കെ കെ രമ വന്നു, വടകര ചരിത്രം എഴുതി | K K Rema wins from Vatakara, historic victory for UDF

Описание: വടകര മണ്ഡലത്തിനൊരു ചരിത്രമുണ്ട്. 1957ലെ ആദ്യ തിരഞ്ഞെടുപ്പിലൊഴികെ മറ്റെല്ലാ തിരഞ്ഞെടുപ്പുകളിലും സോഷ്യലിസ്റ്റുകള്‍മാത്രം വിജയിച്ച മണ്ണ്. ആ ചരിത്രം കെ.കെ. രമയുടെ കുതിപ്പില്‍ വഴിമാറി. അരനൂറ്റാണ്ടിനുശേഷമാണ് സോഷ്യലിസ്റ്റ് പാര്‍ട്ടിയില്‍നിന്നല്ലാത്ത ഒരാള്‍ വടകരയുടെ ജനപ്രതിനിധിയാകുന്നത്. രമ സ്ഥാനാര്‍ഥിയായതോടെ ആണ് വടകര ശ്രദ്ധാകേന്ദ്രമായത്.സംസ്ഥാനത്തുടനീളം മികച്ചവിജയം നേടിയിട്ടും വടകരയില്‍ ആര്‍.എം.പി.യോട് പരാജയപ്പെട്ടത് ഇടതുപക്ഷത്തിനും പ്രത്യേകിച്ച് സി.പി.എമ്മിനും വലിയ തിരിച്ചടിയായി. തട്ടകമായ വടകരയില്‍ തോറ്റത് എല്‍.ജെ.ഡി.ക്കും ക്ഷീണമായി. അതേസമയം, ആര്‍.എം.പി.യെ മുന്നില്‍നിര്‍ത്തി പോരാട്ടം നയിച്ച യു.ഡി.എഫിന് വടകരയിലെ ജയം ആശ്വാസംപകരുന്നതായി. സോഷ്യലിസ്റ്റുകളുടെയും കമ്യൂണിസ്റ്റുകളുടെയും തട്ടകമായ വടകര യു.ഡി.എഫിന് എന്നും ബാലികേറാമലയായിരുന്നു. കഴിഞ്ഞ രണ്ട് നിയമസഭാതിരഞ്ഞെടുപ്പുകളില്‍ ജനതാദളിലെ പ്രബലമായ വിഭാഗം യു.ഡി.എഫിനൊപ്പമായിട്ടും ജയിക്കാന്‍ സാധിച്ചില്ല. അന്ന് ആര്‍.എം.പി. തനിച്ചുമത്സരിച്ചിരുന്നു. ഇത്തവണ അങ്ങനെ മത്സരിച്ചാല്‍ എല്‍.ഡി.എഫ്. വിരുദ്ധവോട്ടുകള്‍ ഭിന്നിക്കപ്പെടും എന്നതിനാല്‍ അടവുനയം സ്വീകരിക്കാന്‍ ആര്‍.എം.പി. തീരുമാനിക്കുകയായിരുന്നു. മറ്റെല്ലായിടത്തും എല്‍.ഡി.എഫ്. അനുകൂലതരംഗമുണ്ടായിട്ടും വടകരയില്‍ ഇതുഫലിക്കാതെ പോയതിന്റെ കാരണം കെ.കെ. രമയുടെ സ്ഥാനാര്‍ഥിത്വവും ടി.പി. ചന്ദ്രശേഖരന്‍ വധവുമാണെന്നാണ് വിലയിരുത്തല്‍. ടി.പി. ചന്ദ്രശേഖരന്റെ ചോരയ്ക്ക് കണക്കുപറയാനാണ് ടി.പി.യുടെ ഭാര്യ രമ വടകരയില്‍ മത്സരിക്കുന്നതെന്ന പ്രഖ്യാപനവുമായാണ് ആര്‍.എം.പി. മത്സരരംഗത്തെത്തിയത്. പ്രചാരണത്തിലുടനീളം അവര്‍ ടി.പി.വധവും അക്രമരാഷ്ട്രീയവും ഉയര്‍ത്തിപ്പിടിച്ചു. എന്നാല്‍, എല്‍.ഡി.എഫ്. ടി.പി.യുടെയോ രമയുടെയോ പേരുപോലും ഉച്ചരിക്കാതെ ആ ചര്‍ച്ചകളില്‍നിന്ന് തന്ത്രപൂര്‍വം ഒഴിഞ്ഞുമാറി. വികസനം മാത്രം ഉയര്‍ത്തിപ്പിടിച്ചു. ഒമ്പതുവര്‍ഷം കഴിഞ്ഞിട്ടും ടി.പി. വധം വടകര മറന്നിട്ടില്ലെന്ന് പ്രചാരണത്തില്‍ വ്യക്തമായിരുന്നെന്ന് ആര്‍.എം.പി. നേതാക്കള്‍ പറയുന്നു.