Psalm 91 in Konkani || Keerthan 91 || ಕೀರ್ತನ್ 91 ದೇವ್ ರಾಕಣ್ದಾರ್

Описание: Psalm 91 in Konkani || Keerthan 91 || ಕೀರ್ತನ್ 91 ದೇವ್ ರಾಕಣ್ದಾರ್
91:1 ಜೊ ಮನಿಸ್ ಪರಮೋನ್ನತ್ ದೆವಾಚ್ಯಾ ಆಸ್ರ್ಯಾಂತ್ ರಾವ್ತಾ,ಆನಿ ಸರ್ವ್ ಪದ್ವೆದಾರಾಚೆ ಸಾವ್ಳೆಂತ್ ವಸ್ತಿ ಕರ್ತಾ

91:2 ತೊ ಸರ್ವೆಸ್ಪರಾಕ್ ಮ್ಹಣ್ತಾ : "ತುಂ ಮ್ಹಜೊ ಆಸ್ರೊ ಆನಿ ಮ್ಹಜೆಂ ಕೊಟೆಂ, ತುಂ ಮ್ಹಜೊ ದೇವ್, ತುಜೆರ್ ದವರ್ತಾಂ ಮ್ಹಜೊ ವಿಶ್ವಾಸ್.

91:3 ತೊ ತುಕಾ ನಿವಾರ್ತಲೊ ಶಿಕಾರ್ಯ್ಯಾಚ್ಯಾ ಪಾಸಾಂತ್ಲೊ ಆನಿ ಮರ್ಣಾಂತಿಕ್ ಪಿಡೆಂತ್ಲೊ.

91:4 ಆಪ್ಲ್ಯಾ ಪಾಕಾಂನಿ ತೊ ತುಕಾ ಧಾಂಪ್ತಲೊ, ತಾಚ್ಯಾ ಪಾಕಾಟ್ಯಾಂ ಪಂದಾ ತುಕಾ ಆಸ್ರೊ ಮೆಳ್ತಲೊ. ಢಾಲ್ ಆನಿ ಕವಚ್ ತಾಚೆಂ ವಿಶ್ವಾಸಿಪಣ್.

91:5 ರಾತ್ಚ್ಯಾ ಆಕಾಂತಾಂಚಿ, ದಿಸಾ ವೆಳಾರ್ ಉಬ್ತಲ್ಯಾ ಬಾಣಾಚಿ ಕಸಲಿಚ್ ಭಿರಾಂತ್ ತುಕಾ ಆಸ್ಚಿ ನಾ.

91:6 ಕಾಳೊಕಾಂತ್ ಭೊಂವ್ತಲೆ ಮಾರಿಚೆ ಪಿಡೆಕ್, ದೊನ್ಪಾರ್ಚೆಂ ನಾಸ್ ಕರ್ತಲ್ಯಾ ಖರ್ಗಾಕ್ ತುಂ ಭಿಯೆಂವ್ಚೊ ನಾಂಯ್.

91:7 ತುಜೆ ಕುಶಿಕ್ ಹಜಾರ್ ಜಣ್ ಮರುನ್ ಪಡ್ತಿತ್ ಆನಿ ತುಜ್ಯಾ ಉಜ್ವ್ಯಾಕ್ ಧಾ ಹಜಾರ್, ತರೀ ತುಜೆ ಸರ್ಶಿಂ ಕಸಲೆಂಚ್ ವಾಯ್ಟ್ ಪಾಂವ್ಚೆಂ ನಾ.

91:8 ಖರೆಂಚ್, ತುಂ ತುಜ್ಯಾಚ್ ದೊಳ್ಯಾಂನಿ ಪಳೆತಲೊಯ್ ಆನಿ ನಷ್ಟ್ಯಾಂಕ್ ಕಸಲಿ ಮಜುರಿ ಫಾವೊ ಜಾತಾ ಮ್ಹಣ್ ದೆಕ್ತಲೊಯ್.

91:9 ಕಿತ್ಯಾಕ್ ಸರ್ವೆಸ್ಪರ್ ತುಜೊ ಆಸ್ರೊ, ಪರಮೋನ್ನತ್ ದೆವಾಕ್ ತುವೆಂ ತುಜೆಂ ಕೊಟೆಂ ಕರುನ್ ಘೆತ್ಲಾಯ್.

91:10 ಕಸಲೆಂಚ್ ವಾಯ್ಟ್ ತುಜೆರ್ ಯೆಂವ್ಚೆಂ ನಾ, ಮಾರಿಚಿ ಪಿಡಾ ತುಜ್ಯಾ ತಂಬಾ ಸರ್ಶಿಂ ಪಾಂವ್ಚಿ ನಾ;

91:11 ತುಜ್ಯಾ ಸಗ್ಳ್ಯಾ ವಾಟಾಂನಿ ತುಕಾ ರಾಕ್ಚ್ಯಾಕ್ ಆಪ್ಲ್ಯಾ ದುತಾಂಕ್ ತಾಣೆಂ ಆಜ್ಞಾ ದಿಲ್ಯಾ.

91:12 ಫಾತ್ರಾಕ್ ತುಜೊ ಪಾಂಯ್ ಆದಳ್ನಾ ಜಾಂವ್ಚ್ಯಾಕ್ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳುನ್ ಧರ್ತಲೆ.

91:13 ಶಿಂವಾಚೆರ್ ಆನಿ ಸೊರ್ಪಾಚೆರ್ ತುಂ ಚಲ್ತಲೊಯ್, ತರುಣ್ ಶಿಂವಾಕ್ ಆನಿ ನಾಗಾಕ್ ಮಸ್ತಿತಲೊಯ್.

91:14 "ತೊ ಮ್ಹಜೊ ಮೋಗ್ ಕರ್ತಾ ದೆಕುನ್ ಹಾಂವ್ ತಾಕಾ ನಿವಾರ್ತಲೊಂ, ಮ್ಹಜೆಂ ನಾಂವ್ ತೊ ಒಳ್ಕತಾ ದೆಕುನ್ ಹಾಂವ್ ತಾಕಾ ರಾಕ್ತಲೊಂ.

91:15 ತೊ ಮ್ಹಾಕಾ ಉಲೊ ಮಾರ್ತಾನಾ ಹಾಂವ್ ತಾಕಾ ಜಾಪ್ ದಿತಾಂ, ಆಕಾಂತಾಂತ್ ಹಾಂವ್ ತಾಚೆ ಲಾಗಿಂ ಆಸಾಂ, ತಾಕಾ ನಿವಾರ್ತಾಂ ಆನಿ ತಾಕಾ ಸನ್ಮಾನ್ ಕರ್ತಾಂ.

91:16 ಲಾಂಬ್ ಆವ್ಕ್ ದಿವ್ನ್ ತಾಕಾ ಧಾದೊಶಿ ಕರ್ತಾಂ, ಮ್ಹಜೆಂ ತಾರಣ್ ಪಳೆಂವ್ಕ್ ತಾಕಾ ಫಾವೊ ಕರ್ತಾಂ.

ಆಮೆನ್.