‎ក្រសួងផែនការបើកសិក្ខាសាលាផ្សព្វផ្សាយផែនការយុទ្ធសាស្ត្រអភិវឌ្ឍន៍ជាតិ នីតិកាលទី៧ នៅខេត្តសៀមរាប

Описание: ‎ក្រសួងផែនការបើកសិក្ខាសាលាផ្សព្វផ្សាយផែនការយុទ្ធសាស្ត្រអភិវឌ្ឍន៍ជាតិ នីតិកាលទី៧ នៅខេត្តសៀមរាប
‎
‎អគ្គនាយកដ្ឋានផែនការ នៃក្រសួងផែនការ បានរៀបចំសិក្ខាសាលាផ្សព្វផ្សាយផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) របស់រាជរដ្ឋាភិបាល នីតិកាលទី៧ នៃរដ្ឋសភា ក្នុងគោលបំណងចម្បងដើម្បីបញ្ជ្រាបផែនទីបង្ហាញផ្លូវដ៏សំខាន់នេះដល់ថ្នាក់ក្រោមជាតិ នាព្រឹកថ្ងៃទី២៥ ខែវិច្ឆិកា ឆ្នាំ២០២៥ នៅខេត្តសៀមរាប។
‎
‎ឯកឧត្តម សំរិត មករា រដ្ឋលេខាធិការ ក្រសួងផែនការ មានប្រសាសន៍ថា ផ.យ.អ.ជ. នេះគឺជា ក្របខ័ណ្ឌយុទ្ធសាស្ត្ររយៈពេលមធ្យម សម្រាប់តម្រង់ទិសអនាគតនៃប្រទេសកម្ពុជា ឆ្ពោះទៅរកភាពរុងរឿង ប្រកបដោយភាពធន់ និងបរិយាបន្ន។
‎
‎ឯកឧត្តមបានបន្តថា ដំណាក់កាលនេះ គឺជាការចាប់ផ្ដើមថ្មីនៃ បរិវត្តកម្មលើគ្រប់វិស័យ»។ ផ.យ.អ.ជ. នឹងត្រូវប្រើប្រាស់ជា ផែនទីបង្ហាញផ្លូវ សម្រាប់ការអភិវឌ្ឍវិស័យសេដ្ឋកិច្ច សង្គមកិច្ច និងបរិស្ថាន ក្នុងនីតិកាលទី៧នេះ។
‎ផែនការនេះឆ្លុះបញ្ចាំងពីការប្ដេជ្ញាចិត្តរបស់រាជរដ្ឋាភិបាលក្នុងការសម្រេចគោលដៅអភិវឌ្ឍន៍ប្រកបដោយចីរភាព ឆ្ពោះទៅសម្រេចបានឋានៈជាប្រទេសមាន ចំណូលខ្ពស់នៅឆ្នាំ២០៥០។
‎
‎ឯកឧត្តមរដ្ឋលេខាធិការ ក៏បានលើកឡើងអំពី យុទ្ធសាស្ត្របញ្ចកោណ ដំណាក់កាលទី១ (Pentagonal Strategy – Phase 1) ដែលជាយុទ្ធសាស្ត្រចម្បងក្នុងការធានាការអនុវត្ត ផ.យ.អ.ជ. ប្រកបដោយជោគជ័យ។
‎
‎ក្នុងន័យនេះ ឯកឧត្តមបានគូសបញ្ជាក់អំពីតួនាទីរបស់រដ្ឋបាលថ្នាក់ក្រោមជាតិថា «សំខាន់ និងមិនអាចខ្វះបាន ប្រៀបដូចជាកញ្ចក់ឆ្លុះបញ្ចាំងតម្រូវការរបស់មូលដ្ឋាន»។
‎
‎ឯកឧត្តមបានអំពាវនាវឲ្យរដ្ឋបាលថ្នាក់ក្រោមជាតិ៖
‎ពង្រឹងយន្តការសម្របសម្រួលរវាងមន្ទីរខេត្ត និងរដ្ឋបាលខេត្ត។ ធ្វើឱ្យប្រសើរឡើងនូវលទ្ធភាពទទួលបានទិន្នន័យ និងគុណភាព តាមរយៈ បរិវត្តកម្មឌីជីថល។ ធានានូវសង្គតិភាពរវាង ផ.យ.អ.ជ. យុទ្ធសាស្ត្រតាមវិស័យ និងផែនការថ្នាក់ក្រោមជាតិ លើកកម្ពស់ការចូលរួមជារួមរបស់សហគមន៍ និងក្រុមងាយរងគ្រោះ រួមបញ្ចូលបញ្ហាឆ្លងកាត់ (cross-cutting issues) ដូចជា ការបន្សាំបម្រែបម្រួលអាកាសធាតុ សមភាពយេនឌ័រ និងចីរភាពបរិស្ថាន៕
‎
‎អត្ថបទ និងរូបភាព៖ លោក ឡេង ពិសិដ្ឋ
‎កែសម្រួល៖ លោក អ៊ុន ណារាជ្យ