ki, yalnız yüksək amallara sadiq, möhkəm əqidəli və dəmir iradəli insanlar böyük şəxsiyyət kimi tarixin yaddaşında əbədiləşmək hüququ qazanırlar. Ulu Öndər Heydər Əliyev də belə əbədiyaşar liderlərdəndir–müstəqil Azərbaycanın qurucusu və dünya şöhrətli siyasi xadimidir.