16 shkurt 1925 - Nis beteja mes amerikanëve dhe britanikëve për koncesionin e naftës shqiptare

Описание: Më 16 shkurt të vitit 1925, një numër gazetash europiane dhe amerikane, publikuan një notë të Qeverisë së Shteteve të Bashkuara të Amerikës, me anë të së cilës protestonte pranë Qeverisë Shqiptare, kundër projektit të dhënies së monopolit të një koncesioni nafte, Qeverisë Britanike.

Në notën e saj Qeveria Amerikane argumentonte se, “kur Shtetet e Bashkuara e njohën zyrtarisht Shqipërinë, ata këmbëngulën mbi parimin e ‘konkurrencës së barabartë” – një parim që u siguron kompanive amerikane, të drejta të barabarta, me ato britanike.

Pas amerikanëve, në të njëjtën kohë, pranë Qeverisë Shqiptare, protestoi edhe Qeveria Italiane, duke kërkuar të drejta prioritare në të njëjtën fushë.

Pikërisht këto nota proteste, publikuar në mediat e kohës, do të vërtetonin jo vetëm nisjen e një beteje influence për zotërimin e naftës shqiptare, por edhe futjen e vendit të vogël ballkanik në listën e vendeve, nëntoka e të cilëve, përmbante ar të zi.

Në fakt, pas konfirmimit të burimeve naftëmbajtëse të Shqipërisë, qeveritë dhe kompanitë më të njohura botërore të naftës, nga Anglia, Franca, Shtetet e Bashkuara dhe Italia, të gjitha bashkë, u përfshinë në një beteje të gjatë diplomatike për koncesionet shqiptare të naftës.

Sherri për naftën shqiptare u mbyll më 1930. Fituese doli Italia e Benito Musolinit, që ndërkohë kishte futur në darën e borxheve, Mbretin Zog.

Nafta në Shqipëri ishte zbuluar krejt rastësisht po nga ushtarakët italianë, gjatë viteve të Luftës së Parë Botërore.

Në këtë periudhë, ushtarët italianë, që patrullonin përtej Karaburunit, panë disa njolla jo të zakonshme të sipërfaqes së detit dhe njoftuan Shërbimin Gjeologjik Italian.

Gjeologët italianë, zbuluan se gjurma e naftës vinte nga përrenjtë Vlorës. Çpimi i pusit të parë nisi në Drashovicë, ndërsa shtresa e naftës u kontaktua në thellësinë 101 metër. Kapaciteti i këtij pusi të parë, ishte 3500 litra naftë bruto në ditë.

Në vitin 1930 italianët zbulojnë edhe fushën naftëmbajtëse të Kuçovës, duke bërë realitet shfrytëzimin e këtyre burimeve në vitin 1934, me anë të shoqërisë AIPA. Sipas statistikave, pika më e lartë e shfrytëzimit u arrit në vitin 1941, kur italianët nxorën nga nëntoka shqiptare 148 mijë tonë naftë bruto.

Një pjesë e kësaj nafte dërgohej me çisterna në Itali, ndërsa një pjesë nisi të përpunohej në Kuçovë, me anën e një impianti të thjeshtë, që u montua në vitin 1934, dhe që prodhonte benzinë, vajguri për ndriçim dhe gaz natyror.

Ndërsa distileria e mirëfilltë u montua dhe nisi funksionin në vitin 1940, pas pushtimit italian të Shqipërisë.

Në vitin 1943 pushtuesit gjermanë nisën ti kushtonin vëmendje naftës shqiptare. Në vitin 1944, po në Kuçovë, ata instaluan edhe një distileri të dytë, me kapacitet përpunues deri në 20 ton në ditë, por fati i saj qe jetëshkurtër, pasi pak kohë pas vënies në punë, u shkatërrua nga bombardimet e aviacionit anglez.

#mcntv #mcn #datastories #ferdinanddervishi #histori #ngjarjethistorike #NaftaShqiptare #HistoriaShqiperise #1925 #ZogI #Musolini #Koncesionet #BetejaPerNaften #Kuçova #Vlora #Drashovica #LuftaPareBoterore #Energjia #AIPA #MCNTV #DataStories #FerdinandDervishi #NgjarjeHistorike