Куулэй - 2022

Описание: “КҮҮЛЭЙ - 2022”
«Саха – от үлэтигэр сир үрдүгэр бастыҥ буолуо» диэн санаанан салайтаран, кэлэр кэнчээри ыччаттарбыт өбүгэлэрбит үтүө үгэстэрин утумнаан саханы саха дэтиэхтэрэ диэн туран Горнай улууһун Одуну нэһилиэгин «Дьоллоох» кэрэ сиригэр-уотугар от ыйын 17 күнүгэр үтүө үгэскэ кубулуйбут Республикатаа5ы агрооскуолалар икки ардыларыгар «Күүлэй 2022» күрэх үрдүк таһымҥа ыытылынна.

Ол курдук,. П.Н уонна Н.Е Самсоновтар аат. Хатас орто оскуолатын, Мэҥэ хаҥалас улууһун А.Чугунов аат. Мэлдьэхси орто оскуолатын, П.И.Кочнев аат. Тулагы орто оскуолатын, Горнай улууһуттан В.Д.Лонгинов аат. Атамай орто оскуолатын, Кэптин орто оскуолатын, Л.Н.Харитонов аат. Маҕарас орто оскуолатын бастыҥ үөрэнээччилэрэ кэлэн күөн көрүстүлэр. Бу күрэхпитигэр анаан-минээн оҕолорго кэс тылларын, баҕа санааларын эттилэр бочуоттанар ыалдьыттарбыт Республика үс төгүллээх Дуолан охсооччута М.М.Андреева, Республикаҕа декаданан оттооһуҥҥа 3 төгүллээх чемпиона Н.Н Баишев, Күүлэй хас да төгүллээх чемпиона, призера, күрэхтэһии кылаабынай судьуйата Александров А.А. Анаабыт курдук олус үчүгэй күн туран биэрдэ. Оҕолор от охсууга эрэ буолбакка сынньалаҥ кэмигэр көрдөөх эстафетаҕа кыттан сүүрдүлэр-көттүлэр, маны таһынан хамаанданан чэй өрүүтүгэр күрэх буолла. Бу күрэххэ кыайыылааҕынан таҕыстылар Л.Н.Харитонов аат. Маҕарас орто оскуолатын хамаандата.
Күн устата кыргыттар олорон, сынньанан хаалбакка илиинэн 25х25 сири оҕустулар, ол түмүгэр кыайыылаах үрдүк аатын Хатас орто оскуолатын үөрэнээччитэ Алина Бурцева ылары ситистэ уонна электросамокат хаһаайката буолла. 2 миэстэни Тулагы орто оскуолатын үөрэнээччитэ Каролина Махарова, 3 миэстэни Кэптин орто оскуолатын үөрэнээччитэ Виолетта Алексеева ылла. Уолаттарга мотокосанан 35х50 сири 1 час, 48 мүн. охсон кыайыылаах үрдүк аатын ылла уонна скоростной велосипед хаһаайынынан буолла Л.Н.Харитонов аат. Маҕарас орто оскуолатын үөрэнээччитэ Василий Иванов, 2 миэстэни ылары ситистэ Кэптин орто оскуолатын үөрэнээччитэ Кузьмин Семен (2ч.30 мүн. 39 сөк), Атамай орто оскуолатын үөрэнээччитэ Яковлев Афанасий кыл мүччү 1 сөк. хаалан 3 миэстэҕэ таҕыста. Уолаттарга 35х35 сири илиинэн от охсууга муҥутуур кыайыылааҕынан уонна мотоцикл хаһаайынынан буолла Мэлдьэхси орто оскуолатын 11 кылааһын үөрэнээччитэ Алексеев Ярослав. Кини көрдөрүүтэ 1 чаас 34 мүнүүтэ буолбут буоллаҕына 2 мүнүүтэнэн хаалан 2 миэстэҕэ таҕыста Маҕарас орто оскуолатын үөрэнээччитэ Алдан Наумов. 3 миэстэни ылары ситистэ Кэптин орто оскуолатын үөрэнээччитэ Сидоров Арылхан. От охсуутун күрэҕэр кыттыбыт оҕолорго спонсордар ааттарыттан сыаналаах бириистэр, анал ааттар туттарылыннылар.
Махтал тылларын аныыбыт республикатааҕы “Куулэй 2022» күрэҕи ыытарбытыгар күүс-көмө буолбут спонсордарбытыгар СР агрооскуолаларын союһугар, «Горнай улууһа” МО дьаһалтатыгар, С.Н..Донской аатынан ИРОиПК, улуустааҕы үөрэх управлениетыгар, улуустааҕы тыа хаһаайыстыбатын управлениетыгар, “Одуну нэһилиэгэ” МТ дьаһалтатыгар, ООО ИСК «Союз» тэрилтэтигэр, “Якутский скот” тэрилтэ5э, ИП «И.Е.Ксенофонтов», Л.Н.Харитонов аат. Маҕарас орто оскуолатыгар, В.Д.Лонгинов аат. Атамай орто оскуолатыгар, Софр. П.Данилов аат. Дьиикимдэ орто оскуолатыгар, Кэптин орто оскуолатыгар, «Туллукчаана» о5о сайдар киинигэр.
Агро оскуола – бу сайдыы суола
Агрооскуола – улэнэн дьоллонуу
Агрооскуола – тыа сирин инники кэскилэ
Агрооскуола – мин тапталлаах оскуолам!

Фотограф: Люцита Петрова
Оператор: Лена Ноговицына
Монтаж: Лена Ноговицына
Руководитель: Ноговицына А. А.