გარდაიცვალა საქართველოს კათოლიკოს-პატრიარქი ილია

Описание: სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი ილია მეორე 1933 წელს დაიბადა. მისი ერისკაცობის სახელი ირაკლი შიოლაშვილია. მან სასულიერო ცხოვრება სრულიად ახალგაზრდა ასაკში დაიწყო, 24 წლის ბერად აღიკვეცა.

მომდევნო 20 წლის განმავლობაში, ილია მეორემ სასულიერო იერარქიის ყველა საფეხური გაიარა და გახდა ცხუმ-აფხაზეთის მიტროპოლიტი. მისი სასულიერო ცხოვრების ახალი ეტაპი 1977 წლიდან დაიწყო, როდესაც საქართველოს სამოციქულო ეკლესიის მე-12 კრება შედგა. ამ კრებაზე  საპატრიარქო ტახტის ახალი საჭეთ-მპყრობელი უნდა აერჩიათ. კრებას სულ 45 დელეგატი ესწრებოდა და ყველა მათგანმა ერთხმად დაუჭირა მხარი 44 წლის მიტროპოლიტის პატრიარქობას. ზუსტად ორ დღეში კი - სვეტიცხოვლის ტაძარში, ილია მეორეს ინტრონიზაცია გაიმართა. კათოლიკოს პატრიარქის აღსაყრდებაზე დასასწრებად, სომხეთისა და რუსეთის პატრიარქები, ასევე ბულგარეთის ეკლესიის მაღალი იერარქიის სასულიერო პირები იმყოფებოდნენ. თუმცა, საბჭოთა ხელისუფლება სვეტიცხოველში არ უშვებდა  მოქალაქეებს. მხოლოდ სპეციალური საშვის მქონე პირებს რთავდნენ ეკლესიაში შესვლის უფლებას, ამის მიუხედავად, ხალხის ტალღამ მილიციელების ცოცხალი კორდონი მაინც გაარღვია და სვეტიცხოველი მოქალაქეებით გაივსო. ამ დღეს საქართველოს 141-ე და ისტორიაში ყველაზე ახალგაზრდა პატრიარქმა, სვეტიცხოველში შეკრებილ ხალხს ქადაგებით პირველად მიმართა და უთხრა მათ, რომ საკუთარი მხრებით ზიდავდა „ამ უმძიმეს და საპატიო მოვალეობას“. 1977 წლისთვის საქართველოში მხოლოდ 40-მდე ეკლესია მოქმედებდა, რომელთაც ექვსი მღვდელმთავარი ხელმძღვანელობდა. სამღვდელოება იდევნებოდა. დაკეტილი იყო ალავერდი, გელათი, ანჩისხატი. თუმცა მთავარი პრობლემა იყო ის, რომ თითქმის 17 საუკუნის ისტორიის მქონე ქართული ეკლესიისთვის, რუსეთს ავტოკეფალია ჰქონდა გაუქმებული. ილია მეორემ ქართველ მეცნიერებთან ერთად, ისტორიული წყაროების მოძიება დაიწყო, ათონის მთიდან დოკუმენტები გამოიწვია და მსოფლიო საპატრიარქოს წარუდგინა. თავდაპირველად  მსოფლიო პატრიარქი დათანხმდა საქართველოსთვის ავტოკეფალია მიეცა. თუმცა ილია მეორეს მოთხოვნა არა ავტოკეფალიის მინიჭება, არამედ ავტოკეფალიის აღდგენა იყო, რაც ხაზს უსვამდა ქართული ეკლესიის მრავალსაუკუნოვან ისტორიას. საბოლოოდ, 13 წლის შემდეგ 1990 წელს, კოსტანტინოპოლმა სპეციალური სიგელით დაადასტურა საქართველოს ეკლესიის ისტორიული ავტოკეფალია და ის აღდგენილად გამოაცხადა.

ამის პარალელურად, ილია მეორე საზოგადო ცხოვრებაშიც აქტიურად იყო ჩართული. ის ყველა კუთხეში ჩადიოდა და ხვდებოდა ხალხს. საპატრიარქოში ყოველკვირეულად მასპინძლობდა სამეცნიერო წრეებს. 1978 წელს ქართული ენის დაცვის მოტივით, რუსთაველის გამზირზე გამოსული სტუდენტების გვერდით იდგა. ამავე პერიოდში თითქოს და შემთხვევით, საპატრიარქოს შენობას ცეცხლი გაუჩნდა და დაიწვა. 1982 წელს საბჭოთა ხელისუფლება ილია მეორეს აიძულებდა, რომ გადამდგარიყო, თუმცა მიზანს ვერ მიაღწიეს. ილია მეორე 9 აპრილს რუსთაველის გამზირზე იმყოფებოდა.  

საბჭოთა სისტემის დანგრევის  შემდეგ აქტიურად დაიწყო გაუქმებული ეკლესია-მონასტრების აღდგენა, შესამჩნევად გაიზარდა სასულიერო პირების, ეპარქიებისა და მრევლის რაოდენობა. აშენდა სამების საკათედრო ტაძარი. პატრიარქის ინიციატივით, ქვეყნის დემოგრაფიული პრობლემის მოგვარებისთვის, 2007 წლიდან საყოველთაო ნათლობები დაიწყო. 2008 წელს კი, სანამ ქვეყანა რუსულ აგრესიას უმკლავდებოდა, საპატრიარქომ ცხინვალის მიმდებარე სოფლებში შესვლის უფლება მოიპოვა. 16 აგვისტოს 75 წლის პატრიარქის ფრონტის ხაზთან ჩასვლას, მხოლოდ სიმბოლური მნიშვნელობა არ ჰქონია. სწორედ სასულიერო პირებმა შეძლეს გარდაცვლილი მეომრების ცხედრების გადმოსვენება, რომელთა გადაცემაზეც რუსული მხარე უარს ამბობდა. საოკუპაციო ზოლს  პატრიარქი მეორედ ომიდან 7 წლის შემდეგ ესტუმრა. 

მნიშვნელოვანია ილია მეორეს ღვაწლი საქართველოს გაერთიანების მიმართულებით. 2010 წლიდან პატრიარქი წმინდა სინოდის განჩინებით, მცხეთა-თბილისის ეპარქიასთან ერთად, ბიჭვინთისა და ცხუმ-აფხაზეთის ეპარქიის მმართველი გახდა, რითაც ხაზი გაეუსვა აფხაზეთის, როგორც საქართველოს განუყოფელი ნაწილის მნიშვნელობას ქართული სახელმწიფოსა და ეკლესიისთვის. 
ილია მეორის პატრიარქობის 49-ე წლის თავზე საქართველოში 2 ათასზე მეტი მოქმედი ეკლესია მონასტერი და სამი ათასზე მეტი სასულიერო პირია. ეპარქიების რაოდენობა 15-დან 46-მდე გაიზარდა.

ამ დროისთვის უკვე 70-ზე მეტი საყოველთაო ნათლობა გაიმართა და კათოლიკოს-პატრიარქს 50 ათასზე მეტი ნათლული ჰყავს. საქართველოს ეკლესიის ისტორიაში, ილია მეორე ყველაზე დიდხანს იყო საპატრიარქო ტახტის საჭეთმპყრობელი.

ეწვიეთ ჩვენს საიტს - https://1tv.ge/
მოიწონეთ ჩვენი გვერდი -   / 1stchannel.1tv.ge  
გამოიწერეთ ჩვენი არხი -    / georgianpb  
ვიდეო წარმოადგენს საზოგადოებრივი მაუწყებლის საკუთრებას.
მისი გავრცელება შეგიძლიათ მხოლოდ ბმულის გაზიარებით.
დაუშვებელია მასალის ჩამოტვირთვა და სხვაგან ატვირთვა,
ამ შემთხვევაში მაუწყებელი უფლებას იტოვებს მიმართოს შესაბამის ზომებს.