加拿大Halifax博物館看新移民的希望與恐懼

Описание: ＃住加男人 ＃CanMen
二戰走難生離死別大冒險 借古鑑今加港人│Wingo：都係紅白藍好嘢

今時今日，香港人對移民潮嘅感受越來越深，喺加拿大海洋省份新斯科舍（Nova Scotia）省會哈利法斯（Halifax），就有Pier 21移民博物館。博物館前身係碼頭，喺1928至1971年間接收約100萬名歐洲移民，喺加拿大過百年移民史中佔有重要位置。借古鑑今，依家香港人移民加拿大，同當年有咩相似有咩唔同？

睇番百年前新移民上岸，佢哋當然唔可以好似依家咁，可以將屋企嘅嘢全部運過嚟，主要都係幾個行李箱；喺Pier 21移民博物館可以見到唔同類型行李箱，遠至1890年都有。不過欣賞過林林總總嘅行李箱，Wingo得出一個結論：都係我哋嘅紅白藍好嘢！

今次參觀博物館，除咗肥Sam同Wingo帶大家行，我哋仲搵嚟博物館「觀眾參與部（Audience Engagement）」副總監Carrie-Ann Smith導航，佢話博物館展覽以children friendly為主，好多展品可以觸摸，「因為唔係真文物，如果係真品就要放喺玻璃箱內；展覽目的係俾大家可以親身體驗、觸摸，接觸唔到就唔過癮啦！」

其中一個房間，相信會令新移加港人有深刻感覺，就係入境時等攞文件、簽證嘅房間，當年都一樣，只係乘搭嘅交通工具唔同。佢哋當時落船就進入呢間房等嗌名、交文件，攞簽證，之後就會見到Welcome To Canada字眼。「喺當時人們嘅面上，我哋睇到希望同恐懼；對展開新生活嘅希望，對初來陌生地方嘅恐懼，但整體嚟講，係希望多過恐懼。」加港人係咪好有感觸？諗起都別有一番滋味在心頭。

我哋仲搵到「二戰海外兒童撤離者後代」、父親喺第二次世界大戰時逃亡到加拿大嘅Kathy，講番1940年父親（當時僅12歲）走難經歷，「唔少英國人希望小朋友避過空襲，所以將佢哋送去其他英聯邦國家，送來加拿大；呢個決定好艱難，分分鐘係生離死別、係一個大冒險。以我所知當中有船隻被擊沉，77個孩子遇難……」逃過一劫嘅小朋友，有啲被送到寄養家庭，有啲坐火車去加拿大唔同地方展開新生活；掛住喺英國嘅家人可以點？打電報或者錄訊息，博物館收藏咗當時嘅錄音，睇片可以聽番當時嘅小朋友幾咁孤單寂寞徬徨。

今次肥Sam同Wingo可以話反轉成個Pier 21移民博物館，讓大家認識加拿大移民史、親身感受之餘，借古看今，我哋呢一波香港移民，係咪淨係買樓炒樓收租飲茶就算呢？睇完展覽，希望大家記得當初點解移民，做好加港人，令我哋下一代知道，我哋係Hong Kong Canadian。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
住加男人YouTube及Patreon會員專享獨家直播及Discord對話區
Patreon會員：  / canmen  
YouTube會員：https://bit.ly/2PwNskm
PayPal單次支持住加男人：https://www.paypal.me/canmen
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
「住加財經」全新加港財經資訊頻道
   / @canfinca  

「住加男人」Facebook專頁
  / canmenca  

「住加男女」Facebook群組分享加港資訊及新聞
  / 859426267552840