Ministrja Kodheli bashkëbisedon me paqeruajtësit në Afganistan

Описание: Ministrja e Mbrojtjes znj. Mimi Kodheli dhe shefi i Shtabit të Përgjithshëm të FA, gjeneralmajor Jeronim Bazo, nëpërmjet një video konference kanë bashkëbiseduar me efektivat e kontingjenteve "MAT 5" dhe "Eagle 8", të cilët shërbejnë në kuadër të Aleancës, në operacionin ISAF në Kandahar dhe Kabul, Afganistan.
Komandanti i "MAT 5", kolonel Ardjan Bali dhe komandanti i "Eagle 8", major Agron Kuta informuan ministren e Mbrojtjes Kodheli mbi situatën aktuale në teatrin e operacionit, si dhe me detyrat që paqeruajtësit tanë po kryejnë me sukses në Afganistan.
Ministrja e Mbrojtjes znj. Mimi Kodheli, u është drejtuar efektivave të FA në Kabul dhe Kandahar: "Përshendetje major Kuta i "Eagle 8"! Më vjen mirë që ju shikoj mirë. Është një gjë, kur e dëgjoj dhe marr informacionin nga shkresat dhe, është një gjë tjetër kur ju shikoj. Jam shumë e kënaqur, madje e prekur nga raportimi që ju bëni, sepse shikoj dhe ndjej një realitet tjetër nga ai çka njerëz dashakeqës duan të krijojnë idenë e të përfitojnë nga sakrifica juaj. Unë jam këtu garanti i sakrificës tuaj dhe garanti se dashakeqësit mos përfitojnë nga kjo gjë. Unë ju siguroj që në karrierën tuaj ushtarake, profesionale, pse jo dhe në eksperiencën tuaj jetësore, keni njohur shumë persona. Ka shumë mundësi që me asnjërin prej jush nuk njihem, por betohem në nderin tim që nuk do të keni asnjë mbështetës si Mimi Kodheli, ministër i Mbrojtjes së Republikës së Shqipërisë, sot dhe deri sa të vazhdojë jeta juaj, kudo që të jeni nën divizë apo jashtë divizës dhe këtë unë nuk e them për t'u përbetuar para jush. Unë këtë e kam vërtetuar sa herë që kam pasur në dorë përgjegjësi të mëdha: jetën e njerëzve në gjithë dimensionet e saj dhe, nuk do të lë askënd që mund të vërë një ndarëse fiktive, të pandershme, të padrejtë midis të gjithë njerëzve në divizë, duke filluar nga shefi i Shtabit dhe deri tek ushtari më i fundit profesionist dhe meje. Fati i mirë e ka sjellë që unë të jem edhe grua, të kem sensibilitetin e një nëne edhe të një gruaje, madje edhe të një vajze. Fati e ka sjellë që unë të jem me profesion financiere, pra të kuptoj dhe nga taksimi shumë më tepër nga taksimi me të cilin mundohen të abuzojnë ata që nga taksimi nuk marrin vesh.
Jam informuar dje që kanë kaluar pagesat tuaja të zakonshme, në një kohë ashtu siç edhe shefi i Shtabit e tha përpara sesa unë t'ia bëja prezent kryeministrit çështjen e taksimit tuaj. Këtë gjë e ka bërë me shumë dinjitet, komandanti i Forcës Tokësore, gjeneralmajor Zyber Dushku, shumë kohë më përpara, kur ka diskutuar me shumë seriozitet me stafin juridik për të gjetur mënyrën që ju të përjashtoheni nga ky taksim. Besoj që do t'ia mbërrijmë, por ajo që besoj më fort është kjo gjë: ju jeni aty sepse keni bërë një betim; ju jeni aty sepse besoni tek atdheu edhe tek detyra juaj fisnike dhe kjo është shumë më e rëndësishme se sa çdo diskutim tjetër. Unë jam këtu jo sepse besoj tek rroga e ministrit, por sepse besoj akoma tek shërbimi ndaj atdheut, pra në një sens, megjithëse në role të ndryshme, jemi betuar njësoj: unë mbi kushtetutë e ju mbi flamur që do t'i shërbejmë vendit, patjetër duke i shërbyer edhe familjeve tona që është gjëja më e rëndësishme që kemi. Kështu që me urimin që morali juaj është po aq i lartë sa kjo që perceptojmë ne sot, unë, shefi i Shtabit, gjeneralët, të gjithë këtu, komandant Hoxha e të gjithë me radhë të vazhdojmë të jemi në unitet të plotë me njëri-tjetrin me shkëmbime informacioni dhe problemesh me njëri-tjetrin, me shpresën e madhe dhe besimin e plotë që ju do të vazhdoni ta kryeni me nder detyrën që ju është ngarkuar. Dhe fjala nder është një fjalë shumë e lartë, ndaj ju falënderoj për gjithë punën dhe mundin që keni bërë. Falënderoj gjithashtu edhe gjithë Shtabin e Përgjithshëm dhe gjithë ata që bëjnë të mundur që ju atje të jeni mirë me shëndet, me pagesat, me mbështetje të plotë nga ana e partnerëve tanë strategjikë, në mënyrë që asgjë të mos ju mungojë. Sigurisht që këtë radhë nuk ju ka munguar as fati, flas për "Eagle 8" në këtë rast, se duhet edhe pak fat në atë gjë që ju bëni".

Një mesazh të veçantë u përcolli paqeruajtësve shqiptarë në Afganistan edhe shefi i Shtabit të Përgjithshëm të FA, gjeneralmajor Jeronim Bazo.