Aktrisalığı atıb masajistliyə başladı, Həyat yoldaşından boşandı, Azərbaycan çempionu oldu

Описание: Natəvan Məmmədova 7 mart 1966-cı ildə Bakıda anadan olub. Moda Evinin işçisi olan anası Flora Məmmədova tanınmış dərzi-dizayner kimi fəaliyyət göstərib. Natəvan xanımın qonşusu Arzu Ələsgərova aktrisa haqqında öz xatirələrində yazıb: “Yadımdadır, köhnə evimizdə biz kommunal şəraitdə yaşayırdıq. Mətbəx, ayaqyolu ümumi idi. Natəvan, anası Flora xanım və böyük bacısı bizimlə qonşu idi. Flora xanım tatar qızı idi, dərziliklə məşğul idi. Biz geniş birotaqlıda, onlar isə balaca ikiotaqlıda yaşayırdılar. Nata 15 saylı məktəbin şagirdi idi. O, heyvanları çox sevirdi. Mənzildə bir çox heyvan növündən saxlayırdılar. Sakit, mehriban qonşu olmuşdular bizə. Bizim otaqda divar qaz sobası var idi. Sobanın arxa tərəfi onların yataq otaqlarına düşürdü. Qışda sobanı yandıranda onların da evi isinirdi”.
Natəvan xanımın kinodakı ilk işi 17 yaşında olub. O, 1983-cü ildə rejissor Rasim Ocaqovun çəkdiyi “Park” filmində əsas rollardan birini ifa edib.
Aktrisanın sözlərinə görə, gənc yaşlarında anası Flora xanımın çalışdığı Bakı Moda Evində model kimi tikilən paltarları nümayiş etdirirmiş. Günlərin birində rejissor Rasim Ocaqovun assistenti onun şəkillərini jurnalda görüb. O ərəfədə də Ocaqov “Park” filminə çəkmək üçün gənc qız axtarırmış və rejissor öz assistentinin köməyi ilə Natəvanı çəkilişlərə dəvət edib. Aktrisa həmin günləri xatırlayarkən deyib: “Əslində, mən çəkilmək istəmirdim, çünki məqsədim ali məktəbə daxil olmaq idi. Bəlkə də bəzilərinə qəribə görünə bilər, çoxları, xüsusən də o yaşda olan insanlar filmlərdə rol almağı xəyal edir, amma həqiqətən mənim üçün maraqsız idi, aktrisa olmaq, ümumiyyətlə, planlarıma daxil belə deyildi. O zaman mən sevdiyim oğlanla qərara almışdıq ki, hər ikimiz ali məktəbə daxil olandan sonra evlənək. O da mənim kinoya çəkilməyimin qəti əleyhinə idi. Bilmirəm, rejissor assistenti sevdiyim oğlana nə dedi, nə demədi və o da başladı məni dilə tutmağa ki, təklif olunan roldan imtina etməyim. Sonra da məni “Azərbaycanfilm” kinostudiyasına - rejissor Rasim Ocaqovun yanına apardılar. Biz onunla xeyli söhbət etdik. Rasim müəllim çox mədəni insan idi və eyni zamanda öz işinin ustasıydı. O, söhbətimizin gedişində məni filmə çəkilməyə razı sala bildi... “Park” filminə çəkiləndən sonra digər rejissorlardan da dəvət almağa başladım”.

“Park”a çəkiləndən bir il sonra Natəvan Məmmədovanı “Tənha narın nağılı” filminə dəvət ediblər. Aktrisa isə "yox, bir filmə çəkildim bəsdir! Oxumaq, ali təhsil almaq istəyirəm!" - deyib. Amma yekunda yenə çəkilməyə razılaşıb. Bu filmdən sonra rejissorların diqqətini çəkib və ard-arda təkliflər gəlməyə başlayıb. O, “Tənha narın nağılı”nda Surət, “Bəyin oğurlanması”nda Yasəmən və “On yeddi yaşlı oğlan” filmində Məleykə obrazlarını yaradıb. Onu tamaşaçılara daha cox tanıdan obraz isə “Bəyin oğurlanması” filmindəki Yasəmən obrazı olub. Sənətçi filmdə baş verən maraqlı əhvalatlar barədə deyib; "Çəkilişlər Şamaxı rayonunda üzüm yığımı mövsümündə aparılırdı. Bizə demisdjlər ki, qaldığımız oteldən çıxmayaq, əks halda, “oblava”ya düşüb üzüm yığımına aparıla bilərik. Arif Quliyev bu məsləhətə qulaq asmayıb gəzməyə çıxanda polis onu yaxalayıb dərhal üzüm bağına aparmışdı. O, aktyor olduğunu və filmdə çəkilmək üçün Şamaxıya gəldiyini nə qədər izah etməyə çalışsa da, Arif müəllimə inanmamışdılar. Yalnız üç saatdan sonra polislərindən biri Arif Quliyevi tanımış və onu sərbəst buraxmışdılar.

Bir müddət sonra Natəvan xanım Bakı Memarlıq və İnşaat Universitetinin Memarlıq fakültəsinə daxil olaraq ali təhsil alıb və memarlıq üzrə magistr dərəcəsinə yiyələnib. Onu. həyatında idmanla da bağlı faktlar var. Memar olan Natəvan 90-cı illərin əvvəllərində Azərbaycanda populyar olan Şərq əlbəyaxa döyüş növləri ilə maraqlanıb. Bakı idman məktəblərinin birində kunq-fu ilə məşğul olan Natəvan bu yöndə olan yarışlara qatılaraq, parlaq nəticələr əldə edib. O, kunq-fu üzrə Azərbyacan çempionatında iki il ard-arda ölkə çempionu olub.
90-cı illərin ortalarında ailə həyatı quraraq həyat yoldaşı və azyaşlı oğlu ilə birgə Azərbaycanı tərk edərək İsrailə köçüb. Hal-hazırda İsrailin Netayna şəhərində yaşayır və birgə yola çıxdığı həyat yoldaşından orada ayrılıb. Əri başqası ilə evlənsə də, o, ikinci dəfə ailə həyatı qurmayıb. 55 yaşlı aktrisa İsraildə nə kino sahəsində, nə də ixtisası üzrə memar işləmir. Onun sözlərinə görə hələ Bakıda Kunq-fu Federasiyasında məşqçi olduğu müddətdə masaj etmənin sirlərini öyrənməyi İsraildə köməyinə çatıb. Belə ki, orada masaj kursu keçən azərbaycanlı xanım hazırda həm kineziologiya ilə, həm də kosmetologiya ilə məşğuldur.