ЕКПЕ ЖАСАУ ДЕРТКЕ ДАУА МА?

Описание: Екпе жасау дертке дауа ма, болмаса әлдекімдердің табыс табу көзі ме? «Екпе» десе елдің есі шығатын болды. Ата-аналардың дәрігерлерге сенімсіздік танытуы да бекер емес. Елімізде, соңғы кездері егуден кейін ес түстен айырылып, түрлі жағдайға шалдыққандар болған еді. Қазіргі күні жаңа екпелердің нәтижесі қандай? Арна тілшілері анықтап көрді. Эпидемиологиялық маусым басталғалы бері облыстағы медициналық мекемелер есігін қағып келушілер саны артқан. Бірі тұмау болса, енді бірі респираторлы вирусты инфекция бойынша шағымдануда. Ауа райының құбылуы да жағдайды ушықтыра түсуде. Бүгінгі күні 9000-ға жуық адам дәрігер көмегіне жүгінген. Зерттеу нәтижесінде оның 136-сы тұмау екендігі анықталған. Қазіргі таңда тұмаудың А түрі ауырғандардың -47 пайызын, Б түрі бойынша 53 пайызды құрап отыр. Айта кету керек, бір ғана қазан-қараша айларында 120 мыңға жуық қала тұрғыны арнайы екпе салдыртқан. Биыл егу жұмыстары үшін көршілес Ресейден әкелінген «Гриппол плюс» пайдаланылған. Осы орайда шаһар тұрғындарының пікірін білген едік. Міндетті екпені салдыртуға қарсы жандарды да жиі кездестіруге болады. Олардың айтуынша мұндай шаралардың пайдасы шамалы. Десек те, мамандар егу жасатқан азаматтар тұмаумен ауырмайды дегенді алға тартады. Тіпті, вирусты жұқтырған жағдайда аурудың жеңіл өтетіндігіне сендіреді. Алайда, осындай маусымда вакцина құрамына кірмейтін вирусты жұқтыру мүмкін екендігін жасырмады.