Әһлюс-сунна уәл-жамаға ақидасы 53. Тағдырға иман келтіру 1. Ұстаз: Омар Теміртас

Описание: Тағдырға, оның жақсысы мен жаманына иман келтіру
Аһлюс-сунна уәл-жамаға тағдырға және оның жаманы мен жақсысы бір Алладан екеніне толық иман келтіреді. Тағдырдың төрт дәрежесі бар:
Біріншісі: Білім. Ол – Алла Тағаланың жаратылыстарының тағдырын, не болғанын, не болып жатқанын, әрі не болатынын және құлдарының амалдарын Өзінің басы және соңы жоқ, шексіз ілімімен білуі. Ол олардың жақсы амалдарын, күнәларын, барлық ахуалдарын және олардың ризықтары мен ажалдарын біледі.
Екіншісі: Жазу. Алла Тағала ләухуль-махфузда барлық жаратылыстарының тағдырын жазып қойды. Алла Тағаланың бірінші жаратқан мақұлығы қалам болды. Алла оған: «Жаз», – деді. Қалам: «Не жазамын?», – деді. Алла Тағала: «Қиямет күніне дейін болатын нәрсенің бәрін жаз», – деді. Алла Тағала сөзінде: {Жер бетінде орын алатын қандай апат болмасын және бастарыңа келетін қандай бейнет болмасын, бәрі де Біз оларды жаратпай тұрып-ақ кітапқа жазылып қойған. Шүбәсіз, бұл Алла үшін оп-оңай} (Хадид, 22).
Алла Тағала баланың денесін жаратқанда, оған жан бермей тұрып, Өзінің періштелеріне төрт нәрсені жазуға бұйырып, оған жібереді. Періштелеріне: «Оның ризығын, ажалын, амалын және бақытты немесе бақытсыз болатынын жаз», – деп бұйырады. Ал періштелер болса, оны Ләухуль-махфуздан көшіріп алады.
Үшіншісі: Қалау. Ол Алла, жаратылыстың тағдырларын шексіз ілімімен біліп, оны ләухуль-махфузда жазғаннан кейін, арнайы мерзімі келгенде, Өз хикметімен орын алуын қалауы. Алла қалаған нәрсе болады, Ол қаламаған нәрсе болмайды. Сондай-ақ, аспандар мен жерде әрбір әрекет пен тыныштықтың барлығы Алланың қалауымен орын алады.
Төртіншісі: Жарату. Ол Алла Тағаланың ләухәль-махфузда жазғанынан кейін уақыты келгенде сол нәрсені жаратады деп иман келтіру. Барлық аспан мен жердегі жаратылыстарың Жаратушысы бір Алла. Одан басқа жаратушы және басқарушы жоқ деп сену. Алла Тағала сөзінде: {Алла барлық нәрсенің Жаратушысы. Алла әр нәрсеге кепіл} (Зумар, 62).