კორცხელი / Kortskheli

Описание: კორცხელის ღვთისმშობლის ეკლესია სამეგრელოში, ზუგდიდის მუნიციპალიტეტში, სოფელ კორცხელში მდებარეობს. ის X საუკუნის ძეგლია, რომელიც სამეგრელოს მთავარს - ლევან II დადიანს აღუდგენია XVII– საუკუნის პირველ ნახევარში. ლევან II დადიანის მიერ ტაძრის აღდგენას წალენჯიხის ეკლესიის ფრესკა ადასტურებს, სადაც ლევან II დადიანი და დედოფალი ნესტან–დარეჯანი არიან გამოსახული კორცხელის ეკლესიის მაკეტით ხელში. 1815 წელს კი ტაძარი მსაჯულთუხუცესს - დიდ ნიკო დადიანს განუახლებია, რომელიც კორცხელის ეკლესიაშია დაკრძალული. ეკლესიის ისტორიის შესახებ საინტერესო ცნობებს იძლევა სხვადასხვა დროის ჭედური ხატები, რომელთა ნაწილი დადიანების მუზეუმში ინახება, სამი ხატი კი თბილისის ხელოვნების მუზეუმშია დაცული. ეკლესიის მიდამოებიდან შესანიშნავი ხედები იშლება, შორს მოჩანს სვანეთ-აფხაზეთისა და სამეგრელოს მთიან-ბორცვიანი და ვაკე ადგილები, კოლხეთის დაბლობის ვრცელი ტერიტორია და შავი ზღვა.
ტაძარი ქვის გუმბათოვან ნაგებობას წარმოადგენს, რომელსაც სამი შვერილი აფსიდი აქვს. ეკლესიას დასავლეთით მიშენებული აქვს სტოა. გუმბათი ეყრდნობა საკურთხევლის კედლებსა და ორ ბოძს. ფასადები ქვის მცირე კვადრებითაა მოპირკეთებული. შესასვლელი სამია: დასავლეთიდან, სამხრეთიდან და ჩრდილოეთიდან. სამივე შესასვლელი თაღოვანია. ჩრდილოეთისა და აღმოსავლეთის კედლებში სამ-სამი ვიწრო სარკმელია დატანებული, სამხრეთისაში კი - ერთი. ფასადები სადაა, ერთადერთი დეკორატიული ელემენტი მარტივი პროფილის მქონე ლავგარდანია. ტაძრის ინტერიერი მთლიანად მოხატული ყოფილა, თუმცა დღესდღეობით ფრესკები მხოლოდ საკურთხეველსა და დასავლეთის კედელზეა შემორჩენილი. ეკლესიის დასავლეთით ორსართულიანი კოშკი დგას, რომელიც კარგად გათლილი კვადროვანი ქვითაა ნაგები კირხსნარზე. ტაძარს ყორე ქვით ნაშენი გალავანი შემოუყვება.
#Church
#Kortskheli
#Zugdidi
#Samegrelo
#Georgia