Robert Mugabe - IJAMBO RYAHINDURA UBUZIMA EP124

Описание: Indwanyi idatsimburwa, impirimbanyi y’impinduramatwara mu bya politike, umugabo utarakangwaga n’igitutu cy’ibihugu byamahanga, umwe mu bihagazeho bavuga akabarimo nka ba HUGO Chavez, Pervez Musharraf, Khadafi ndetse n’abandi, umwe mu batavugirwamo n’amahanga Afurika yabuze, Robert Gabriel Mugabe.

Uyu mukambwe yabonye izuba ku italiki 21 Gashyantare 1924, yiga mu mashuri ya kiliziya gatolika aba umwalimu.

Gabriel Mugabe yavukiye mu muryango w’abachona(ubwoko bwo muri Zimbabwe) ukennye unaciriritse mu gace ka Kutama muri koroni yitwaga Northern Rhodesia aho yanize amashuri ye abanza ndetse akanakomereza ayisumbuye mu ishuri rya Kutama college.

Arangije ayisumbuye Mugabe yakomereje muri kaminuza ya University of Fort Hare.

Akirangiza kaminuza Robert Mugabe yabaye umwarimu muri koroni Southern Rhodesia yayoborwaga n’abazungu b’abongereza ndetse yanabaye umwarimu mu gihugu cya Ghana, nyuma yaho Mugabe yaje gutangira kwinjira muri Politike ku ruhande rw’abatavuga rumwe na leta aho yaje no gutabwa muri yombi agafungwa imyaka igera ku 10 hagati y’inkuta za Gereza ya Hwahwa kuva mu mwaka wa 1964 kugera mu wa 1974.

Akimara kurekurwa yahungiye mu gihugu cya Mozambique aho wari n’umwanya mwiza wo kwisuganya ahita anashinga ishyaka rya ZANU ryaje no guhinduka ishyaka rikomeye rya ZANU PF .

Gukomeza kutavuga rumwe na leta ya Zimbabwe kwa Mugabe n’abari bamushyigikiye barwanyaga ubwiganze bw’abongereza mu buyobozi bwa Zimbabwe byaje kubageza ku biganiro by’amahoro byaje no kugeza ku matora yo mu mwaka wa 1980 wabaye umwaka w’intsinzi kuri Zabu PF na Mugabe ndetse n’abanyafurika batari bashyigikiye ubukoroni muri icyo gihe.

Zimbabwe ikibona ubwigenge Mugabe yahise agirwa Minisitiri w’intebe aho mu byari bimuraje ishinga harimo kwita k’ubuzima, uburezi ndetse n’ubukungu.

Nyuma gato mu mpera za 1987 Mugabe yagiye k’ubutegetsi nka Perezida wa kabiri wa Zimbabwe aho yayoboye kugeza ku matora yo mu 2002 aho yiyamamaje akanatsinda akongera kwiyamamaza akanatsinda amatora yo muri 2008 ndetse na 2013 manda itarangiye uko we yabyifuzaga kuko yatunguwe no gutenguhwa n’ishyaka rye ndetse n’igisirikare cyaje kumuhatira kuva k’ubutegetsi.

Ibyo byose byaje nyuma y’iyirukanwa rya Emmerson Mnangagwa wari visi Perezida we aho byahwihwishijwe ko byari byagizwemo uruhare n’umugore wa Mugabe, Madame Grace Mugabe ngo washakaga kuzasimbura umugabo we.

Haje kwaduka kwivumbura kw’igisirikare gifata Radio na Televiziyo by’igihugu ndetse na Perezidanse ari nabyo byaje kugeza ku iherezo ry’ubutegetsi bw’umukambwe Robert Gabriel Mugabe kuri ufite imyaka 93 y’amavuko.

Umukambwe Robert Gabriel Mugabe yatabarutse afite imyaka 95 y’amavuko Tariki ya 6 Nzeli 2019, akaba yaraguye mu bitaro byo mu gihugu cya Singapore aho yari amaze iminsi yivuriza indwara itaratangajwe.

Robert Mugabe azakomeza kwibukwa na benshi nk'intwari yaharaniye ubwigenge bwa Zimbabwe, azanibukwa kandi nk'umugabo wategetse igihugu kugeza avuze ko azavaho Imana imuhamagaye.