ខ្លឹមសារ “មាឃបូជា”

Описание: ខ្លឹមសារ “មាឃបូជា”
១. មាឃបូជាវិសេសក្រៃ ថ្ងៃព្រះពុទ្ធថ្លៃប្រជុំសង្ឃ
មួយពាន់ពីររយហាសិបអង្គ ប្រៀបបានដូចហង្សស្ដេចបក្សា។
២. មាឃបូជាជ្រះថ្លាពិត យើងខ្ញុំជុំជិតស្ដាប់ទេសនា
ឱវាទបាតិមោក្ខល្អថ្លៃថ្លា ក្នុងចិត្តប្រាថ្នាព្រះធម្មា។
៣. ឱវាទពិសេសល្បីរន្ធឺ យើងខ្ញុំតែងលឺបីអង្គា
ទីមួយហាមប្រាមទាំងអស់គ្នា ជៀសវៀងពាលាអំពើបាប។
៤. ទីពីរធ្វើល្អជាប់ចិន្តា ជាប់តាមកាយាជាដរាប
សន្សំកុសលដោយឱនក្រាប លះបង់ធម៌បាបក្រាបវន្ទា។
៥. ទីបីជម្រះចិត្តឱ្យស្អាត ធ្វើទានដាក់បាត្រចិត្តស្អាតជា
ចូលរួមថ្ងៃបុណ្យមាឃបូជា លះចិត្តនិន្ទាពីសន្ដាន។
៦. មាឃបូជាថ្ងៃសោកា ថ្ងៃព្រះសាស្រ្តានឹង​ចែកឋាន
ទ្រង់ដាក់សង្ខារតាមលំអាន បីខែទៀតបានចូលនិព្វាន។
៧. សូមមាឃបូជាដែលបានធ្វើ ជ្រះថ្លាអន្លើដោយសីលទាន
ទុក្ខសោកទាំងឡាយកុំបីមាន សូមពាក្យស្លេកឃ្លានកុំមានឡើយ។
៨. សូមឱ្យព្រះពុទ្ធសាសនា រុងរឿងថ្លៃថ្លាបានដល់ត្រើយ
ប្រាំពាន់ឆ្នាំកុំបីខានឡើយ នាំគ្នាកៀកកើយជាប់ព្រះធម៌។
៩. សូមខេមរជនប្រុសស្រី នាំគ្នាឃ្មាតខ្មីចិត្តបវរ
ចងចាំខ្លឹមសារទាំងបីខ នាំគ្នាធ្វើល្អវៀរសុរា។
១០. ដោយអំណាចមាឃបូជា យើងទាំងអស់គ្នាគ្រប់រូបា
សីលសមាធិនិងបញ្ញា តាំងចិត្តរក្សាជានិរន្តន៍។

អនុមោទនា!
និពន្ធដោយ៖ភិក្ខុរតនវីរោ សំ សោភ័ណ