Revathi Nakshathra Prediction in Malayalam | രേവതി നക്ഷത്രഫലം | K.P.Sreevasthav Palakkad 9447320192

Описание: രേവതി

നക്ഷത്ര ക്രമത്തിൽ 27ാം സ്ഥാനമാണ് രേവതി നക്ഷത്രത്തിന് കൽപ്പിച്ചിരിക്കുന്നത്

സമ്പൂർണ്ണാംഗഃ ശൂചിർദ്ദക്ഷോ
സാധുഃ ശൂരോ വിചക്ഷണഃ;
രേവതീ സംഭവോ ലോകേ
ധനധാന്യരലംകൃതഃ.

സാരം:

രേവതി നക്ഷത്രത്തിൽ ജനിച്ചവന്റെ അംഗങ്ങൾക്ക് പൂർണ്ണതയുണ്ടാകും. വൃത്തിയായിരിക്കാൻ എപ്പോഴും ശ്രദ്ധിക്കും. സജ്ജന സമ്മതനും, ശൂരനും സകല കാര്യങ്ങളിലും സമർത്ഥനും ധനധാന്യ സമ്പത്തുകളോട് കൂടിയവനുമായിരിക്കും.

ഇപ്രകാരമുള്ള പ്രമാണ പ്രകാരമെല്ലാം ചിന്തിമ്പോൾ രേവതി നക്ഷത്രത്തിൽ ജനിച്ചവർ പൊതുവെ ശുദ്ധഹൃദയരും സൽസ്വഭാവികളും ആത്മാർത്ഥതയുള്ളവരും ആയിരിക്കുമെന്ന് പറയാം.
നല്ലപോലെ സംസാരിക്കാനും സന്ദർഭോചിതമായി പെരുമാറാനും ഇവർക്ക് നല്ല സാമർത്ഥ്യമുണ്ടായിരിക്കും.

ബുദ്ധിസാമർത്ഥ്യവും കഴിവും കർമ്മശേഷിയും കൂടുതലായുള്ള ഇവർക്ക് ധാരാളം സുഹൃത്തുക്കളും ആരാധകരുമുണ്ടായിരിക്കും. സ്വഭാവത്തിൽ പ്രകടമാകുന്ന അസ്ഥിരതയാണ് ഇവരുടെ എടുത്തുപറയാവുന്ന പ്രത്യേകത!

ഒന്നിലും സ്ഥിരമായി നിന്നെന്ന് വരില്ല. ഒരു പ്രവർത്തനത്തിൽ നിന്ന് മറ്റൊന്നിലേക്ക് മാറിക്കൊണ്ടിരിക്കും. അതുപോലെ ഇടയ്ക്കിടെ അഭിപ്രായങ്ങളും മാറിക്കൊണ്ടിരിക്കും. നക്ഷത്രാധിപൻ ബുധനും, രാശിയുടെ അധിപൻ വ്യാഴനുമാകയാൽ രേവതി നക്ഷത്രക്കാർ ബുദ്ധിയും സംസ്കാരവും ഉള്ളവരായിരിക്കും. പ്രസന്നമായ വ്യക്തിത്വവും ചടുലമായ നീക്കങ്ങളും ഹൃദ്യമായ പെരുമാറ്റവും ഇവരുടെ മുഖമുദ്രയാണ്.

ഉഭയരാശിയായ മീനം രാശിയിലാണ് ഇവരുടെ ജനനം. അതിനാൽ ഇരട്ട വ്യക്തിത്വം പുലർത്തുന്ന പ്രവണതയും ഇവരിലുണ്ടായിരിക്കും. അതുപോലെ സ്വന്തം നാട്ടിലും അന്യനാട്ടിലും മാറിമാറി കഴിയാനുള്ള അവസരവും ഇവർക്ക് വന്നുചേരും. ആദർശവും പ്രായോഗികതയും സമന്വയിപ്പിക്കുന്നതിലുള്ള രസതന്ത്രം ഇവർക്കറിയുന്ന പോലെ മറ്റാർക്കും വശമില്ലായെന്ന് പറയുന്നതിൽ ഒട്ടും അതിശയോക്തിയില്ല.
സ്വന്തം കഴിവുകളെക്കുറിച്ച് ഇവർക്ക് തികഞ്ഞ ബോധ്യമുണ്ട്. ചിലപ്പോളത്
അഹങ്കാരത്തോളം എത്തുകയും ചെയ്യും.
ആരേയും ഒരു പരിധിയിലധികം വകവച്ചു കൊടുക്കുകയോ, ആരിലും വിധേയത്വം ഭാവിക്കുകയോ ചെയ്യാത്ത ഇവർ തികച്ചും സ്വതന്ത്ര ബുദ്ധികളും സ്വാതന്ത്ര്യ പ്രേമികളുമായിരിക്കും. സ്വാതന്ത്ര്യത്തെ ചോദ്യം ചെയ്യുന്ന വാക്കുകളോ, പ്രവൃത്തികളോ ആരിൽ നിന്നുണ്ടായാലും ഇവരതിനെ നഖശിഖാന്തം നേരിടുന്നതാണ്. സ്വാതന്ത്ര്യത്തിന് ഭംഗം വരുന്ന ഒരു കൂട്ടുകെട്ടിലും താല്പര്യം കാണിക്കാത്ത ഇവർക്ക് വിമർശനവും ഇഷ്‌ടമല്ല.

താൻ ചെയ്തത് തെറ്റാണെങ്കിൽപ്പോലും തന്നെ വിമർശിക്കുന്നത് സഹിക്കാൻ ഇവർക്ക് സാധിക്കുകയില്ല. അതിനാൽ എന്തെങ്കിലും ചില വിഷമപ്രശ്‌ങ്ങൾ വന്നാൽ ഇവർ പെട്ടെന്ന് തളർന്നുപോകും. അത്തരം കാര്യങ്ങൾ സഹിക്കുവാനോ, വഹിക്കാനോ ഉള്ള മനഃശക്തി ഇവർക്ക് കുറവാണ്. ഹൃദയചാഞ്ചല്യം ഇവരിൽ കൂടുതലായി കാണാൻ കഴിയും.

രഹസ്യങ്ങൾ സൂക്ഷിക്കുവാനുള്ള കഴിവും പ്രായേണ ഇവർക്ക് കുറവായിരിക്കും. തങ്ങളെ ദോഷകരമായി ബാധിച്ചേക്കാവുന്ന കാര്യങ്ങളാണെങ്കിൽക്കൂടിയും മറ്റൊരാളോട് പറഞ്ഞേ ഇവർക്ക് മതിവരികയുള്ളൂ. സ്നേഹം തോന്നുന്നവരുടെ മുമ്പിൽ പ്രത്യേകിച്ചും സ്വന്തം ഹൃദയരഹസ്യങ്ങൾ പൂർണ്ണമായും ഇവർ തുറന്നുവയ്ക്കും. അതിനാലാണിവരെ ശുദ്ധഹൃദയരെന്ന് ആദ്യം വിശേഷിപ്പിച്ചത്. ഈശ്വരഭക്തിയിലും ഇവരെപ്പോലെ ഉറച്ച വിശ്വാസം മറ്റുള്ളവരിൽ കാണുക പ്രയാസമാണ്.

ഏതു പ്രതിസന്ധിയിലും ഈശ്വരവിശ്വാസം
ഇവർ മുറുകെപ്പിടിക്കും. ദൈവാനുഗ്രഹം
എല്ലാക്കാര്യത്തിലും ഇവർക്കൊപ്പം
ഉണ്ടായിരിക്കുകയും ചെയ്യും.

അതുപോലെതന്നെ സഹജീവികളോട്
കരുണയുള്ളവരുമായിരിക്കും. ആശ്രിതർക്ക്
ഒരു തണൽ മരമാണിവർ.
മറ്റുള്ള
വ്യക്തികളെ വളർത്തുവാനായി
സദ്ബുദ്ധിയും സഹായങ്ങളും നൽകാൻ
ഇവർ പരമാവധി ശ്രമിക്കുന്നതാണ്.

നീറുന്ന മനസ്സുകൾക്ക് ഇളം കാറ്റാകാൻ വെമ്പൽകൊള്ളുന്ന മനസ്സ് ഇവർക്കുണ്ടായിരിക്കും. ഇവരുടെ സ്നേഹമോ, സഹായമോ കൈപ്പറ്റാത്തവർ കുടുംബത്തിൽ മാത്രമല്ല അയൽപക്കങ്ങളിലും കാണുകയില്ല.പക്ഷിമൃഗാദികളോടുവരെ ദയാവായ്പോടേയേ പെരുമാറൂ. ഇങ്ങനെയൊക്കെയാണെങ്കിലും ആരെന്തു പറഞ്ഞാലും സ്വന്തം അഭിപ്രായത്തെ മുറുകിപ്പിടിച്ചു പ്രവർത്തിക്കുകയും പറയുകയും ചെയ്യുന്നവരാണിവർ. അതുകൊണ്ടുണ്ടാകുന്ന ഏതു ദോഷഫലങ്ങളേയും മൗനമായി ഇവർ അനുഭവിച്ചുകൊള്ളുകയും ചെയ്യും.

ചില സമയം സ്ഥലകാല പരിഗണനകൾ കൂടാതെ ആദർശങ്ങളുടെ പേരിൽ പെട്ടെന്ന് ക്ഷോഭിക്കുകയും എന്തും വിളിച്ചുപറയുകയും ചെയ്യും. കോപാവേശംകൊണ്ട് പെട്ടെന്ന് ചെയ്തുപോകുന്ന കാര്യങ്ങളെക്കുറിച്ച് ഓർത്ത് പിന്നീടിവർ പശ്ചാത്തപിച്ചേക്കും. മറ്റുള്ളവരെ ഉപദ്രവിക്കരുതെന്ന നിർബന്ധവും ആർഭാടഭ്രമവും ഇവരുടെ പ്രത്യേകതകളാണ്.

സഹനശക്തി ഇവർക്ക് കുറവാണെങ്കിലും ആരെങ്കിലും പിൻബലം കൊടുത്താൽ ഏതു പ്രതിബന്ധത്തേയുമിവർ മറികടക്കും. സ്വന്തം ബന്ധുവർഗ്ഗങ്ങളെക്കൊണ്ടും പിതാവിനെക്കൊണ്ടും ഇവർക്ക് കാര്യമായ പ്രയോജനമൊന്നും സിദ്ധിക്കുന്നില്ല. സഹോദരങ്ങളെക്കൊണ്ടുള്ള നന്മയും താരതമ്യേന ഇവർക്ക് കുറവായിരിക്കും.

സഹോദര വർഗ്ഗത്തിൽ നിന്നും വ്യത്യസ്തമായ ജീവിതരീതിയും മനോഭാവവുമായിരിക്കും ഇവർ വച്ചുപുലർത്തുന്നത്.

രേവതി നക്ഷത്രക്കാർക്ക് ജീവിതത്തിൽ പല പരിവർത്തനങ്ങളും ഉണ്ടായിക്കൊണ്ടിരിക്കും. ഇവരിലധികം പേർക്കും വിദേശയാത്രാഭാഗ്യവും വിദേശത്തിൽ താമസിക്കേണ്ട സാഹചര്യങ്ങളും ഉണ്ടാകും. ഇവർക്ക് കാവ്യനാടകാലങ്കാരാദികളിലോ, ജ്യോതിഷം, വൈദ്യം മുതലായ ശാസ്ത്രങ്ങളിലോ പാണ്ഡിത്യം ഉണ്ടായിരിക്കും. ഔദ്യോഗികരംഗങ്ങളിലും പൊതുപ്രവർത്തന- സാമൂഹ്യരംഗങ്ങളിലും ശോഭിക്കുവാനുമിവർക്ക് സാധിക്കും. ശുദ്ധഗതിക്കാരും സത്യസന്ധരുമായ ഇവർ വ്യാപാരരംഗത്ത് ശോഭിക്കാൻ അല്പം പ്രയാസമാണ്.

സ്വന്തം പരിശ്രമംകൊണ്ടേ ഇവരിലധികം പേരും നന്നാവുകയുള്ളൂ. പ്രവർത്തനരംഗങ്ങളിൽ ഇവർ പരാജിതരല്ല. അസാമാന്യമായ കഴിവുകളും സാമർത്ഥ്യവും ഇവരിൽ നൈസർഗ്ഗികമായി തന്നെയുണ്ട്. ഏതുകാര്യത്തിലും ഉണ്ടാകുന്ന പെട്ടെന്നുളള വിരസതയും, തീരുമാനങ്ങൾ എടുക്കുന്നതിലുളള കാലതാമസവും ഇവരുടെ പ്രത്യേകതയാണ്. അതിനാൽ തന്നെ ഒരേ പ്രവർത്തനത്തിൽ തന്നെ ഉറച്ചു നിൽക്കാതെ മാറിമാറി പ്രവർത്തിക്കേണ്ട സാഹചര്യവും ഇവർക്കുണ്ടാകും.

etc.....