Böyük İslam alimi Şəhid Saninin şəhid olması. ("Şeyx Bəhayi" filmindən bir fraqment)

Описание: Şəhid Sani sözünün mənası ikinci şəhid deməkdir. Bu onun ləqəbidir. Şəhid Sani ləqəbi ilə tanınmış Şeyx Zeynuddin ibn Əli Amili hicri qəməri tarixi ilə 911-ci ildə indiki Livan ərazisində anadan olmuşdur. İbtidai dini elmləri atasından öyrənmiş, atasının vəfatından sonra isə elm öyrənmək üçün müxtəlif yerlərə səfərlər etmişdir. Misirə, Dəməşqə, Hicaza, Beyt-ul-Müqəddəsə, İraqa, İstanbula gedərək, orada müxtəlif alimlərlə ünsiyyətdə olmuşdur. Şəhid həddindən artıq kasıb bir vəziyyətdə həyat sürmüş, əkinçiliklə məşğul ola-ola təhsil almış, elm öyrənmək yolunda bütün məşəqqətlərə səbir etmişdir. O, elm əldə etmək yolunda həm şiə, həm də sünni alimlərindən istifadə etmişdir. Onun sünni müəllimləri arasında on iki alimin adı çəkilir. Şiə məzhəbini bildiyi kimi, sünni məzhəbindən də dərin agahlığı var imiş. İslamın müxtəlif sahələrində elm sahibi olmuşdur. Fiqh, üsül, fəlsəfə, irfan, tibb, nücum elmlərində dərin bilgi sahibi idi. Həddindən artıq təqva və zöhd əhli olmuşdur. İbadət və mənəviyyatda dillər əzbəri imiş. Tələbələri onun barəsində yazırlar ki, gecələri odun daşıyaraq satar və ailəsinin güzəranını təmin edərmiş. Səhərləri isə dərs deyərmiş. Öz ailəsinin xərcini özü təmin edər, heç kəsə möhtac olmazmış. O, cəfəri, hənəfi, şafei, maliki, hənbəli məzhəblərinə dərin elmi olduğundan bu məzhəblər əsasən də dərs deyərmiş. Onun bir çox əsərləri vardır. Şəhid Sani ömrü boyu 80-dan artıq kitab yazmışdır. Şəhid Əvvəlin kitabı olan “Lümə”yə yazdığı şərhi çox məşhurdur. Hələ də dini məktəblərdə fiqh elmində dərslik kimi tədris olunur. Bu kitaba günümüzə qədər yüzə yaxın şərhlər yazılmışdır.
Şəhid Sanidən çoxlu kəramətlər zahir olmuşdur. Öz şəhadətini qabaqcadan bilib, xəbər vermişdir. Belə ki, Şeyx Bəhayinin babası Şeyx Harisi nəql edir ki, bir gün Şeyx Saninin yanında idim. Dərin fikrə dalmışdı. Nədən düşündüyünü soruşduqda cavab verdi ki: "Qardaşım! Belə başa düşünürəm ki, mən İkinci şəhid olacağam. Çünki, yuxumda Seyyid Mürtəzanı gördüm. Bir ziyafət süfrəsi qurmuşdu və ora şiə alimlərini toplamışdı və yemək yeyirdilər. Mən də onlara qatıldım. Seyid Mürtəza məni görərkən ayağa qalxdı və salamladı və Şəhid Əvvəlin yanında oturmağı buyurdu".
“MUSƏKKİNUL FUAD İNDƏ FİQDIL ƏHİBBA VƏL ÖVLAD” kitabının yazmağının səbəbi.
Bu kitabı yazmağının səbəbi Şəhidin keçdiyi çətin həyat yolu olmuşdur.Tarixdən də göründüyü kimi, o, həyatı boyu çoxlu müsibətlərlə qarşılaşmışdır. O, bu kitabı həm özü üçün bir təskinlik, həm də bəlalarla qarşılaşanlar üçün bir ürək-dirək, qəlblərinə rahatlıq vermək üçün yazır.
Şəhid Sani çox fəqir bir vəziyyətdə yaşamışdır. Onun sağlığında bütün övladları vəfat edir, yalnız bir övladı sağ qalır. Şəhidin bu övladı məşhur alimlərdən olur və yazdığı kitablar dini məktəblərdə dərslik kimi tədris olunur.
Şəhid Sani bu kitabı özünə təskinlik üçün yazır. Elə kitabın adını da bu səbəblə belə qoyur. Belə ki, kitabın adı tərcümə edilən zaman “Övlad və yaxınların itkisi zamanı qəlbə təskinlik verən” deməkdir. Bu kitabda çox maraqlı hədisləri cəm etmişdir. Onun yazdığı bu kitab barədə bir çox alimlər təqdirəlayiq sözlər demişlər.
(zehra-yolu.com)