ထိုင်းနိုင်ငံမှာ Cobra Gold စစ်ဆင်ရေး လေ့ကျင့် | People's Spring

Описание: ထိုင်းနိုင်ငံမှာ Cobra Gold စစ်ဆင်ရေး လေ့ကျင့်

ထိုင်းနိုင်ငံမှာ ပြုလုပ်နေတဲ့ Cobra Gold နိုင်ငံတကာ စစ်ရေးလေ့ကျင့်မှုမှာ ထိုင်း၊ အမေရိကန်၊ တောင်ကိုရီးယားနဲ့ စင်ကာပူ တပ်ဖွဲ့ဝင်တွေဟာ ကမ်းတက် စစ်ဆင်ရေးတွေကို လက်တွေ့ လုပ်ဆောင်ခဲ့ပါတယ်။

ကမ်းတက်စစ်ဆင်ရေး ပူးပေါင်းလုပ်ဆောင်မှုဟာ ဖေဖော်ဝါရီ ၂၄ ရက်နေ့က စတင်တဲ့ Cobra Goldရဲ့ အစိတ်အပိုင်း တစ်ခုဖြစ်ပါတယ်။ အရှေ့တောင်အာရှ ဒေသရဲ့ အကြီးမားဆုံး နိုင်ငံတကာ စစ်ရေးလေ့ကျင့်မှု အစီအစဉ်ကြီးကို ထိုင်းနဲ့ အမေရိကန်တို့က ကမကမထပြုပြီး မတ်လ ၆ ရက်နေ့ထိ ပြုလုပ်သွားမှာပါ။

ထိုင်းကာကွယ်ရေး ဝန်ကြီးဌာနက အခုနှစ် Cobra Gold စစ်ရေးလေ့ကျင့်မှုတွေမှာ နိုင်ငံပေါင်း ၃၀ လောက်က ပါဝင်သူတွေ၊ လေ့လာသူတွေအဖြစ် ချိတ်ဆက်ထားပြီး စစ်သည် အင်အား ၈၀၀၀ လောက် ပူးပေါင်းလေ့ကျင့်မယ်လို့ ကြေညာထားပါတယ်။ စင်ကာပူ၊ အင်ဒိုနီးရှား၊ ဂျပန်၊ တောင်ကိုရီးယားနဲ့ မလေးရှားတို့က စစ်ရေး လေ့ကျင့်မှုတွေမှာ ထိုင်း၊ အမေရိကန်တို့နဲ့အတူ ပါဝင်ကြပြီး နိုင်ငံအများအပြားက လေ့လာသူတွေအဖြစ် တက်ရောက်ခဲ့ကြပါတယ်။

ဖေဖော်ဝါရီ ၂၇ ရက်နေ့၊ ကမ်းတက်စစ်ရေးလေ့ကျင့်မှုတွေမှာတော့ အမေရိကန်ဟာ ကမ်းတက် ချေမှုန်းရေး စစ်ရေယာဉ် USS Ashleyကို တိုက်ခိုက်ရေး ရဟတ်ယာဉ်တွေ၊ တခြား စစ်သုံး ယန္တရားတွေနဲ့အတူ အသုံးပြုခဲ့ပါတယ်။ ထိုင်းရေတပ်ကတော့ HTMS Chang၊ THMS Wang Nai၊ HTMS Thonglang ရေယာဉ်တွေ၊ ကမ်းတက် ချေမှုန်းရေး ယာဉ်တွေ၊ သယ်ယူပို့ဆောင်ရေး ရဟတ်ယာဉ်တွေကို ထုတ်သုံးခဲ့ပြီး မရိန်းတပ်ဖွဲ့ဝင်တွေက ပါဝင် လေ့ကျင့်ခဲ့ပါတယ်။

တောင်ကိုရီးယားကတော့ အဲဒီ အစီအစဉ်မှာ ပါဝင်ဖို့ ကမ်းတက်ရေယာဉ် ROKS No Jeok Bongနဲ့ ကုန်းရေနှစ်တန်သွား KAAV အမျိုးအစား ယာဉ်တွေကို စေလွှတ်ခဲ့ပါတယ်။ စင်ကာပူ ရေတပ်ရဲ့ RSS Endeavour ကမ်းတပ် တိုက်ရေယာဉ်ကို လေ့ကျင့်မှုမှာ ပူးပေါင်းစေခဲ့ပါတယ်။

Cobra Goldကို ထိုင်းနိုင်ငံရဲ့ ပြည်နယ်တချို့မှာ မတူညီတဲ့ အပိုင်းတွေ ခွဲခြားသတ်မှတ်ပြီး လေ့ကျင့်ရေးတွေ ဆောင်ရွက်နေပါတယ်။ အဲဒီ စစ်ရေးလေ့ကျင့်မှုတွေကို ၁၉၈၂ မှာ စတင်ခဲ့ပြီး နှစ်စဉ် ကျင်းပခဲ့သလို အခုတစ်ခေါက်က ၄၅ ကြိမ်မြောက် ဖြစ်ပါတယ်။

မြန်မာစစ်တပ်ဟာ ၂၀၁၈ မှာတော့ လေ့လာသူအဖြစ် Cobra Goldမှာ ပါဝင်ဖို့ ဖိတ်ကြားခံခဲ့ရပါတယ်။ ရိုဟင်ဂျာတွေအပေါ် ဆိုးရွားတဲ့ ဖိနှိပ်မှုတွေ ကျူးလွန်ခဲ့ကြောင်း နာမည်ဆိုး ထွက်နေတဲ့ စစ်တပ်ကို ဖိတ်ကြားခဲ့တဲ့အတွက် Cobra Goldဟာ ဝေဖန်မှုတွေနဲ့လည်း ရင်ဆိုင်ခဲ့ရပါတယ်။ အာဏာသိမ်းမှုအပြီး ၂၀၂၂ ကစလို့ မြန်မာစစ်တပ်ရဲ့ Cobra Goldမှာ ပါဝင်ခွင့်လည်း ဖယ်ရှား ခံခဲ့ရပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA