ကမ္ဘာ့ပညာရှင် ဖားအောက်တောရဆရာတော်

Описание: 🙏🙏🙏 # ဝိပဿနာဉာဏ်ပညာက
ဈာန်သမာဓိ(သမာပတ်)တွေကို ခိုင်ခန့်အောင်တဖန်ပြန်လည်၍ ကျေးဇူးပြုပါတယ်။ 🙏🙏🙏
____________________________________________________________

မိမိက သမာဓိတွေကို ပြည့်ပြည့်စုံစုံဖြည့်ကျင့်ထားပြီး၊
ဖြည့်ကျင့်ထားပြီးဖြစ်ရင်လည်း ဒီသမာဓိတွေ လျောကျ မသွားအောင်
ထိုထိုနေရာတွေမှာ မိမိရဲ့. သမာဓိတွေကို ဝိပဿနာဉာဏ်ပညာဖြင့်
တဖန်ပြန်ပြီးတော့ ထိမ်းသိမ်းစောင့်ရှောက်နိုင်တဲ့ စွမ်းအားတွေပေါ်လာမယ်။
ဒီစကားဗြုန်းခနဲ နားလည်ချင်လည်းနားလည်မယ် နားမလည်းသော်လည်း ရှိချင်ရှိမယ်၊
ဟိုး ပဏ္ဏာသတစ်ခုမှာ
သမာဓိ နှင့် ပညာဟာ အပြန်အလှန်ကျေးဇူးပြုနေတဲ့တရားတွေ ဖြစ်နေတယ်၊
လတ်တွေ့ ဒီမှာ (ဖားအောက်တောရ)တရားအားထုတ်နေတဲ့ သူတော်ကောင်းတွေတော့သိပါလိမ့်မယ်၊

မိမိတို့က စတုတ္ထဈာန် သမာဓိအထိ သမာဓိကို ခိုင်ခိုင်ခန့်ခန့်ထူထောင်နိုင်ပြီးဆိုကြပါစို့
သြဒါတ ကသိုဏ်းကိုဖြစ်စေ သို့မဟုတ် အာနာပါနကမ္မဋ္ဌာန်းကို စတုထ္ထဈာန်သမာဓိသို့တိုင်အောင် ခိုင်ခိုင်ခန့်ခန့် သမာဓိကို ထူထောင်ထားပြီးတဲ့ သူတော်ကောင်းက ဒီစတုထ္ထဈာန်သမာဓိက်ို ဝိပဿနာရဲ့
အခြေပါဒကပြု၍
ရုပ်တွေကို သိမ်းဆည်းမယ်၊
နာမ်တွေကို သိမ်းဆည်းမယ်၊
အကြောင်းတရား အကျိုးတရားတွေကို
သိမ်းဆည်းမယ်၊
အကြောင်းတရားနှင့်တကွ ထိုရုပ်နာမ်တွေရဲ့ အနိစ္စသဘော ဒုက္ခသဘော အနတ္တသဘောတွေကို လှမ်းပြီး ရှုမယ်ဆို ရှုလို့မရဘူးလား၊ ရတယ်၊
ဒါ ဘာကို အခြေခံလဲလို့ မေးတော့ သမာဓိကို အခြေခံပြီး ဝိပဿနာပညာစခန်းကို ကူးသွားတာ။
ဒါ့ကြောင့် ဘုရားရှင်က မဂ္ဂင်ရှစ်ပါးထဲမှာ သမ္မာသမာဓိမဂ္ဂင်တစ်ခုလည်း ထည့်ဟောထားတယ်၊
ဘုန်းကြီး ခဏခဏဟောနေတဲ့အတိုင်း
သမာဓိံ ဘိက္ခဝေ ဘာဝေထ ၊ သမာဟိတော ဘိက္ခဝေ ဘိက္ခု ယထာဘူတံ ပဇာနာတိ။စသည် ဟောထားတယ်။
ချစ်သားရဟန်းတို့ ဟုတ်တိုင်းမှန်စွာသိတဲ့ ယထာဘူတဉာဏ်အမြင်
ရရှိရေးအတွက် သမာဓိကိုထူထောင်ကြပါလို့ ဘုရားရှင်က ကြိမ်ဖန်များစွာ တိုက်တွန်းထားပါတယ်နော်။
ဘာတွေကို ဟုတ်တိုင်းမှန်စွာ သိရမလဲ
ခန္ဓဝဂ္ဂသံယုတ် ပါဠိတော်မှာ
ဘုရားဟောထားတယ်၊
ဤကား ရုပ် ဝေဒနာ သညာ သင်္ခါရ ဝိညာဉ်လို့ သိမယ်၊

ဤကား ရုပ် ဝေဒနာ သညာ သင်္ခါရ ဝိညာဉ်တို့ရဲ့ ဖြစ်ကြောင်းသဘောနှင့်ဖြစ်ခြင်းသဘောကို ဟုတ်တိုင်းမှန်စွာ သိမယ်၊

ဤကား ရုပ် ဝေဒနာ သညာ သင်္ခါရ ဝိညာဉ်တွေရဲ့ ချုပ်ကြောင်းသဘောနှင့်ချုပ်ခြင်းသဘောကို ဟုတ်တိုင်းမှန်စွာ သိမယ်၊
အဲ့ဒီလို သိရှိရေးအတွက် သင်ချစ်သားတို့တတွေသည် သမာဓိထူထောင်ကြပါဆိုပြီးတော့ ဒီလိုတိုက်တွန်းထားတယ်၊ တိုက်တွန်းထားတဲ့အတွက်
သမာဓိကို အခြေခံ၍ ရုပ် ဝေဒနာ သညာ သင်္ခါရ ဝိညာဉ်ခေါ်တဲ့ ခန္ဓာငါးပါးကိုလည်း ဟုတ်တိုင်းမှန်စွာ မသိဘူးလား? သိတယ်။
အဝိဇ္ဇာ တဏှာ ဥပါဒါန် သင်္ခါရ ကံ အစရှိတဲ့ အကြောင်တရားတွေ ထင်ရှားဖြစ်ခြင်းကြောင့် အကျိုးခန္ဓာပါး ထင်ရှားဖြစ်ပုံကိုလည်း ဟုတ်တိုင်းမှန်စွာ မသိဘူးလား သိတယ်၊
အဝိဇ္ဇာ တဏှာ ဥပါဒါန် သင်္ခါရ ကံ အစရှိတဲ့ အကြောင်းတရားတွေ အရဟတ္တမဂ်ဆိုက်တဲ့အခါ လုံးဝချုပ်ငြိမ်းသွားခြင်းကြောင့် နောင်တဖန်
မဖြစ်သော ချုပ်ငြိမ်းသွားတယ်၊
နောင်တဖန် မဖြစ်သော ချုပ်ငြိမ်းခြင်းကို အနုပ္ပါဒနိရောဓလို့ခေါ်ပါတယ်၊
နောင်တဖန် ဖြစ်ခွင့်ရှိနေတဲ့ ချုပ်ငြိမ်းခြင်းကိုတော့ ဥပ္ပါဒနိရောဓလို့ခေါ်ပါတယ်၊
ဒီနေရာမှာ ပြောတာက အနုပ္ပါဒနိရောဓကို ရည်ညွှန်းထားပါတယ်။

အဝိဇ္ဇာ တဏှာ ဥပါဒါန် သင်္ခါရ ကံ အစရှိတဲ့ အကြောင်းတရားတွေက
အရဟတ္တမဂ်ရောက်တဲ့အခါ နောင်တဖန် မဖြစ်သောချုပ်ခြင်းဖြင့် ချုပ်ပြီး အနုပ္ပါဒနိရောဓသဘောအားဖြင့်ချုပ်တယ်၊
အဲ့ဒီ ချုပ်ငြိမ်းခြင်းကြောင့် ပရိနိဗ္ဗာနစုတိရဲ့ နောက်ကွယ်မှာလည်း ရုပ် ဝေဒနာ သညာ သင်္ခါရ ဝိညာဉ်ခေါ်တဲ့ ခန္ဓာငါးပါးတို့သည် နောင်တဖန် မဖြစ်သောချုပ်ခြင်းဖြင့် အကြွင်းမဲ့ချုပ်သွားတယ် အနုပ္ပါဒနိရောဓပဲ၊
အဲ့ဒီလို ချုပ်ငြိမ်းခြင်းကိုလည်း ဟုတ်တိုင်းမှန်စွာ သိမယ်၊
အဲ့ဒီလို ဟုတ်တိုင်းမှန်စွာ သိရှိရေးအတွက် သမာဓ်ိထူထောင်ကြပါလို့
ဒီလိုတိုက်တွန်းထားတယ်၊

နောက်တစ်ခု အကြောင်းတရား အကျိုးတရား နှစ်ခုလုံးတို့ရဲ့ အနိစ္စသဘော ဒုက္ခသဘော အနတ္တသဘောတွေကိုလည်း ဟုတ်တိုင်းမှန်စွာ သိမယ် ၊ အဲ့ဒီလို ဟုတ်တိုင်းမှန်စွာ သိရှိရေးအတွက် သမာဓိထူထောင်ကြပါဆိုပြီး ဒီလိုတိုက်တွန်းထားတယ်၊

ဒီသမာဓိတွေကို အခြေခံပြီး ဝိပဿနာဉာဏ်ပညာတရားတွေ မရရှိနိုင်ဘူးလား ၊ ရရှိတယ်။

သို့သော် ဝိပဿနာ ဉာဏ်ပညာကြောင့်လည်း
ဒီသမာဓိတွေ ခိုင်ခံ့သွားတယ် ၊
ဝိပဿနာ ဉာဏ်ပညာကလည်း သမာဓိတွေကို ခိုင်ခံ့အောင် တဖန်ပြန်လည်၍ ထိမ်းသိမ်းစောင့်ရှောက်ပေးတယ်။