ပေါက်မှာစစ်တပ်က တော်လှန်ရေးတပ်ဖွဲ့ဝင်အပါ ၂ ဦးကိုသတ်ပြီး တိုက်ပွဲဖြစ်

Описание: ပေါက်မှာစစ်တပ်က တော်လှန်ရေးတပ်ဖွဲ့ဝင်အပါ ၂ ဦးကိုသတ်ပြီး တိုက်ပွဲဖြစ်

ပေါက်၊ ဖေဖော်ဝါရီ ၃၊ ၂၀၂၆။

မကွေးတိုင်း၊ ပေါက်မြို့နယ်၊ ထန်းတောလည်ရွာမှာ စစ်ကြောင်းထိုးလာတဲ့ စစ်ကော်မရှင်ပူးပေါင်းတပ်တွေက ဒေသခံကာကွယ်ရေးတပ်ဖွဲ့ဝင် ၁ ဦးနဲ့ လူငယ်အမျိုးသား ၁ ဦးကိုသတ်ပြီး တိုက်ပွဲတွေဖြစ်ခဲ့တယ်လို့ မြိုင်မြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဇန်နဝါရီ ၂၁ ရက် နေ့လယ် ၁၀ နာရီ လောက်က စစ်ကော်မရှင်ပူးပေါင်းတပ်တွေ စစ်ကြောင်းထိုးလာချိန် ထန်းတောလည်ရွာအနီးမှာ ပခုက္ကူခရိုင် အမှတ် ၁၂ တပ်ရင်းမှ ၂၁ နှစ်အရွယ်တပ်ဖွဲ့ဝင် ဟိန်းထက်နဲ့ စမ်းရေကုန်းရွာက ၁၆ နှစ်အရွယ် အမျိုးသား ၁ ဦးကိုဖမ်းဆီးပြီး သတ်ခဲ့တာလို့ မြိုင်မြို့နယ်ပြည်သူ့ ကာကွယ်ရေးတပ်ဖွဲ့ ဝာာဝန်ရှိသူက ပြောပါတယ်။

အလောင်းတွေကိုတော့ အဲ့ဒီနေ့မှာပဲ ထန်းတောလည်ရွာအတွင်းမှာပြန်တွေ့ခဲ့ပြီး ထန်း‌တောလည်ရွာမှာ သင်္ဂြိုဟ်ခဲ့တယ်လို့ သိရပါတယ်။

အင်အား ၃၀၀ ကျော်ပါတဲ့ အဲ့ဒီစစ်ကြောင်းနဲ့ ဒေသခံတော်လှန်ရေးတပ်တွေဟာ ဇန်နဝါရီ ၂၂ ရက် မနက် ၁၀ နာရီကနေ နေ့လယ် ၃ နာရီအကြား ထန်းတောလည်ရွာအနီးမှာ တိုက်ပွဲဖြစ်ခဲ့ပြီး တိုက်ပွဲအတွင်း စစ်ကော်မရှင်ဘက်က သေဆုံးမှုတွေရှိခဲ့တယ်လို့လည်း မြိုင်မြို့နယ်ပြည်သူ့ကာကွယ်ရေးတပ်ဖွဲ့ ဝာာဝန်ရှိသူက ပြောပါတယ်။

“ထန်းတောလည်ရွာထဲမှာလည်း ကျနော်တို့ တော်လှန်ရေးပူးပေါင်းတပ်တွေနဲ့ **တွေနဲ့ ပစ်ခတ်မှုဖြစ်သေးတယ်။ ၁၀ နာရီကနေ ၃ နာရီလောက်ထိတော့ ကြာတယ်။ ဒါပေမယ့် ဆက်တိုက်ကြီးတော့ ဖြစ်နေတာ မဟုတ်ဘူး။ ခဏခဏ ဖြစ်လိုက်နားလိုက် အဲ့လိုပေါ့။ အဲ့နားက ထန်းတောလည်ရွာထဲက ပစ္စည်းယူပြီး သူတို့ပျူရွာထဲကို ပြန်ပို့တာ။ တပ်ကုန်း(ရွာ)တို့ ပင်ထောင်(ရွာ)တို့ အဲ့ဘက်ထဲကို ပြန်ပို့တာ။ ပြည်သူ့ ပစ္စည်းတွေ။” လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ ဝာာဝန်ရှိသူက ပြောပါတယ်။

အဲ့ဒီနောက်စစ်ကြောင်းက ထန်းတောလည်ရွာကနေ ပြည်သူပိုင်ပစ္စည်းတွေကို သယ်ယူပြီး ဇန်နဝါရီ ၂၃ ရက်မှာ တပ်ကုန်းရွာမှာတပ်စွဲနေခဲ့ပြီး ဇန်နဝါရီ ၂၆ ရက်မနက် ၈ နာရီကျော်မှာလည်း ပေါက်မြို့နယ်၊ တဲတော်ယာတောင်စုကို စစ်ကြောင်းပြန်ထိုးချိန် ထပ်မံတိုက်ပွဲဖြစ်ခဲ့သေးတယ်လို့ ဆိုပါတယ်။

“အတိအကျတော့ မသိရပေမယ့် (တိုက်ပွဲ) ၂ ခုပေါင်းမှာဆိုရင် ပထမ ၁ ခုမှာဆိုရင် ၄/၅/၆ ယောက်ကျော်လောက်တော့ ရှိမှာပေါ့နော်။ မျက်မြင် လဲကျသွားတာမြင်တယ် ဒါပေမယ့် သေတာ မသေတာတော့ မသိရဘူး။ အလောင်းတွေ မီးရှို့သွားတာတော့ တွေ့ရတယ်ပေါ့ ကျနော်တို့ စစ်ကြောင်းခေါက်တော့ (နယ်မြေ)ပြန်ရှင်းတော့ကျတော့။ ဒုတိယ ၁ ကြိမ်ဖြစ်တဲ့အခါမှာလည်း အဲ့လိုပါပဲ။ အတိအကျ မသိရပေမယ့် ၄/၅/၆ ဦးလောက်တော့ ထိတယ်ဗျ။” လို့ သူက ဆက်ပြောပါတယ်။

ဒီတိုက်ခိုက်မှုကို မြိုင်မြို့နယ်ပကဖ၊ ပေါက်ပကဖ၊ ပခုက္ကူခရိုင် အမှတ် (၁)၊ (၅)၊ (၁၁)၊ (၁၂)၊ (၁၈)၊ Young Revolution Front အဖွဲ့တို့က ပူးပေါင်းလုပ်ဆောင်ခဲ့တာဖြစ်ပြီး လက်ရှိမှာ အဲ့ဒီစစ်ကြောင်းဟာ ကပစ ၂၄ ထဲမှာရှိနေတယ်လို့ သိရပါတယ်။

သတင်း - ဒိန်းဂျား၊ တည်းဖြတ် - M

#မြေလတ်အသံ
#မကွေး #ပေါက် #တိုက်ပွဲ #မြိုင် #ပကဖ