Жекпе-жектен Жоғарғы Бас қолбасшы кубогы аяқталды

Описание: Астанада жекпе-жек сайысынан ҚР Жоғарғы Бас қолбасшысының кубогы жолындағы бірінші ашық турнир аяқталды. Тұңғыш Президент күніне арналған жарысқа еліміздің әр аймағындағы күштік құрылымдардан жасақталған 25 команда қатысты.

Тоғыз салмақ бойынша татамиге шыққан спортшылар екі күн бойы кім мықтыны анықтады.

«Дәулет» спорт кешеніндегі жекпе-жек сайысында Мемлекеттік күзет қызметінің жігіттері мықтылық танытты. Тоғыз салмақтың алтауында жеңіске жеткен олар жалпы командалық есепте топ жарды.

Жеңімпаз командаға Жоғарғы Бас қолбасшының кубогы мен жеңіл автокөлік тарту етілді.

75 келі салмақта сынға түскендер арасында кикбокстан әлем чемпионы Мардан Буздаев бар. Мемлекеттік күзет қызметінің спортшысы өз салмағында үздік шықты.

Мардан Буздаев, Жоғарғы Бас қолбасшы кубогының иегері

-Келесі жылы әлем чемпионатына дайындаламыз. Сол әлем чемпионатына осы жақтан іріктеліп жатырмыз. Мына жақта төрт адамды таңдайды. ҚР турнирінде кездесеміз. Кім жеңісті алса, сол әлем чемпионатына барады.