បេក្ខជន The Rapper Cambodia ម្នាក់ធ្វើឱ្យ «វណ្ណដា» ស្រក់ទឹកភ្នែកនៅមុខអ្នកគាំទ្ររាប់រយនាក់

Описание: #ប្រាប់លឺៗ #វណ្ណដា #therappercambodia

បេក្ខជន The Rapper Cambodia ម្នាក់ធ្វើឱ្យ «វណ្ណដា» ស្រក់ទឹកភ្នែកនៅមុខអ្នកគាំទ្ររាប់រយនាក់ ព្រោះតែហេតុផលមួយនេះ

កន្លងទៅអស់ជាច្រើនវគ្គ ជាច្រើនសប្ដាហ៍ពេលនេះកម្មវិធីប្រឡងចម្រៀងរ៉េបដ៏ល្បី The Rapper Cambodia បានឈានមកដល់វគ្គ Final Rhyme ហើយដែលនៅក្នុងវគ្គនេះកាន់តែអស្ចារ្យជាងមុន ក្រោមការបញ្ចេញសមត្ថភាពរបស់បេក្ខជនទាំង ៧ រូបនេះបានធ្វើឱ្យកក្រើកពេញ Studio ព្រោះម្នាក់ៗសុទ្ធតែមានចំណុចពិសេសនិងសមត្ថភាពប្លែកៗខុសពីគ្នា។ នៅក្នុងវគ្គនេះទៀតសោតមហាជនជាច្រើនជាពិសេសគឺអ្នកគាំទ្ររបស់កំពូលតារារ៉េប វណ្ណដា បានចាប់អារម្មណ៍ខ្លាំងចំពោះការបញ្ចេញសមត្ថភាពរបស់បេក្ខជនមួយរូបឈ្មោះ ZeDes-ហ្សេដេស ដែលបានធ្វើឱ្យ Coach ទាំង ៤ រួមទាំងទស្សនិកជនរំជួលចិត្ត ជាពិសេសគឺ វណ្ណដា បានស្រក់ទឹកភ្នែកជាខ្លាំង។

វណ្ណដា ត្រូវបានមហាជនពិសេសអ្នកនិយមចូលចិត្តវិស័យតន្ត្រីខ្មែរ គាំទ្រនិងទទួលស្គាល់ចំពោះទេពកោសល្យព្រមទាំងសមត្ថភាពរបស់លោកថា ពិតជាសិល្បករវ័យក្មេងមួយរូបដែលអាចនាំយកវិស័យចម្រៀងខ្មែរទៅកាន់ពិភពលោក រហូតដល់មានការកោតសរសើរនិងឱ្យតម្លៃពីបណ្តាបរទេសអំពីសិល្បៈវប្បធម៌របស់កម្ពុជានាពេលកន្លងមក។ ជាការពិតណាស់ទម្រាំមានភាពជោគជ័យដូចសព្វថ្ងៃនេះ វណ្ណដា បានខិតខំប្រឹងប្រែងតស៊ូឆ្លងកាត់នូវរឿងរ៉ាវជាច្រើនមានទាំងលំបាក និងរីករាយ បើនិយាយជីវិតគ្រួសាររបស់លោកវិញ ដូចដែលគ្រប់គ្នាបានដឹងថា វណ្ណដា មិនមែនជាកូនអ្នកមានធូរធាខ្លាំងនោះទេ ដោយលោកមានឪពុកម្ដាយជាកោសដូងនៅក្នុងផ្សារ រីឯរូបលោកផ្ទាល់ក៏ធ្លាប់ជាក្មេងកោសដូងម្នាក់ផងដែរ។


ដោយហេតុធ្លាប់មានប្រវត្តិជីវិតលំបាកបែបនេះហើយ ទើបនៅក្នុងវគ្គ Final Rhyme កាលពីថ្ងៃទី ១៧ វណ្ណដា ស្រក់ទឹកភ្នែកយ៉ាងខ្លាំងនៅចំពោះមុខអ្នកគាំទ្ររាប់រយអ្នកដែលទៅទស្សនាផ្ទាល់ ហើយនេះគឺជាលើកទី ១ ដែលគេបានឃើញ វណ្ណដា យំខ្លាំងខុសពីរាល់ដង។ ហេតុផលដែលធ្វើឱ្យ វណ្ណដា យំខ្លាំងដល់ថ្នាក់នេះក៏ព្រោះតែការបញ្ជេញសមត្ថភាពរបស់បេក្ខជន ZeDes-ហ្សេដេស តាមរយៈបទ “ចម្រោះជីវិត” អមជាមួយការសម្ដែងបង្ហាញពីទិដ្ឋភាពជាក់ស្ដែងទៅនៅក្នុងសង្គមបច្ចុប្បន្ននិងបង្ហាញពីការតស៊ូរស់នៅរបស់មនុស្ស។ វណ្ណដា បានយំនៅពេលលោកបានឃើញការសម្ដែងរបស់អ៊ុស្រីម្នាក់ដើរលក់នំបញ្ចុក ធ្វើឱ្យលោកនឹកដល់ម្ដាយដែលកាលពីលោកនៅក្មេង ម្ដាយរបស់លោកបានធ្វើការងារគ្រប់សព្វបែបយ៉ាងឱ្យតែបានលុយដើម្បីយកមកផ្គត់ផ្គង់គ្រួសារ លោកបាននិយាយថានៅពេលនោះ លោកគឺជាក្មេងប្រុសម្នាក់ដែលតែងរត់តាមត្រុកៗដើម្បីជួយការងាររបស់ម្ដាយ ហើយនេះជាហេតុផលដែលធ្វើឱ្យលោកឃើញការសម្ដែងនិងស្ដាប់អត្ថន័យបទ “ចម្រោះជីវិត” ហើយធ្វើឱ្យប៉ះពាល់ដល់អារម្មណ៍របស់លោក៕